45. Ken ijtuk iwan Dina (34:1-31)

[Read English translation]

Ken ijtuk iwan Dina

34

1 KISKI Dina n' isiwapiltzin Lea

ne kipunilij Yakob

tachia ne siwatket pal ne tal

2 Shekem n' ikunew Jamor ne Jiwitekat

ne tatuktiani pal uni tal

kitak Dina wan kitzkij

senkuchki iwan wan kichijki violar

3 yaja pejki kineki Dina

n' ikunew Yakob

sea kitasujtak

taketzki iwan ne siwapil

4 wan kilwij Jamor n' iteku:

shinechnamikti iwan uni siwapil

5 kwak Yakob takakik ka kisusulwijtiwit Dina n' isiwakunew

n' ipilawan nemituyat iwan ne takwalmet tik kojtan

tejchishki Yakob hasta ma wikikan

6 yajki Jamor n' iteku Shekem

ichan Yakob pal taketza iwan

7 n' ipilawan Yakob walajket ka kojtan kwak takakket

sujsul kwalanket

ika tetekia tay kichiwilijket Israel

ka senkuchki iwan n' isiwapiltzin Yakob -

inte weli muchiwa ijkiuni!

8 Jamor kinnutzki, inak:

Shekem ne nukunew

kitasujta ne anmusiwakunew

shiknamiktikan iwan

9 timunamiktikan tutzalan

shiknamiktikan ne anmusiwapilawan tuwan

wan tiu-tiknamiktiat ne tusiwapilawan anmuwan

10 tutzalan annemisket

ijtik ne tutal anpashalusket

welit anmuchantiat wan ankipiat tajtal

11 Shekem kinhilwij n' iteku wan n' iechkawan Dina:

naja nimetzintajtani -inak-

tay ne annechilwiat niu-nimetzinmaka

12 shinechtajtanikan ma nimetzintakuli wey

wan niu-nimetzinmaka tay annechtajtanit

sema shinechajkawakan nimunamiktia iwan Dina

13 n' ipilawan Yakob kinankilijket Shekem

tanutzket wan kishijshikujket

ika yaja kisusulwijtuya Dina n' inheltiw

14 kinhilwijket:

inte tiwelit tiknamiktiat ne tueltiw

iwan se takat kipia itzuntepul

inte tiwelit tikchiwat uni

ika yaja se pal tishpinawat tupal

15 sema tiwelit timetzinhajkawat

asu ankichiwat ken tejemet

wan anmuyawaltekit muchi ne ukichket

16 kwakuni tiu-tiwelit tiknamiktiat ne tusiwapilawan anmuwan

timunamiktiat inwan ne anmusiwapilawan

timuchantiat anmutzalan

wan timukwepat sanse techan

17 man su inte ankichiwat ken tinat

wan te anmuyawaltekit

su ijkiuni tiu-tikwit ne tusiwapiltzin

wan tiawita

18 Jamor kitak yek tay inaket

wan Shekem n' ikunew nusan

19 ne piltzin inte ishtunak kichiwa uni

ika kielewia n' isiwapiltzin Yakob

wan yaja kipiatuya respetoj ichan n' iteku

20 Jamor wan Shekem ajsiket ne plazaj pal n' intechan

wan kinutzket ne takamet pal n' intechan, inat:

