76: Ne imikilis Yosep (50:22-26)

Ne imikilis Yosep

22 MUCHANTIJ Yosep tik Egipto iwan ne imiakwan ne iteku. Yosep nakak yultuk sentzunti-majtakti shiwit. 23 Kinhishmatki ne iishwiwan Epraim. Nusan ne ipilawan Makir, ne ikunew Menashe, nesket ijpak ne imetzpan Yosep.

24 Yosep kinhilwij ne iechkawan:

—Mal niu-nimiki, ne Teut yu-metzinpalewia. Yu-metzinhishtia tik ini tal pal metzinwika hasta ne tal ne kichiwilij prometer Abraham, Itzak wan Yakob.

25 Yosep kintajtan ma kichiwakan prometer ne ipilawan Israel, inak:

—Kwak yu-metzinpalewia ne Teut, shiktejkultikan ne nuujumiu ka Kanaan.

26 Yosep mikik iwan sentzunti-majtakti shiwit. Kiekchijket ne imikini ken kichiwat katka ka né wan kitalijket tik se cajajyu tik Egipto.

75: Yosep kinpupulwij ne iechkawan (50:14-21)

Yosep kinpupulwij ne iechkawan

14 MUKWEPKI Yosep ka Egipto iwan ne iechkawan wan muchi ne yajtiwit iwan kitalpachuat ne iteku, kwak tamiket kitukat. 15 Majmawket ne iechkawan Yosep ika miktuya ne inteku. Inaket:

—Wan su techishijiaskia Yosep wan su techkwepiliskia muchi ne inteyek tay tikchiwilijtiwit?

16 Yajika kituktijket itech Yosep wan inaket:

—Ne muteku tatuktij achtu ka mikik, inak: 17 Shikilwikan Yosep, nimetztajtani ma shikinpupulwi ne muechkawan wan tay ne kichijket tay inte yek, ika metzchiwilijket tay inte yek. Yajika nimetztajtani ma shikpupulwi tay kichijket ne itejtekitini ne Teut ipal ne muteku.

Chukak Yosep kwak kinnutzket ijkiuni. 18 Nusan ne iechkawan yajket mutankwaketzat iishpan wan inaket:

—Tejemet timuchiwasket mutejtekitini.

19 Yosep kinhilwij:

—Maka shimajmawikan, ka naja inte ninemi ipatka Teut. 20 Melka anmejemet anyultaketzket nupanpa se tay inte yek, ne Teut yultaketzki ipal yek, pal kiane ashkan weli muchiwa ma yujyultuk miak tukniwan. 21 Ashan maka shimajmawikan. Niu-nimetzintekipanua, wan ne anmukukunew.

Ijkiuni kipaktij ne inyujyulu.

74: Mikik Yakob wan kitalpachujket (49:28 - 50:13)

[73. “Tay inak Yakob inpanpa ne ipilawan”, 49:1-28a, inteuk mupatatuk.]

Mikik Yakob wan kitalpachujket

28 YAKOB kinteuchij wan kinmakak sejse iteteuchiwalis. 29 Yaja kintuktij, inak:

—Naja niaw nimusentepewa iwan nukniwan. Shinechtukakan kan nemit nutejteku tik ne ustut nemi tik ne imil Epron ne Jettekat, 30 tik ne ustut tik ne mil ipal Makpela ne nemi nepa Mamre tik Kanaan ne kikuilij Abraham iwan ne mil Epron ne Jettekat pal mutalpachuat. 31 Ka né kitukaket Abraham wan Sara ne isiwaw. Ka né kitukaket Itzak wan Rebeka ne isiwaw. Wan ka né niktukak Lea. 32 Mukujki ne mil wan ne ustut ijtik yaja itech ne Jettekat.

33 Kwak Yakob tamik kintuktia ne ipilawan, kitepew ijikshi tik ne tapech. Sewik wan musentepew itech ne ikniwan.

50

1 Yosep mutamutak ijpak ne iishkalyu ne iteku. Chukak ijpak, wan kitennamik. 2 Kintuktij ne tapajtianimet ne ipal tekitit ma kiekchiwakan ne mikini. Ne tapajtianimet kiekchijket Israel ken kichiwat katka tik Egipto pal mutalpachua. 3 Panuket unpual tunal ika yejemet ne tujtunal ishtunat pal muchiwa kiane. Egipto chukak ipanpa Israel ijtik yeshpual-majtakti tunal. 4 Panuket ne yeshpual-majtakti tunal wan Yosep taketzki iwan ne ikal ne Parao, inak:

—Nimetzintajtani ma shikilwikan Parao kiane: 5 Ne nuteku kinekik ma nikchiwa jurar, inak, Naja nimiki. Tik ne shaput nikekchijki tik ne tal pal Kanaan, ka unkan shinechtuka. Yajika, ashan niasneki Kanaan niktuka ne nuteku, san nalmukwepas.

6 Inak Parao:

—Shiawa shiktuka ne muteku ken tikchijki jurar.

7 Tejkuk Yosep tik Kanaan kituka ne iteku. Yajket iwan muchi ne itejtekitini Parao ne wejwey ipal ne ikal wan muchi ne wejweymet ipal Egipto, 8 wan muchi ne inmiakwan Yosep wan ne iechkawan wan ne imiakwan ne iteku. Semaya ne inkukunetzitzin, wan ne ijichkatal wan ne wajwakashtal kinhajkawket tik ne tal ipal Goshen. 9 Nusan yajket iwan cajcarroj wan takamet pak cajcaballoj. Sujsul mijmiak ne senyajket. 10 Kwak ajsiket hasta Goren-Haatad, ne nemi sentapal ne Yarden, muchi nakaket ka né chukat wey tetekia. Tipan kichijki eknelilis ijtik chikume tunal. 11 Ne chanejket pal ne tal ipal Kanaan kitaket ne eknelilis tik Goren-Haatad, wan inaket:

—Ini se wey eknelilis kipiat ne Egiptojtekat.

