38. Ichkamet wan cabrajmet (30:25-42)

Ichkamet wan cabrajmet

25 KWAK Rajel kipunij Yosep, Yakob kilwij Laban:

—Shinechajkawa niaw ka nutal. 26 Shinechmaka ne nusiwawan wan ne nukukunew ne nitekitki inpanpa, ma niaw, ka taja tikmati keski nitekittuk.

27 Laban kilwij:

—Nimetztajtani su tikita yek, ika nikmatki ka nechteuchijtuk Tutajwan mupanpa 28 —inak—, shinechilwi keski mupatiw wan niu-nimetztashtawia.

29 Kilwij:

—Taja tikmati keski nitekittuk mupal wan ken nentuk ne takwalmet nuwan. 30 Tikpiatuya sema chiupi kwak niwalaj, ashan muchijtuk wey, wan Tutajwan metzteuchijtuk kwak niwalaj. Wan ashan, keman niu-nikchiwa naja nusan chiupichin pal ne nukal?

31 Inak:

—Tay tikneki ma nimetzmaka?

Inak Yakob:

—Inte tiu-tinechmaka tatka. Su tikchiwa ini tay nimetzilwia niu-nitajpia ne takwalmet ken katka. 32 Shu-shipanu ijtik muchi ne takwalmet ashan wan shikijkwani muchi ne ijichkat kusnaj wan ne cajcabraj kwikwilujtuk wan tilwijtuk wan yejemet ne taiwan tiu-tinechtashtawia. 33 Wan ma nankili nupanpa su nimelawak tik ne tunal pal musta, kwak tiu-tiajsi tikpepeta ne tay tinechtashtawij, ka muchi tay nian tilwijtuk nian kwikwilujtuk ipal ne cajcabrajkunet ush kusnaj ijtik ne ijichkakunet nikpia, yaja ichtektuk.

34 Inak Laban:

—Ken tinatuk yek nemi.

35 Uni tunal yajki wan kinhijkwan ne ujukichcabraj wawasujtuk ush kwikwilujtuk wan muchi ne sijsiwacabraj tilwijtuk ush kwikwilujtuk, muchi ne kipiatuyat chiupi istat wan muchi tay kusnaj ijtik ne ichkamet, wan kinhajkaw tik ijimey ne ipilawan, 36 wan yajki wejka ken se ujti pal yey tunal wejka kan nemituya Yakob. Yakob nakak tajpia ne sejseuk pal ne iichkatal Laban.

37 Yakob kikwij yajyankwik mulinka pal sejse kwawit. Kinshipej pal muitat ijistak tilkwil ijtik ne mujmulinka. 38 Kiketzki ne mujmulinka shijshipejtuk tejtekpantuk ijtik ne ajatiluyan kan ajsit atit ne takwalmet tachiat kan nemituyat ne takwalmet, wan yejemet tutunit kwak witzet atit. 39 Tutunket ne takwalmet itech ne mujmulinka wan ne takwalmet kipunijket wajwawasujtuk, tijtilwijtuk wan kwijkwikwilujtuk. 40 Wan ne sijsiwaichkat Yakob kinkupej. Kitalij ne ijishkalyu ne takwalmet tachiat ne wajwawasujtuk wan muchi ne kujkusnaj tik ne iichkatal Laban. Wan kishtij ijichkatal ka ikwaj, inte kintalij inawak ne iichkatal Laban. 41 Senpa kwak tutunit ne takwalmet tajpaltik, Yakob kitalia katka ne mujmulinka tik intachialis ne takwalmet tik ne ajatiluyan, pal tutunit iwan ne mujmulinka. 42 Kwak ne takwalmet inte kipiat intajpal, yaja inte kitalia katka, wan ne inte kipia intajpal pal Laban, wan ne tajtajpaltik ipal Yakob.

37. Ne dujdudajkamuj (30:14-24)

Ne dujdudajkamuj

14 REUBEN kiajsik tik ne tujtunal pal tapishkat

sejse pal ne kamuj itukay dudaj

kalwikak ipal Lea n' inan, wan Rajel kilwij:

shinechmaka chiupi pal n' idujdudaj ne mupiltzin!

15 kilwij: anka chiupi ka tikwijtuk nushulejyu

nusan tikwiskia n' idujdudaj ne nupiltzin?

inak Rajel: tay tina su yaja yu-kuchi muwan

ka tayua ipatka n' idujdudaj ne mupiltzin?