21 ini tukniwan nakat yek tuwan

ma nakakan wan pashalukan tik ini tal

techajsi ne tal pal yejemet nikan nemit

timunamiktikan inwan n' insiwapilawan

wan ma munamiktikan tusiwapilawan inwan

22 sema se techtajtanit ini tukniwan

pal muchantiat tutzalan ken sanse techan

ma yu-muyawaltekit muchi ne ukichket

kenha ken yejemet muyawaltekit

23 shikitakan ne takwalmet

wan muchi n' inpalwan kipiat

welit muchiwat tupal

tinakan ka nemi yek

wan ma muchantikan tutzalan

24 muchi ne nemit tik ne plazaj pal ne techan

kichijket ken inat Jamor wan Shekem n' ipiltzin

muchi ne ukichket kisat ne plazaj

muyawaltekket

25 tik ne tunal yey kwak kinkukua kenhayuk

ume ipilawan Yakob, Shimon wan Lewi

n' iechkawan Dina

kikwijket sejse imachej

kalakket ne techan ijkiunisan

wan kimiktijket muchi ne ukichket

26 kimiktijket tik itan tepusti

Jamor wan Shekem n' ipiltzin

kikwijket Dina tik n' ikal Shekem

wan yajket

27 n' ipilawan Yakob ajsiket itech ne mijmiktuk

wan kitzkijket muchi tay inpal tik ne techan

ne kisusulwijtuya n' inheltiw

28 ne ichkamet, ne wakashmet wan n' inbujburroj

ne nemituya tik techan wan tik kojtan

muchi kikwijket

29 ne tay inpal, ne kukunet wan ne siwatket

kitzkijket senpa

wan muchi tay nemituya tik ne kal

30 Yakob kinhilwij Shimon wan Lewi:

anmupanpa yawit nechishijiat

ijtik ne chanejket pal ini tal

wan ijtik ne Kanaantekat wan ne Periztekat

iwan ne chiupi takat nikpia

su musenputzuat wan nechchaluat

niu-nipuliwi naja wan ne nukal

31 kilwijket: wan tay?

ken se siwapala kikwisket ne tueltiw?

44. Munamikket Yakob wan Esaw (33:1-20)

Munamikket Yakob wan Esaw

33

1 TACHISHKI Yakob wan kitak Esaw witz iwan nawtzunti takat.

Kinkupej ne kukunet ijtik Lea, Rajel wan ne ume criadaj. 2 Kintalij ne criadajmet wan ne inkukunew achtu, Lea wan ne ikukunew tipan, wan Rajel wan Yosep tipan. 3 Yaja panuk inhishpan. Mutankwaketzki talchi chikume wipta hasta ajsik itech ne iechkaw. 4 Esaw yajki mutalua itech. Kinapaluj, kitennamik. Yejemet chukaket.

5 Tachishki wan kinhitak ne siwatket wan ne kukunet. Inak:

—Ká yejemet?

Inak:

—Ini ne kukunet ne nechtakulijtuk ne Teut.

6 Tzinkisket ne criadajmet inwan ne inkukunew wan mutankwaketzket. 7 Tzinkiski nusan Lea inwan ne ikukunew wan mutankwaketzket. Tipan ajsik Yosep iwan Rajel wan mutankwaketzket.

8 Inak:

—Wan ken ijtuk iwan muchi ne takwalmet niknamik muishpan?

Inak:

—Yaja pal nikita su nimetzpaktilia ne muishkalyu, nutajtzin.

9 Inak Esaw:

—Nikpiaya wey, nuikaw. Ne mupal ma naka mupal.

10 Inak Yakob:

—Inte, nimetztajtani ma shikwi ne tay nimetztakulia. Ika nikitztuk ne muishkalyu ken nikitztuskia ne iishkalyu Teut ika tinechitztuk yek. 11 Nimetztajtani ma shikwi ne teteuchiwalis ne nalwika mupal, ika nechpalewijtuk ne Teut wan nikpia muchi tay nimuneki.

Wan kikwij. 12 Inak:

—Tisennejnemikan wan ma niaw munawak.

13 Kilwij:

—Ken tikmati, ne kukunet inte tajtajpaltik. Wan ne ichkamet wan ne wakashmet chichit nemit. Su mupitziniat melka sema se tunal, welit mikit muchi ne takwalmet. 14 Shu taja nuishpan wan naja niasneki nejnejmach ken nejnemit ne takwalmet wan ne kunetal hasta niu-niajsi mutech tik Seir.

15 Inak Esaw:

—Ma nikajkawa muwan sejse pal ne takamet witzet nuwan.

Inak:

—Taika? Nimetztajtani.