Yajika muilwia kan nemituyat Abel-Mitzraim, nepa sentapal ne apan Yarden. 12 Ne ipilawan kichijket ken yaja kintuktijtuya. 13 Ne ipilawan kiwikaket ka Kanaan wan kitukaket tik ne ustut ipal ne mil pal Makpela ne kikujki Abraham iwan ne mil pal kipia kan mutalpachuat itech Epron ne Jettekat nepa Mamre.

72: Yakob kinteuchij Epraim wan Menashe (48:1-22)

[Read English translation]

Yakob kinteuchij Epraim wan Menashe

48

1 TIPAN kilwijket Yosep ka ne iteku kukuya. Kinkwij ne ume ipilawan iwan, Menashe wan Epraim. 2 Kilwij Yakob:

—Naja nimukunew Yosep, niwalajtuk mutech.

Muchijki Israel tajpaltik wan mutalij muetztuk ijpak ne tapech. 3 Yakob kilwij Yosep:

El-Shaday kiski nuishpan

tik Luz tik ne tal ipal Kanaan

wan nechteuchij 4 wan nechilwij:

naja niu-nimetzmaka mutakil

niu-nimetzmiakchiwa

niu-nimetzkwepa se sennemit pal nacionmet

5 ashkan tel ne ume mupilawan

ne tikpishki tik ne tal ipal Egipto

achtu ka niajsik tik Egipto

yejemet nupal, Epraim wan Menashe,

ken Reuben wan Shimon nusan nupal

6 mupilawan tikpishki inhipan

yejemet mupal

yawit munutzat n' itukay n' iechkawan

wan kipiasket tay inpal inhipan

7 kwak niwalaj Padan

mikik nusiwaw Rajel tik Kanaan

tik ne ujti kwak chiupi kinekiuk

pal tiajsit Eprat

wan ikuni niktukak

tik ne ujti ipal Eprat

tik Bet-Lejem

8 Israel kinhitak ne ipilawan Yosep wan inak:

—Ká yejemet?

9 Yosep kilwij ne iteku:

—Yejemet ne nupilawan ne nechmakatuk ne Teut ka nikan.

Inak:

—Shalinwika nutech.

Kinteuchij. 10 Ne iijish Israel mutakimilijtiwit ika chulet, intea welituya tachia. Kintzinkishtij itech, kintennamik, kinnapaluj. 11 Israel kilwij Yosep:

—Inte nitejchia katka nimukwepa nimetzita, melka uni ne Teut nechajkawtuk nimetzita wan ne mupilawan nusan.

12 Yosep kinhishtij itech ne itejtewajka. Yaja mutankwaketzki iwan ne ishkalyu talchi.

13 Yosep kinkwij ne inhumeshtin: Epraim tik ne imayekkan, kineki ina ka ukse ladoj ipal Israel, wan Menashe tik ne ukse imey, ka iyekkan Israel. Kalinwikak itech. 14 Israel kimelawki ne imayekkan wan kitalij ijpak ne itzuntekun Epraim, yaja ne chikitik, wan ne ukse imey ijpak ne itzuntekun Menashe. Ijkiuni kitalij ne ijimey pajpatilujtuk, ka Menashe ne achtu. 15 Kiteuchij Yosep, wan inak:

Teut ne nejnenket tik intachialis nutejteku

Abraham wan Itzak

Teut ne nechtajpishtuk senpa

hasta ini tunal

16 ne tanawatiani ne nechmakishtia itech muchi tay inteyek

ma kinteuchiwa ne piltzitzinmet

ma munutza itech yejemet ne nutukay wan ne intukay nutejteku Abraham wan Itzak

wan ma mukwepakan sujsul miak ne inpilawan ijtik ne tal

17 Kwak Yosep kitak ka ne iteku kitalijtuya ne imayekkan ijpak ne itzuntekun Epraim, kimatki ka mumamalijtuk. Kitzkij ne imey ne iteku pal kishtia ijpak ne itzuntekun Epraim wan kitalia ijpak ne itzuntekun Menashe. 18 Yosep kilwij ne iteku:

—Inte ijkiuni, nuteku, ka yajini ne achtu, shiktali ne mumey ijpak ne itzuntekun.

19 Ne iteku inte kinekik. Inak:

—Nikmati, nukunew, nikmati. Yaja nusan yu-mukwepa se chinamit wan nusan yu-weytia. Melka uni, ne chikitik yu-mukwepa mas wey wan ne ipilawan yu-muchiwat miak techan.

20 Kinteuchij tik uni tunal. Inak:

—Mutech teteuchiwas Israel, yu-ina: Ma metztali ne Teut ken Epraim wan ken Menashe.

Kitalij Epraim achtu ka Menashe.

21 Israel kilwij Yosep:

—Naja niu-nimiki. Yu-nemi ne Teut anmuwan. Yaja mukwepas metzinwika tik ne intal ne anmutejteku. 22 Naja nimetzmaka Shekem, ken se ijpak ne muechkawan, ka nikishtilij ne Emortekat iwan nutepus wan numit.