16 kwak Yakob walaj ne kojtan ka teutak

kiski Lea kinamiki, inak: ne tayua

tiwitz nutech ka nimetzkujtuk ka ipatiw

n' idujdudaj ne nupiltzin, wan senkuchket

17 Tutajwan kikakik Lea wan weykiski

kipunilij Yakob ne makwil pal ipilawan

18 inak Lea: ne Teut nechmakatuk nupatiw

ika nikmakak nucriadaj ne nushulejyu ken isiwaw

wan kinutzki n' itukay Ishakar

19 weykiski senpa Lea

kipunilij Yakob ne chikwasen

20 inak Lea: ashan ne Teut nechtakulijtuk

nushulejyu yu-nechtasujta

ika nikpunijtuk chikwasen piltzin

wan kinutzki n' itukay Zebulun

21 tipan kipunij se siwapiltzin wan kinutzki n' itukay Dina

22 ne Teut kielnamik Rajel wan kikakik

kitapuilij n' ishinach

23 ijtiweykiski wan kipunij se piltzin

inak: ne Teut nechishtilijtuk nuishpinawalis

24 kinutzki n' itukay Yosep wan inak:

Tutajwan nechtalilijtuk ukse nupiltzin

36. Ne ipilawan Yakob (29:31 - 30:13)

Ne ipilawan Yakob

31 KWAK Tutajwan kitak

ka inte kitasujtat Lea

kitapuilij n' ishinach

wan Rajel ipilawan inte kipia

32 weykiski Lea wan kipunij piltzin

kinutzki n' itukay Reuben ika inak:

ka Tutajwan nechitztuk kwajkwalutuk

wan ashan yu-nechneki nushulejyu

33 weykiski senpa wan kipunij piltzin

inak: ka Tutajwan takakik ka inte nechtasujtat

wan nechmakatuk nusan yajini

wan kinutzki n' itukay Shimon

34 weykiski senpa wan kipunij piltzin

inak: ashan yu-musalua nushulejyu nutech

ika nikpunilijtuk yey kunet

wan kinutzki n' itukay Lewi

35 weykiski senpa wan kipunij piltzin

inak: ashan nikmaka padiush Tutajwan

yajika kinutzki n' itukay Yuda

wan muketzki wan tea tapunij

30

1 kwak Rajel kitak ka inte tapunia

pejki kikukulita n' ipipi

wan kilwij Yakob: shinechmaka nupilawan

asu inte, naja niu-nimiki

2 kwalanik Yakob iwan Rajel

inak: anka naja niipatka ne Teut?

anka tina ka naja niweli

nikishtilia n' itakil ne muijti?

3 Rajel inak: shikwi nusiwapil Bilha

shikalaki tel ka ichan

ma tapuni ijpak nutewajka

wan itech niu-nimuketza naja nusan

4 kimakak Bilha n' icriadaj ken isiwaw

wan Yakob kalak ichan

5 wan ijtiweykiski Bilha

wan kipunilij Yakob se piltzin

6 inak Rajel: ne Teut kitztuk su niyek

nusan kikaktuk nutajtanilis

nechmakatuk se piltzin

yajika kinutzki n' itukay Dan

7 ijtiweykiski senpa

Bilha n' icriadaj Rajel

wan mukwepki kipunia

ukse piltzin pal Yakob

8 inak Rajel: nimuishmimilujtuk

tetekia iwan ne nupipi

wan niwelik!

wan kinutzki n' itukay Naptali

9 Lea kitak ka intea tapunia

wan kikwij Zilpa n' icriadaj

wan kimakak Yakob ken isiwaw

10 wan Yakob kalak ka ichan

Zilpa n' icriadaj Lea

kipunilij Yakob se piltzin

11 inak Lea: kiski yek!

wan kinutzki n' itukay Gad

12 Zilpa n' icriadaj Lea kipunilij

Yakob ukse piltzin

13 inak Lea: nikpia suertej!

wan kinutzki n' itukay Asher

35. Munamiktij Yakob (29:18-30)

Munamiktij Yakob

18 YAKOB kinekik Rajel. Inak:

—Ma nitekiti chikume shiwit ipanpa Rajel ne musiwapiltzin chikitik.

19 Inak Laban:

—Yek ma niu-niknamiktia muwan wan te ma niu-niknamiktia iwan seuk. Shinaka nuwan.

20 Yakob tekitki ipanpa Rajel chikume shiwit. Muchijket tik ne itachialis ken chikume tunal ika kineki Rajel. 21 Kwakuni Yakob kilwij Laban:

—Shalwika ne nusiwaw ka ajsik ne tunal, wan ma nikalaki ichan.