16 Kwakuni Esaw mukwepki yawi tik ne ujti ka Seir.

17 Ne Yakob yajki hasta Sukot wan kiketzki se ikal wan shajshajkal pal ne takwalmet kipiatuya. Yajika kan nemik itukay Sukot. 18 Yakob ajsik yek ne techan pal Shekem ne nemi tik ne tal pal Kanaan kwak walaj Padan-Aram. Mukawki tik itachialis ne techan. 19 Kikujki ne takutun tal kan kisujki tawipanti itech ne ipilawan Jamor, ne iteku Shekem, ka sentzunti tumin. 20 Kiketzki ka unkan se tepatznaj. Kinutzki El-Teut-Israel.

43.Yakob pejki munutza Israel (32:23-33)

Yakob pejki munutza Israel

23 YAKOB muketzki ka tayua

kinkwij ne ume isiwawan

wan ne ume icrijcriadaj

wan ne majtakti-se ipilawan

wan kinpanultij tik ne kupanuas ipal Yabok

24 kinwikak wan kinpanultij

sentapal ne achin

kipanultij muchi tay ipal

25 wan nakak Yakob ka ikwaj

wan se musunki iwan hasta tatwik

26 wan kitak ka inte welituya iwan

wan kichaluj n' itzinhumiu

wan kiski ne wajkal pal n' itzinhumiu

kwak musunket

27 inak: shinechchululti ika tanesik

inak: inte niu-nimetzchulultia

su inte tinechteuchiwa

28 kilwij: ken mutukay?

inak: Yakob! 29 inak:

mutukay intea yawi muilwia Yakob

asunte Israel

ika titatuktijtuk iwan teujteut wan iwan takamet

wan tiwelik

30 Yakob kitajtanilij, inak:

shinechilwi ken mutukay

inak: taika tiktajtani ken nutukay?

wan kiteuchij ka ikuni

31 Yakob kinutzki n' itukay kan nemituya Peni-El

ika nikitztuk ne Teut

iishkalyu iishpan nuishkalyu

wan ninaka yultuk!

32 kiski ne tunal ka ijpak

kwak panuk itech Penuel

yajki metzkalapa

tik se metzkuyu

33 yajika ne Israeltekat inte kikwat

ne nakat pak ne tzinhumit

hasta ini tunal

ika muchaluj ne wajkal pal n' itzinhumiu Yakob

42. Tay Yakob kitakulij Esaw (32:4-22)

···/ KINTITANIJ

Tay Yakob kitakulij Esaw

4 KINTITANIJ tanawatianimet ka iishpan

itech Esaw n' iechkaw

tik ne tal pal Seir tik Edom

5 kintuktij, ina:

ijkini shikilwikan nutajtzin Esaw:

ini tay inak ne mutekitini Yakob:

iwan Laban ninakak wan nishtunak hasta ashkan

6 nikpia wakash, burroj wan ichkatal

tekitini wan criadaj

wan nitatuktia pal nimetzneshtilia

ma shinechita yek, nutajtzin

7 mukwepket ne tanawatianimet itech Yakob, inat:

tiajsiket itech ne muechkaw, Esaw

yawi witz mutech iwan nawtzunti takat

8 majmawi Yakob sujsul wan kakasiwik

kintajkuij ne ikniwan iwan

wan ne ichkamet, ne wakashmet wan ne camellojmet

tik ume tajku, 9 inak:

su witz Esaw hasta se kan tinemit wan kichalua

ne seuk yu-weli naka yultuk

10 wan inak Yakob:

Teut ipal nuteku Abraham

wan Teut ipal nuteku Itzak

Tutajwan ne nechilwia

"shimukwepa tik ne mutal kan tinestuk

wan niu-nikchiwa tay yek muwan"

11 sea nichikitik pal muchi tay senpa tikchijtuk nupal

sema iwan se nutupil nipanuk ini apan Yarden

wan ashan nimuchijtuk ume takutun

12 ashan shinechpalewi itech n' imey ne nuechkaw Esaw

ika nimajmawi ka weli witz nechchalua

wan ne tenan wan ne kukunet

13 taja tinak: "naja niaw nikchiwa tay yek muwan

wan niu-niktalia ne mushinach

ken ne ashal ne inte weli mupua ka mijmiak"