71: Yakob kitajtan Yosep ma kitalpachu tik Kanaan (47:28-31)

··// NEMIK YULTUK

Yakob kitajtan Yosep ma kitalpachu tik Kanaan

28 YAKOB nemik yultuk tik Egipto kashtul-ume shiwit. Yakob ajsik kipia sentzunti-unpual-chikume shiwit. 29 Kwak ajsiket yajket ne tujtunal pal miki Israel, yaja kinutzki Yosep ne ikunew wan kilwij:

Su tikneki timuwika yek nuwan

shiktali ne mumey itan numetzkuyu

wan shikchiwa ini tay nimetztajtani:

maka shinechtalpachu tik Egipto

30 kwak niu-nimuteka inwan nutejteku

shinechilwi ka tinechishtis Egipto

wan tinechtukas tik ne inshapu.

Inak:

—Naja nikchiwas tay tinechilwijtuk.

31 Inak:

—Shinechchiwili jurar.

Wan kichiwki jurar. Israel muishpiluj pak itzuntekun ne tapech.

70: Ne itatekimakalis Yosep (47:13-27)

Ne itatekimakalis Yosep

13 TAMAL inte kanaj nujme Egipto ika uij katka ne mayan tetekia. Kwajkwaluk ne tal ipal Egipto wan ne tal ipal Kanaan ipanpa ne mayan. 14 Yosep kitepew muchi ne tumin nemituya tik Egipto wan tik Kanaan ipatka ne tawial ne kikujket. Yosep kalwikak ne tumin ichan Parao. 15 Tamik ne tumin tik Egipto wan Kanaan. Muchi Egipto ajsik itech Yosep ina:

—Shitechmaka tutamal, ka su inte, tiu-timikit tik mutachialis ika tamik ne tutumin.

16 Inak Yosep:

—Shinechmakakan ne takwalmet, wan niu-nimetzinmaka ipatka ne takwalmet ankipiat asu tamik ne tumin.

17 Kalwikaket ne takwalmet kipiatuyat itech Yosep. Yosep kinmakak intamal ipatka cajcaballoj, ipatka ijichkatal wan wajwakashtal, wan ipatka bujburroj. Kinpalewij iwan tajtamal ipatka muchi ne takwalmet kipiatuyat tik uni shiwit.

18 Tamik uni shiwit. Ajsiket itech tik ne ukse shiwit, kilwijket:

—Inte tiwelit tikinayat mutech ka ken tamik titemakat muwan ne tumin wan ne takwalmet, intea naka tatka pal timetzmakat sunte tejemetsan wan ne tutal. 19 Su inte, tiu-timikit tik mutachialis tejemet wan ne tutal. Shitechkua tejemet wan ne tutal ipatka tutamal pal kiane tiu-tiyujyultuk tejemet wan ne tutal ken itejtekitini Parao. Shitechmaka tawial ma tiyujyultuk pal ma inte tiu-timikit wan pal ne tal ma inte yu-naka isel.

20 Yosep kikujki muchi ne tajtal ipal Egipto ipal Parao, ika ne Egiptojtekat kinamakaket sejse itajtal, ika sujsul mayanket. Muchi ne tal muchijki ipal Parao, 21 wan ne tukniwan kalinwikak ijtik ne tejtechan nujme Egipto. 22 Semaya ne intal ne pajpalejmet inte kikujki, ika yaja inpatiw ne palejmet ne Parao kintashtawtuya, wan ne palejmet kikwajket ne inpatiw ne Parao kinmakatuk, yajika inte kikujki ne intajtal. 23 Yosep kinhilwij ne tukniwan:

—Ashan nimetzinkujtuk wan nikujtuk ne anmutajtal ipal Parao. Shikpiakan ish pal ankitukat ne mil, 24 wan kwak anyu-tapishkat shikmakakan se makwiltakutun Parao, wan ne uksejse nawi takutun anmupal pal ankitukat ne mil, pal antakwat wan pal takwat ne anmumiakwan wan pal takwat ne anmukukunew.

25 Inaket:

—Panpadiush ika titechtajpishtuk yujyultuk. Tiu-timuchiwat itejtekitini Parao.

26 Yosep kitalij se tajtuli nemi hasta ne tunal pal ashan ina ka ipal ne mijmil ipal Egipto se makwiltakutun yawi ipal Parao. Semaya ne imil ne pajpalejmet isel inte yawi ipal Parao.

27 Israel muchantij tik Egipto, tik ne tal ipal Goshen, wan kichijki ne ikal ka ne, wan tajtakiltalijket wan mumiakchijket sea.

69: Ne ipilawan Israel tik Egipto (47:1-12)

Ne ipilawan Israel tik Egipto

47

1 YOSEP ajsik kilwia Parao, inak:

—Ne nuteku, ne nuechkawan, ne inhichkatal, ne inwakashtal wan muchi ne inmiakwan walajtiwit Kanaan wan ajsitiwita tik ne tal ipal Goshen.

2 Yosep kinhishpejpen makwil pal ne iechkawan wan kinhishpanuj iishpan Parao. 3 Parao kintajtanilij ne iechkawan:

—Tay anmutekiw?

Kilwijket Parao:

—Nitajpia takwalmet, muchi tejemet kenhaya wan nusan tutejteku.

4 Kilwijket Parao:

—Pal tinakat tik ini tal tiwalajtiwit, ika inte kanaj sakatal ipal ne takwalmet tikpiat ipanpa ne mayan uij tik ne tal ipal Kanaan. Yajika timetztajtanit ma timuchantikan tik ne tal ipal Goshen.

5 Kwakuni Parao kilwij Yosep:

—Ne muteku wan ne muechkawan walajtiwita. 6 Muishpan nemi ne tal ipal Egipto: ne yek tal shikmaka ne muteku wan ne muechkawan, ma muchantikan tik ne tal ipal Goshen, wan su tikmati ka sejse yejemet welit, shikintali tatuktiat ijpak ne takwalmet nikpia.