22 Laban kisentepew muchi ka né wan kichijki se yualu. 23 Kwak tayuakik, yaja kalkwij Lea ne isiwapiltzin, kalwikak itech Yakob wan Yakob kalakik ichan. 24 Laban kitakulij Zilpa ne icriadaj ipal Lea ne isiwapiltzin ken criadaj. 25 Kwak tatwik wan welik tachia, yaja Lea! Yaja kilwij Laban:

—Tetekia muwan, tay tinechchiwilijtuk! Ipanpa Rajel nitekitki muwan, wan taika tinechchiwiltij?

26 Laban inak:

—Inte muchiwa ijkiuni tik ne tutal. Inte weli munamiktia ne chikitik iishpan ne achtu siwapiltzin. 27 Shiktami ini chikumetunal wan tiu-timetzmakat nusan yajuni ipanpa uk chikume shiwit ne tiu-titekiti nupal.

28 Yakob kichijki kiane wan kitamij uni chikumetunal. Laban kinamiktij iwan Rajel ne isiwapiltzin. 29 Laban kitakulij Bilha ne icriadaj ipal Rajel ne isiwapiltzin ken criadaj. 30 Yakob kalakik ichan Rajel nusan, wan kinekik Rajel mas que Lea, wan tekitki ipal uk chikume shiwit.

34. Yakob ajsik Jaran (29:1-17)

Yakob ajsik Jaran

29

1 YAKOB ajkewik wan yajki tik ne ujti ka ital ne tukniwan pal Taneskan.

2 Kitak ka né se ishat tik ne kojtan. Unkan nemituyat yey ichkatal ika tik uni ishat atit katka ne takwalmet. Sujsul wey ne tet inawak ne ishat. 3 Kwak tamit musentepewat muchi ne takwalmet ka ne, kimimiluat katka ne tet pal ne ishat pal kishtiat at ma atikan ne ichkamet wan mukwepat katka kitzakwat ne ishat iwan ne wey tet. 4 Yakob kintajtanilij:

—Numanujwan, kanka anwitzet anmejemet?

Inaket:

—Tiwitzet Jaran.

5 Kinhilwij:

—Ankishmatit Laban ne ikunew Najor?

Inaket:

—Tikishmatit.

6 Kintajtanilij:

—Yaja ken nemi?

Inaket:

—Nemi yek. Uni witz Rajel ne isiwapiltzin iwan ne ichkatal.

7 Inak:

—Tinemit tajkutunal. Tesu ne horaj pal musentepewat ne takwalmet. Kwak tamit atit shikwikakan ka kojtan.

8 —Inte tiwelit —kilwijket— hasta ma musentepewakan muchi ne ijichkatal wan ma kimimilukan ne tet iten ne ishat pal atit.

9 Kwak kenhayuk nemituya tanutza inwan, Rajel witz iwan ne iichkatal ne iteku ika yaja tajpia ne takwalmet.

10 Kwak Yakob kitak Rajel ne ikunew Laban ne iechkaw ne inan wan ne iichkatal Laban ne iechkaw ne inan, Yakob ajsik wan kimimiluj ne tet iten ne ishat wan kiajkaw atit ne ichkamet ipal Laban ne iechkaw ne inan. 11 Yakob kitennamik Rajel wan chukak. 12 Kineshtilij ken ijtuk ka yaja ne iikaw ne iteku Rajel, ka yaja ne ikunew Rebeka. Ne siwapil kiski mutalua kilwia ne iteku ken ijtuk.

13 Kwak takakik Laban ipanpa Yakob ne ikunew ne ieltiw, yajki mutalua pal kinamiki. Kinapaluj wan kitennamik wan kikalaktij ka ichan. Kilwij Laban muchi ini tay panutuya. 14 Laban kilwij:

—Taja tinuumiu wan tinunakayu.

Nakak ichan muchi ne tujtunal pal se metzti. 15 Se tunal, Laban kilwij Yakob:

—Sema ika tinuiknew, anka tiu-titekiti nupal ipanpa te tatka?! Shinechilwi keski ne mupatiw.

16 Laban kipiatuya ume siwapiltzin. Ne wey itukay Lea, ne chikitik itukay Rajel. 17 Ne inhijish Lea yajyamanik. Ne iweyka Rajel ishyek wan sea galantzin.