14 panuk ka ne muchi ne tayua

kishpejpen ijtik tay witz ka imey

sejse pal kitakulia n' iechkaw

15 cabrajmet ume tzunti wan ukichket senpual

ichkamet ume tzunti wan ukichket senpual

16 chichicamellojmet wan n' inkukunew senpual-majtakti

wakashmet unpual wan ukichket majtakti

burrojmet senpual wan siwaburrojmet majtakti

17 kintalij tik ijimey n' itejtekitini

tik tejtepewa ka inkwaj

wan kinhilwij ne tekitinimet:

shipanukan ka nuishpan

wan shikajkawakan se espacioj

itzalan ne tejtepewa

18 kituktij ne achtu, inak:

kwak metznamiki Esaw ne nuechkaw wan metztajtanilia:

ká ipal taja? kanka tiaw?

ká ipal ini muishpan?

19 tiaw tina: ipal mutekitini Yakob

yaja kituktijtuk pal kitakulia

nutajtzin Esaw

wan yajasan uni witz tuipan

20 kintuktij nusan ne seuk

ne ukseuk wan muchi

ne yasnekit ipan ne tejtepewa, ina:

shitaketzakan kenha anmejemet

iwan Esaw kwak ankinamikit

21 wan shinakan: nusan witz

mutekitini Yakob tuipan

ika yaja muilwij:

ma nikpaktili n' ishkalyu

iwan ne tetakulis ne yawi nuishpan

wan kwakuni kwak nikita n' ishkalyu

anka yu-nechpupulwia

22 panuk ne tetakulis ka iishpan

wan yaja nakak uni tayua ka ikuni

41. Ne sentaketzat ijtik Yakob wan Laban (31:43 - 32:3)

Ne sentaketzat ijtik Yakob wan Laban

43 NANKILIJ Laban wan kilwij Yakob:

ne siwapipil nusiwapilawan

ne pijpiltzitzinmet nuishwiwan

ne ichkatal nuichkatal

muchi tay tikita nupal

nusiwapilawan tay niu-nikinchiwilia ashan

ush ne kukunet kintapunijtiwit?

44 yajika tel, tikajshitikan se sentaketzat

ijtik taja wan naja

pal tejemet tikmatit

45 Yakob kikwij se tet

wan kiajkukij ken teelnamiktilijka

46 Yakob kinhilwij n' ikniwan: shikputzukan tejtet

wan kianket tejtet wan kiketzket se tepetzin

wan takwajket ijpak ne tepetzin

47 Laban kinutzki Yegar Sahaduta

wan Yakob kinutzki Gal Ed

48 inak Laban: ini se pal tikmatit

ijtik naja wan taja tik ini tunal

yajika munutzki Galed

49 wan Mitzpa ika inak:

Tutajwan yu-kipachiwia

ijtik naja wan taja

kwak yu-minaya ne se itech ne seuk

50 su tikinchiwilia tay teyek nusiwapilawan

su timunamiktia iwan uksejse siwat

melka inte aka nemi tuwan

shikita ka ne Teut tachia

ijtik naja wan taja

51 Laban kilwij Yakob:

shikita ini tepetzin

wan ini teelnamiktilijka ne niktalijtuk ijtik naja wan taja

52 ini tepetzin pal tikmatit

wan ne teelnamiktilijka nusan

ma inte niu-nipanu pal niajsi mutech

wan ma inte shu-shipanu pal tiajsi nutech

itech ini tepetzin

nian ini teelnamiktilijka

pal tikchiwat tay teyek

53 ne Teut ipal Abraham

wan ne Teut ipal Najor

ma kichiwakan juzgar

ne teujteut pal n' intejteku

wan Yakob kichijki jurar ipanpa ne mawi pal n'iteku Itzak

54 Yakob kichijki

se tetakulis tik ne tepet

wan kalinnutzki n' ikniwan

ma sentakwakan

wan panuket ne tayua tik ne tepet

32

1 peyna ka tapuyawa Laban

kintennamik n' ishwiwan wan n' isiwapilawan

kinteuchij

wan yajki Laban

wan mukwepki ka ichan

2 wan Yakob yajki tik ne ujti

wan itajtanawatiani ne Teut kinamikket

3 inak Yakob kwak kinhitak:

su ini kan mukawtuk ne Teut!