7 Ajsik Yosep itech Yakob ne iteku wan kitalij iishpan Parao. Yakob kiteuchij Parao. 8 Parao kitajtanilij Yakob:

—Keski shiwit tikpia?

9 Yakob kilwij Parao:

—Nikpia tik ne tal sentzunti-senpual-majtakti shiwit. Chiujchiupi wan ujuij muchijtiwit, wan te ajsit ne shijshiwit kipishket ne nutejteku kwak nemiket tik ne tal.

10 Yakob kiteuchij Parao wan yajki.

11 Yosep kichantilij ne iteku wan ne iechkawan wan kinmakak yejyek tal tik Egipto, tik ne taltakutun ipal Rameses, ken kituktijtuya Parao. 12 Yosep kitekipanuj ne iteku wan ne iechkawan wan muchi ne imiakwan ne iteku pal muchi kipiat ne intamal hasta ne mas chijchikitik.

68: Ajsiket (46:28-34)

Ajsiket

28 YAKOB kituktij Yuda ka iishpan itech Yosep pal munamikit tik ne tal ipal Goshen, wan yajket Goshen. 29 Yosep kilpij ne caballojmet itech ne icarroj wan yajki kinamiki ne iteku tik Goshen. Kwak nemik iishpan, kinapaluj, chukak sujsul. 30 Israel kilwij Yosep:

—Ashan niwelia nimiki ika nimetzitztuk wan nikmati ka tiyultuk!

31 Yosep kinhilwij ne iechkawan wan ne imiakwan ne iteku:

—Niawa nikilwia Parao ka ne nuechkawan wan ne imiakwan ne nuteku nemituya tik Kanaan walajtiwita. 32 Ne takamet ichkatajpianimet ika kipishtiwit takwalmet. Kalwikatiwit ne ichkamet wan ne wakashmet wan much tay kipiat. 33 Yajika kwak Parao yu-metzinnutza wan metzintajtanilia tay anmutekiw, 34 shikilwikan ka ankipishtiwit takwalmet kwak pijpipiltzitzin wan hasta ashkan, tejemet wan ne tutejteku kenhaya. Ijkiuni welisket annakat tik Goshen ika ijijyak muchi ne ijichkatajpianimet inpal ne Egiptojtekat.

67: Yakob wan ne ipilawan yajket Egipto (46:1-27)

Yakob wan ne ipilawan yajket Egipto

46

1 KISKI Israel iwan muchi ipalwan wan ajsik Beer-Sheba. Kichijki tejtetakulis ipal ne Teut ipal ne iteku, Itzak. 2 Ne Teut kilwij Israel tik se tachialis ka tayua, inak:

—Yakob! Yakob!

Inak:

—Nikan ninemi.

3 Inak:

Naja ni El, ne Teut pal ne muteku.

Ma inte metzishmuti ma shu ka Egipto

ika niu-nimetzkwepa se techan wey unkan.

4 Naja niu-nitemu muwan ka Egipto

wan naja niu-nimetztejkultia nusan,

wan n' imey Yosep yu-metzishtzakwa.

5 Muketzki Yakob pal kisa Beer-Sheba. Ne ipilawan Israel kiajkukijket Yakob ne inteku, ne inkukunew wan ne isiwawan tik ne cajcarretaj ne kituktijtuya Parao pal kisajsakat. 6 Kikwijket ne takwalmet wan muchi ne inpalwan kiantuyat tik ne tal pal Kanaan wan yajket Egipto Yakob wan muchi ne ipilawan. 7 Ne ikukunew wan ne ipilawan ne ikukunew, ne isijsiwakunew wan ne isijsiwakunew ne ikukunew, wan muchi ne imiakwan kalinwikak ka Egipto, 8 wan ini ne intujtukay ne ipilawan Israel ne ajsiket Egipto, Yakob wan ne ipilawan:

ne iachtu Yakob Reuben

9 ne ipilawan Reuben Janok, Palu, Jetzron wan Karmi

10 ne ipilawan Shimon Yemuel, Yamin, Ohad, Yakin, Tzojar wan Shaul ikunew ne siwat Kanaantekat

11 ne ipilawan Lewi Gershon, Kehat wan Merari

12 ne ipilawan Yuda Er, Onan, Shela, Peretz wan Zera

mikiket Er wan Onan tik Kanaan

ne ipilawan Peretz Jetzron wan Jamul

13 ne ipilawan Ishakar Tola, Puwa, Yob wan Shimron

14 ne ipilawan Zebulun Sered, Elon wan Yajleel

15 ini ne ipilawan Lea ne kipunilij Yakob tik Padan-Aram, iwan Dina ne isiwakunew

muchi yejemet

ne takamet wan ne siwatket

senpual-majtakti-yey

16 ne ipilawan Gad Tzipyon wan Jagi, Shuni wan Etzbon, Eri, Arodi wan Areli

17 ne ipilawan Asher Imna, Ishwa, Ishwi wan Beriya, wan Sera ne inheltiw

ne ipilawan Beriya Jeber wan Malkiel

18 ini ne ipilawan Zilpa ne Laban kimakak Lea ne isiwakunew wan kipunilij yajini Yakob: yejemet kashtul-se

19 ne ipilawan Rajel ne isiwaw Yakob Yosep wan Benyamin

20 Yosep kipishki tik Egipto iwan Asenat

ne ikunew Poti-Pera ne palej ipal On

Menashe wan Epraim

21 ne ipilawan Benyamin Bela, Beker, Ashbel, Gera, Naaman, Eji, Rosh-Mupim, Jupim wan Ard

22 ini ne ipilawan Rajel ne kipishki Yakob

muchi yejemet majtakti-nawi

23 ne ipilawan Dan Jushim

24 ne ipilawan Naptali Yajtzeel, Guni, Yetzer wan Shilem

25 ini ne ipilawan Bilha ne Laban kimakak Rajel ne isiwakunew wan kipunilij yajini Yakob: muchi yejemet chikume