33. Yakob kitemikik se kutejkuni wan kichijki se promesaj (28:10-22)

IV. Yakob

··/ KISKI

Yakob kitemikik se kutejkuni wan kichijki se promesaj

10 KISKI Yakob Beer-Sheba wan yajki Jaran. 11 Ajsik kan panuk ne tayua ika kalaki ne tunal. Kikwij sejse tet pal unkan wan kitalij ken kwajtetun wan mutekak.

12 Kitemikik se kutejkuni ejkatuk talchi, ne itzuntekun ajsi ne ilwikak. Ne itajtanawatiani ne Teut kutejkut wan kutemut yawit tik yaja. 13 Ne nemik Tutajwan ejkatuk inawak. Inak:

—Naja ni Mutajwan

ne Teut pal Abraham ne muteku

wan ne Teut pal Itzak

ne tal kan tikuchi tinemi ijpak

taja nimetzmakas

wan ne mupilawan

14 muchiwas ne mushinach

ken ne tewti pal ne tal

tapanis ka kalakian wan taneskan

ka ajkuikpa wan tatzinu

mutech muyektenewasket

muchi ne chijchinamit pal ne taltikpak

wan intech mupilawan

15 shikmati, ninemi muwan

niu-nimetztajpia nujme tiasneki

niu-nimetzkwepa ka ini tal

ika inte nimetzelkawas

hasta ma niu-nikchiwa

tay ne nimetzilwijtuk

16 Walisak Yakob wan tamik temiki. Inak:

—Man nemi Tutajwan

ka nikan kan ninemi

wan te nikmatki!

17 Majmawi Yakob. Inak:

—Kia temujmuti nikan kan nimuajsi!

yajini n' ikal ne Teut!

wan yajuni n' itentzakka n' ilwikak!

18 Peyna ka tapuyawa Yakob muketzki. Kikwij ne tet ne kitalijtuya ken kwajtetun wan kiketzki ejkatuk ken teelnamiktilijka. Kishinij tumakka ka itzunpan. 19 Kinutzki ne itukay kan nemituya Bet-El, mal achtu yaja itukay Luz.

20 Yakob kichijki se promesaj. Inak:

—Asu nemi Tutajwan nuwan

wan nechtajpia tik ini ujti kan niasneki

wan nechmaka ne tamal pal nitakwa

wan nukwajkwach pal nimutzakwa

21 wan nimukwepa yek ichan nuteku

wan nikpia Tutajwan ken Teut

22 ini tet niktalijtuk ken teelnamiktilijka

muchiwas ikal Teut

wan muchi tay tinechmaka

nimetzmakas n' imajtaktakutun.

32. Yakob chuluj ka ichan Laban (27:46 - 28:9)

Yakob chuluj ka ichan Laban

46 REBEKA kilwij Itzak:

—Nikujkutia wan ne siwatket pal Jet, hasta te nikmati taika niyultuk! Su Yakob yu-munamiktia iwan se siwat pal ne Jettekat ken ne sijsiwapipil pal ini tal, tea nikneki niyultuk.

28

1 Itzak kinutzki Yakob. Kiteuchij wan kituktij, ina:

—Maka shimunamikti iwan se siwat Kanaantekat. 2 Shu ka Padan-Aram ichan Betuel ne iteku ne munan. Shimunamikti ka ne iwan se isiwapiltzin Laban ne iechkaw ne munan. 3 El-Shaday metzteuchiwas, kichiwas ma shiktali mutakil wan ma shimuchiwa miak. Timuchiwas se sennemit pal nacionmet. 4 Metzmakas ne ibendicion Abraham taja wan ne mupilawan muwan, pal timuchiwa itekuyu ne tal kan timuchantia, ne Teut kimakak Abraham.

5 Itzak kitujtukak Yakob wan yajki ka Padan-Aram ichan Laban ne ikunew Betuel ne Aramtekat, ne iechkaw Rebeka ne innan Yakob wan Esaw. 6 Kwak Esaw kitak ka Itzak kiteuchij Yakob, wan kwak kiteuchij kititanij ka Padan-Aram pal munamiktia iwan se pal uni tal, wan kituktij ma inte munamikti iwan se pal ne Kanaantekat, 7 wan Yakob kintakamatki ne iteku wan ne inan wan yajki Padan-Aram, 8 Esaw kimatki ka Itzak ne iteku inte kita yek ne siwatket ipal Kanaan 9 wan yajki Esaw itech Ishmael, wan munamiktij nusan iwan Majalat ne ikunew Ishmael ne ikunew Abraham, ne ieltiw Nebayot, wan kikwij iwan ne uksejse isijsiwawan.