wan kinutzki n' itukay kan nemituya Majanaim

40. Ne iteujteutzitzin Laban (31:17-42)

[Read English translation]

Ne iteujteutzitzin Laban

17 MUKETZKI Yakob wan kintejkultij

n' ipilawan wan n' isiwawan pak ne cajcamelloj

18 kiwikak muchi ne takwalmet

wan muchi ipalwan

ne kiantuya tik Padan-Aram

pal yawi ichan Itzak n' iteku

tik ne tal pal Kanaan

19 kwak Laban yajtuya kishima n' ichkatal

Rajel kichtek n' iteujteutzin n' iteku

20 Yakob kishijshikuj Laban

ika inte kineshtilij ne Aramtekat

ka yaja yawi chulua

21 chuluj Yakob iwan muchi tay ipal

ajsik ne apan wan panuk sentapal

mutalij tik ne ujti pal ne tepet pal Gilad

22 kilwijket Laban tik ne tunal yey

ka chulujtuya Yakob

23 kinwikak n' ikniwan iwan

wan yajki mutalua iipan

wan ijtik chikume tunal

ajsiket itech

tik ne tepet pal Gilad

24 walaj ne Teut iishpan Laban ne Aramtekat

kwak temikik ka tayua

kilwij: maka shu-shitaketza

iwan Yakob ipanpa tay yek

nian tay teyek

25 muishpanuj Laban

kan nemituya Yakob

Yakob kisujtuya ne tawipanti tik ne tepet

Laban kisujki ne tawipanti iwan n' ikniwan

tik ne tepet pal Gilad

26 Laban kilwij Yakob:

tay tikchijtuk?

tinechshijshikujtuk

wan tikwikatuk ne nusijsiwakunew

ken ijilpituk itan espadaj!

27 taika tichulujtuk ichtaka

wan tinechshijchikujtuk

wan te tinechilwijtuk?

nimetztujtukatuskia iwan pakilis

tatzutzunalis wan takwikalis!

28 inte tinechajkaw

nikintennamiki ne nuijishwiwan

nian ne nusijsiwapilawan

ken se mele

timuwikatuk!

29 niweliskia nimetzchiwilia tay nikneki

melka uni, ne Teut pal anmuteku

ka tayua walaj nechilwia:

maka shitaketza iwan Yakob

ipanpa tay yek nian tay teyek

30 yek nemi, taja tiajkia

ika tikelewia

n' ikal ne muteku

man taika tikichtektuk

ne nuteujteutzitzin?

31 nankilij Yakob

wan kilwij Laban:

ika nimajmawi

ninak pal te tiu-titechishtilia

ne musijsiwapilawan

32 wan ká iwan tiu-tikajsi ne muteujteutzitzin

inte yawi yultuk tik itachialis tukniwan

shu-shikpepeta tay nikpia tay mupal

wan shikwi

Yakob te kimati katka ka Rajel kinhichtektuya

33 kalak Laban ichan Yakob wan ichan Lea

wan inchan ne ume criadaj

ken inte kiajsik tatka

kiski tik n' ikal Lea

wan kalak tik ne tawipanti pal Rajel

34 man Rajel kinkwijtuya ne teujteutzitzin

wan kintalijtuya tik n' imutalijka ne camelloj

wan mutalij inhijpak

Laban kipepetki muchi ne tawipanti

wan te kiajsik

35 yaja kilwij n' iteku: ma inte kwalani nutajtzin

inte niweli nimuketza muishpan

ka ninemi iwan ne tay ipal ne siwatket

wan melka mutatejtemuilij

inte welik kiajsi ne teujteutzin

36 kwalanik Yakob, kiajwak Laban

najnankilij wan pejki kijilwia:

tay nikchijtuk?

tay tikpia nuwan?

taika tikneki tinechitzkia?