26 muchi ne takamet wan siwatket ajsiket iwan Yakob ka Egipto

ne kisket itech ne iweyka Yakob

muchi asunte ne isiwawan ne ipilawan Yakob

muchi yejemet yeshpual-chikwasen

27 wan ne ipilawan Yosep ne kinpishki tik Egipto yejemet ume

kiane tel, ne walajket itech ne ikal Yakob tik Egipto

yeshpual-majtakti

66: Parao kalinnutzki ne iteku wan ne imiakwan Yosep (45:16-28)

Parao kalinnutzki ne iteku wan ne imiakwan Yosep

16 NE yankwik ka walajtiwit ne iechkawan Yosep mukakik ichan Parao. Ne Parao kitak yek wan ne itejtekitini nusan. 17 Parao kilwij Yosep:

—shikinhilwi ne muechkawan: ini shikchiwakan

shiktakimiltikan ne takwalmet wan shumet Kanaan

18 shalkwikan anmuteku wan anmumiakwan, shiwikikan nikan

nimetzinmakasket ne mas yek ipal Egipto wan ankikwasket ne itumakka ne tal

19 shikinhilwi: ini shikchiwakan, shikwikan tik Egipto cajcarretaj

ipal anmusiwawan, anmukukunew wan pal ankalwikat anmuteku wan shiwikikan

20 maka shalwikakan muchi tay anmupal

ika ankipiasket muchi ne yek ipal Egipto

21 Kichijket ijkiuni ne ipilawan Israel. Yosep kinmakak cajcaretaj ken tatuktij Parao, wan kinmakak takwal ipal ne ujti. 22 Kinmakak muchi yejemet inkwajkwach yankwik, wan kimakak Benyamin yey tzunti tumin wan makwil wipil. 23 Wan ini tay kititanij ipal ne iteku: majtakti burroj kisajsakat muchi tay yek ipal Egipto, wan majtakti siwaburroj kiwikat tawial, tajtamal wan takwal ipal ne iteku ipal ne ujti.

24 Kintujtukak ne iechkawan wan yajket, wan kinhilwij:

—Ma inte metzinkukua tik ne ujti.

25 Kisket Egipto wan ajsiket Kanaan wan ichan Yakob ne inteku. 26 Kilwijket:

—Kenhayuk Yosep yultuk wan yaja ne tatuktia tik muchi Egipto.

Ishpuyawik ne iyulu Yakob, inte kimatki tay inat nemit. 27 Kwak kilwijket muchi tay Yosep kinhilwijtuya, wan yaja kitak ne cajcarretaj ne kititanij Yosep pal kalsajsakat, pejki muyulkwepa ne iyulu Yakob ne inteku 28 wan inak Israel:

—Ini wey ka kenhayuk Yosep nukunew yultuk. Niasneki nikita achtu ma niu-nimiki.

65: Muneshtij Yosep (45:1-15)

[Read English translation]

Muneshtij Yosep

45

1 YOSEP tea welituya mutalia yek inhishpan ne itakawan wan kintuktij muchi ma kiajkawakan isel. Kwak inte nemituya nian se iwan, muneshtij Yosep inhishpan ne iechkawan. 2 Yaja chukak sujsul ken weliket kikakit muchi ne Egiptojtekat wan hasta ichan Parao kikakket chuka. 3 Yosep kinhilwij ne iechkawan:

—Naja ni Yosep!! Kenhayuk nuteku yultuk?

Ne iechkawan inte weliket kinankiliat tatka ika muishmutijket iishpan. 4 Yosep kinhilwij ne iechkawan:

—Shiwikikan nutech!

Tzinkisket itech, wan kinhilwij:

—Naja ni Yosep ne anmuikaw ne annechnamakaket ka Egipto! 5 Ashkan maka shikakasiwikan. Ma inte metzinkuku anmuyulu ika annechnamakaket wan annechtuktijket ka nikan, ika pal tiwelit tiyujyultuk nechtitanij ne Teut ka anmuishpan. 6 Ashan ume shiwit pejki ne mayan tik ne tal wan kineki uk makwil shiwit keman inte kanaj talichkwal nian tapishkal. 7 Nechtitanijtuk ne Teut anmuishpan pal kiane inte anyawit puliwit tik ne tal, pal welit anchuluat wan anyujyultuk. 8 Ijkiuni tel, inte anmejemet anwalnechtitanijtiwit ka nikan asunte ne Teut. Nechtalij ken se iteku ipal Parao, se tajtzin ipal muchi ne ikal wan se tatuktiani ipal muchi ne tal pal Egipto! 9 Shijisiwikan shumet itech nuteku ankilwiat, ini tay inatuk ne mukunew Yosep: Ne Teut nechtalijtuk ken itekuyu muchi Egipto: shiwi nikan, maka shishtuna, 10 wan annakasket tik ne tal pal Goshen wan tiu-tinemi nunawak, wan ne mupilawan wan ne muishwiwan, iwan ne muichkatal wan muwakashtal wan muchi tay tikpia. 11 Niu-nimetztekipanua ka né, ika kineki uk makwil shiwit, pal te yu-panu tatka muwan wan ne mukal wan muchi tay tikpia. 12 Ne anmuijish kitat, wan ne ijish Benyamin, ka ne nuten ne metzinnutza. 13 Shikilwikan nuteku keski nikpia tik Egipto wan muchi tay ankitztiwit, wan shalwikakan nuteku ka nikan talul!

14 Kinapaluj Benyamin ne iikaw wan chukak, wan Benyamin nusan chukak. 15 Kintennamik muchi ne iechkawan wan chukak inwan. Kwakuni pejket tajtaketzat.

64: Yuda mutajtawelij iwan Yosep (44:18-34)

·// TZINKISKI

Yuda mutajtawelij iwan Yosep

18 TZINKISKI Yuda itech wan inak:

—Tajtzin, niknekiskia nimetzilwia se

su tinechajkawa wan te tikwalani

ika taja ken se Parao

19 taja titechtajtanilij, tinak:

Ankipiat anmuteku?

Ankipiat anmuikaw?

20 wan timetzilwijket:

Tikpiat se tuteku chulet

wan se piltzin kipishki kwak chulet, sea chikitik

n' iechkaw mikik

san yaja naka isel ipal n' inan

wan n' iteku kitasujta.

21 titechilwij:

Shalwikakan nutech ma nikita.

22 timetzilwijket:

Ne piltzin inte weli kiajkawa n' iteku

su kiajkawa, yaja yu-miki.

23 taja titechilwij:

Su inte witz ne anmuikaw anmuwan

inte anmukwepasket annechitat.

24 tiajket itech tuteku

wan tikilwijket tay tinak

25 inak tuteku:

Shumet senpa shalwikakan chiupi tawial tupal.

26 tinaket:

Inte welit tiawit

su nemi tuikaw tuwan tiasnekit

ka inte welit tikitat ne takat

su ne tuikaw inte nemi tuwan.

27 wan techilwij tuteku:

Anmejemet ankimatit

ka ume kunet nechpunilij nusiwaw

28 nechajkaw se wan ninak

se tekwani kikwaj

wan tea keman nikitak

29 annechishtiliat yajini nusan

wan panu se inteyek iwan

wan anyu-titaniat ini nutzunhistak

ka Miktan iwan yulkukulis.

30 ashan su niajsi itech nuteku

wan te nemi tuwan ne piltzin

ká kipia n' iyulu salujtuk

itech n' iyulu yajane

31 kwak yu-kita ka inte kanaj ne piltzin

yaja yu-miki

niktuktis n' itzunhistak tuteku

ka Miktan ipanpa yulkukulis

32 ika naja nikilwij nuteku

ka niu-ninankilia ipanpa ne piltzin, ninak:

asu inte timukwepat talwikat mutech

niu-ninaka inteyek tik mutachialis pal senpa

33 ashan tel

ma ninaka naja

ipatka ne piltzin ken mutekitini

wan ne piltzin ma yawi inwan n' iechkawan

34 ika ken weli niaw itech nuteku

su ne piltzin inte nemi nuwan

wan niaw nikita ne inteyek

yawi panu iwan nuteku?

63: Kinhejekuj senpa (43:30 - 44:17)

Kinhejekuj senpa

30 MUNELWIJ Yosep ika tatak ne iyulu ipanpa ne iikaw wan kielewij chuka. Kalak tik ne icuartoj wan chukak ka ne. 31 Kwakuni muishpakak wan kiski. Mutalij yek wan inak:

—Shiktalikan ne takwal.

32 Kitalilijket ka ikwaj, yejemet ka inkwaj wan ne Egiptojtekat ne takwat iwan ka inkwaj, ika ne Egiptojtekat inte welituyat sentakwat inwan ne Ebrayujmet ika yaja se ijyak inpal ne Egiptojtekat. 33 Mutalijket iishpan, ne wejweymet iwan ne wejweymet wan ne chijchikitik iwan ne chijchikitik, wan muitaket. 34 Tik itachialis, kintakwaltalilijket muchi. Ne Benyamin kintalilijket makwil wipta mas wey takwal que muchi ne sejseuk. Takwajket wan tawanket iwan.

44

1 Kituktij ne tajpia ne ikal, inak:

—Shiktema ne inkujkushtal ne takamet iwan keski takwal welit kianat, wan shiktali ne itumin sejse tik iten ne ikushtal. 2 Wan ne nucopaj ipal tumin shiktali tik iten ne ikushtal ne chikitik iwan ne tumin pal ne itawial.

Kichijki ken tatuktij Yosep.

3 Kwak tatwik ka tapuyawa, kintujtukak yejemet wan ne inbujburroj. 4 Kisket tik ne techan wan kwak inteuk nemituyat wejka, Yosep kilwij ne tajpia ne ikal:

—Shikisa mutalua inhipan ne takamet, wan kwak tikajsi shikinhilwi: "Taika ankitashtawijtiwit iwan ne inteyek ipatka ne tay yek? 5 Anka inte ankimatit ka uni ne taijtik kan ati ne nutajtzin, wan ijtik yaja tamati ken ijtuk? Tetekia tay ankichijtiwit!

6 Yajki kinhajsi wan kinhilwij ijkiuni. 7 Kilwijket:

—Taika titaketza ijkiuni, tajtzin? Ken ka tiawit tikchiwat tejemet se ijkiuni? 8 Shikitaya. Ne tumin tikajsiket tik iten ne tukujkushtal talwikaket tik Kanaan pal timetzkwepiliat. Ken ka tikichtekiskiat ichan ne mutajtzin nian tumin nian teukwit! 9 Asu tikajsi ka se tejemet kipia uni, ma miki, wan tejemet ma timukwepakan tekitinimet ipal ne tajtzin.

10 Inak:

—Melka nemi yek tay tina, su muajsi ka se kipia, yaja mukwepas nutekitini wan anmejemet ma shumet.