37 mal tikpepetki muchi tay nikpia

tay tikajsik tay mupal?

shiktali nikansan

tuishpan muchi

wan ma inakan ká kipia razon!

38 tik ini senpual shiwit ninentuk muwan

nian se ichkat ush cabraj pilshinik

nian se ichkakunet nikwaj

39 nian se ichkat tzuntektuk nalwikak

najasan nimetztashtawij

ne pulijtuk ka tunal wan ka tayua tinechtajtan

40 ka tunal nechkwa tutunka

ka tayua nisekmiki katka

ishpelujtuk te welik nikuchi

41 se pual shiwit ninemik ka muchan

nitekitki majtakti-nawi shiwit

inpanpa ne ume musiwapiltzin

wan chikwasen shiwit ipanpa muichkatal

tikpatak ne nupatiw senpual wipta

42 su inte nikpiaskia nuwan ne Teut pal nuteku

ne Teut pal Abraham, ne mawi ipal Itzak

tinechtujtukatuskia nusel

ne Teut kitztuk nuyulkukulis wan ne itekiw ne nujnumey

wan yalua yaja nechpalewij

39. Yakob tajtaketzki iwan ne isiwawan (30:43 - 31:16)

Yakob tajtaketzki iwan ne isiwawan

43 WEYTIAK ne takat tetekia

kipishki miak takwalmet

crijcriadaj

tekitinimet

cajcamelloj

wan bujburroj

31

1 yaja kinkakik n' ipilawan Laban inat:

Yakob kikwijtuk muchi tay ipal tuteku

wan iwan tay ipal tuteku

kichijtuk muchi ini ipalwan

2 Yakob kitak n' ishkalyu Laban

wan tea nemik iwan ken katka

3 Tutajwan kilwij Yakob:

shimukwepa ichan mutejteku kan tinesik

naja niu-ninemi muwan

4 Yakob kintuktij Rajel wan Lea

ma walajsikan itech

ka kojtan iwan ne takwalmet

5 yaja kinhilwij:

nikita ninemi

n' ishkalyu ne anmuteku

yaja intea nemi

nuwan ken katka

melka ne Teut pal nuteku nemi nuwan

6 ankimatit ka iwan muchi nutajpal

nitekittuk iwan anmuteku

7 man anmuteku nechshijshikuj

kipatak ne nupatiw majtakti wipta

melka uni ne Teut inte kiajkaw

nechchiwilia tatka inteyek

8 su yaja inak: ne tijtilwijtuk ne mupatiw

muchi ne ichkamet kipuniskiat tijtilwijtuk!

wan su inak: ne wajwawasujtuk ne mupatiw

muchi ne ichkamet kipuniskiat wajwawasujtuk!

9 ne Teut kikwij ne takwalmet ipal anmuteku

wan nechmakatuk!

10 tik ne tujtunal pal muteleksat ne takwalmet

niajkutachishki kwak nitemikik

nikitak ka ne ukichket

ne tejkut ijpak ne cabrajtal

wajwawasujtuk, tijtilwijtuk

wan kwijkwikwilujtuk

11 n' itanawatiani ne Teut nechilwij kwak nitemikik:

Yakob! ninak: Nikan ninemi!

12 inak: Shitachia, shikita muchi ne ukichket

ne tejkut ijpak ne cabrajtal

wajwasujtuk, tijtilwijtuk wan kwijkwikwilujtuk

ika nikitztuk muchi tay Laban metzchiwilij

13 naja, ne El, nimuneshtij tik Bet-El

kan tikmawaltij ne teelnamiktilijka

wan tinechchiwilij se promesaj

ashan tel shimuketza

shikisa tik ini tal

shu ne tal kan tinesik

14 nankilij Rajel, wan Lea, wan kilwijket:

taja tay tina? kenhayuk tikpiat

se tutakutun ichan tuteku?

15 anka inte techita ken walejkunimet

technamakak wan nusan

kikwajtuk ne tutumin!

16 muchi ne tumin ne Teut

kishtilijtuk ne tuteku

yaja tupal wan ipal tupilawan

yajika muchi tay ne Teut

metzilwijtuk

shikchiwaya!