11 Muchi ijisiwket kitemultiat ne inkujkushtal talchi wan kitapujket sejse ikushtal. 12 Yaja kishtemuj, pejki iwan ne wey wan tamik iwan ne chikitik. Ne copaj nemik tik ne ikushtal Benyamin. 13 Mukwachtzajtzayanket. Kiteputzwijket sejse iburroj wan mukwepket tik ne techan. 14 Kalakket Yuda wan ne ikniwan ichan Yosep. Yaja nemituya ka né kenhayuk. Mutamutaket talchi iishpan. 15 Yosep kinhilwij:

—Tay ini ankichijtiwit? Anka inte ankimatit ka se ken naja weli nitamati ken ijtuk?

16 Inak Yuda:

—Tay welit tikilwiat ne tajtzin? Ken welit titanutzat? Ken timupalewisket? Ne Teut kiajsituk ne tuinteyek. Ashan timutejtekitini tejemet wan yajane ne tik ne imey muajsik ne copaj.

17 Inak:

—Ken niaw nikchiwa uni? Yajane ká tik ne imey muajsik ne copaj yu-muchiwa nutekitini. Anmejemet, shumet yek itech anmuteku.

62: Yosep kinamik ne iikaw (43:16-29)

Yosep kinamik ne iikaw

16 YOSEP kitak inwan Benyamin. Kilwij ne takat tajpia ne ikal:

—Shikpanulti ne takamet ka nuchan. Shikajshiti takwal wan shikmana ika yu-takwat nuwan ka tajkutunal.

17 Ne takat kichijki ken Yosep kilwijtuya. Yaja kinpanultij ne takamet tik ne ikal Yosep. 18 Majmawket ne takamet kwak kinpanultijket ichan Yosep. Inaket:

—Yaja ipanpa ne tumin mukwepket kitalia tik ne tukujkushtal achtu, yajika techkalaktijtiwit, pal techishmimiluat wan wetzit tujpak, yawit techitzkiat pal techchiwat tekitinimet, wan yu-kitzkiat ne tubujburroj.

19 Kinamikket ne takat tajpia ne ikal Yosep wan taketzket iwan tik ne tenkal. 20 Inaket:

—Tajtzin, tiwalajket achtu tikuat tawial, 21 wan kwak tiajsiket kan tipanuket ne tayua wan tiktapujket ne tukujkushtal, né nemituya ne itumin sejse tejemet tik ne iten ne ikushtal, wan nikan talwikatiwit pal tikwepat. 22 Nusan talwikat ukse tumin pal tikuat takwal. Inte tikmatit ká kitalij ne tutumin tik ne tukujkushtal.

23 Inak ne takat:

—Maka shimajmawikan, ne Teut anmupal wan ipal ne anmuteku metztalilijtuskia se chalchiwit ijtik ne anmukujkushtal. Ne anmutumin ajsik nutech.

Kishtij Shimon wan kalwikak intech. 24 Kwakuni ne takat kinpanultij ne takamet ichan Yosep. Kinmakak at pal mukshipakat wan kitakwaltij ne burrojmet. 25 Kiekchijket ne tay yawit kitakuliat Yosep kwak witz ka tajkutunal, ika takaktuyat ka yawit sentakwat. 26 Kwak ajsik Yosep ichan, kalkwijket ne tetakulis ne kipiatuyat tik ne kal wan mutankwaketzket talchi. 27 Yaja kintajtanilij ken nemit, wan inak:

—Ken nemi ne anmuteku chulet ne anhinaket. Kenhayuk yultuk?

28 Inaket:

—Nuteku nemi yek padiush, kenhayuk yultuk.

Muishpilujket wan mutankwaketzket. 29 Tachishki wan kitak Benyamin ne iikaw, ne ikunew ne inan. Inak:

—Ini ne anmuikaw chikitik ne annechilwijket?

Wan inak:

—Ma metzpia yek ne Teut, nupiltzin.

61: Mukwepket tik Egipto (43:1-15)

Mukwepket tik Egipto

43

1 NE mayan sujsul tik ne tal, 2 wan kwak tamiket kikwat ne sinti ne kalkwijtuyat tik Egipto, ne inteku kinhilwij:

—Shumet shikuat chiupi takwal tupal.

3 Yuda kilwij:

—Techilwij ne takat: Inte welisket annechitat su inte nemi ne anmuikaw anmuwan. 4 Asu tikajkawas yawi tuwan ne tuikaw tiasnekit wan tikuasket takwal mupal, 5 asu inte tikajkawas inte tiasnekit, ika ne takat techilwij: Inte welisket annechitat su inte nemi ne anmuikaw anmuwan.

6 Inak Israel:

—Taika annechchiwilijket ini? Taika ankineshtilijket ne takat su ankipiat ukse anmuikaw ush inte?

7 Inaket:

—Ika ne takat techtajtan tupanpa wan inpanpa ne tukniwan. Inak, "Ne anmuteku kenhayuk yultuk? Ankipiat se anmuikaw?" Tikneshtilijket tay ne techtajtanilij. Ken tiwelituyat tikmatit ka yawi ina ma tikwikakan ne tuikaw?

8 Yuda kilwij Israel ne iteku:

—Shiktukti ne piltzin nuwan wan ma tiakanha, pal kiane tiwelit tiyujyultuk, su inte tiu-timikit tejemet, taja wan ne tupilawan. 9 Naja niu-ninankilia ipanpa, naja nimetzmakas cuentaj ipal. Su inte nimukwepa nalwika mutech wan te nikishpanua ka nikan, niu-ninaka inteyek tik mutachialis pal senpa. 10 Su inte talishtunatuskiat, ashan ukpa talmukweptuskiata!

11 Israel ne inteku kinhilwij:

—Su ijkiuni tel tay tikchiwasket? Shikwikan ne yek pal ne tal tik ne anmutajtaijtik pal ankitakuliat ne takat: chiupi ushit, chiupi nekti, wan chiupi pal muchi tay tikpiat. 12 Ume wipta ne tumin shikwikakan tik anmumey. Anyawit ankikwepat ne tumin kitalijket tik iten anmukujkushtal; anka yaja mumamalij. 13 Shikwikan ne anmuikaw wan shumet. Shimukwepakan itech ne takat. 14 Tiawit tiktajtanit El-Shaday ma metzinpalewi pal ne takat yu-metzintasujta wan pal yu-kimakishtia ne ukse anmuiknew wan Benyamin. Wan naja su nikpulua ne nukunew, nikpulua tel.

15 Wan kiane, ne takamet kikwijket ini tetakulis, wan ume wipta ne tumin kiwikaket tik inmejmey, wan Benyamin. Kisket, yajket Egipto wan ajsiket iishpan Yosep.

60: Ken Yosep kinhejekuj ne iechkawan (42:15-38)

Ken Yosep kinhejekuj ne iechkawan

15 KWAKUNI Yosep inak:

—Ashan niu-nimetzinhejekua. Nimetzinhilwia ipanpa Parao, semaya anyut-ankisat ka nikan kwak yu-witz ne anmuikaw chikitik nikan. 16 Shiktitanikan se anmejemet ma kalwika ne anmuikaw. Niu-nimetzintentzakwa wan yu-muita asu tejkia tay anhinatiwit, wan su inte, ipanpa Parao ka anmejemet antachianimet!

17 Wan kinkalaktij tik ne tetzakwiluyan tik yey tunal. 18 Yosep kinhilwij kwak panutuyat yey tunal:

—Ini shikchiwakan, wan annakasket yujyultuk, ika ne Teut niktakamati naja: 19 asu anmejmelawak, se anmuechkaw ma mutentzakwa tik ne tetzakwiluyan, wan anmejemet shumet shikwikakan tawial pal ne mayan anmuchan. 20 Wan ne anmuikaw chikitik shalwikakan nutech wan yu-mumati ka tejkia tay anhinatiwit wan te anmikisket.

Wan kichijket kiane. 21 Kwakuni muilwijket:

—Tesu, tejemet tikpiat ne culpaj ipanpa ne tuikaw, kwak tikitaket ne iyulkukulis kwak nemik mutajtawelia tuwan wan te tikchiwilijket casoj, yajika walaj tujpak ini tuyulkukulis.

22 Reuben kinnankilij, inak:

—Yajika nimetzinhilwij, ninak: maka shikchiwilikan tatka ne piltzin. Inte annechchiwilijket casoj wan ashan titashtawiat tinemit ne ipatiw ne iesyu.

23 Yejemet inte kimatit ka Yosep kimati tay inat nemit, ika nemituya se tapatani ijtik yejemet. 24 Muishkwepki kan te welit kitat, wan chukak. Walmukwepki wan kinnutzki. Kikwij se yejemet, Shimon, wan kitentzak ka inhishpan.

25 Yosep tatuktij ma kitemakan ne intajtaijtik iwan tawial, wan ma kinkwepilikan ne intumin muchi, sejse tik ikushtal, wan ma kinmakakan pal takwat tik ne ujti. Wan kiane kichijket. 26 Kitakimiltijket ne burrojmet iwan ne tawial wan yajket.

27 Se yejemet kitapuj ne ikushtal pal kitakwaltia ne iburroj kan nakaket pal panut ne tayua, wan kitak ka né ne itumin tik iten ne ikushtal. 28 Kinhilwij ne iechkawan:

—Mukweptuk ne nutumin. Nikan nemi tik nukushtal!

Kakasiwket wan mumutijket. Muilwijket:

—Ashkan tay techchiwilij ne Teut?

29 Ajsiket itech Yakob, ne inteku, tik ne tal ipal Kanaan. Kineshtilijket muchi tay panuk, inat:

30 —Ne takat tatuktia ka né mutalij takwawak tuwan wan kimati ka tinemituyat titachiat ichtaka uni tal. 31 Tikilwijket ka tejemet timejmelawak, ka inte tiijichtakatachianimet. 32 Majtakti-ume tinemit ne tukniwan, tinaket, tiipilawan sanse tuteku. Se tejemet intea kanaj wan ne chikitik ashan nemi iwan tuteku tik Kanaan, tinaket. 33 Ne takat tatuktia tik uni tal techilwij: Niaw nikita su anmejmelawak. Se anmejemet shikajkawakan nuwan. Shikwikan tay anmunekit pal ne mayan ka anmuchan wan shumet. 34 Kwak ankalwikat ne anmuikaw chikitik, naja niu-nikmati ka inte antachianimet sunte anmejmelawak, wan niu-nitemaka ne anmuiknew wan anwelisket anpashaluat kan ankinekit tik ne tal.

35 Kwak pejket kishtiat muchi ijtik ne inkujkushtal, kiajsiket sejse ichuspaj pal ne tumin tik ne ikushtal, wan kwak kitaket muchi ne intumin ka ne, yejemet wan ne inteku majmawket. 36 Yakob ne inteku kinhilwij:

—Naja annechishtilijtiwit ne nupilawan! Yosep inte kanaj wan Shimon inte kanaj wan Benyamin san ankikwisket. Nujpak wetztuk muchi uni!

37 Reuben kilwij ne iteku:

—Ne ume nupilawan shikmikti su te nimukwepa nalwika. Shikajkawa tik ne numey wan niu-nimetzkwepilia.

38 Inak:

—Inte yu-temu nupiltzin muwan ika ne iechkaw mikika wan yaja isel naka. Su panu se tay inte yek tik ne ujti, tiu-tiktemultia ini chulet hasta ne Miktan ipanpa yulkukulis.