Notes | English translation of v1 | v1 | v2 | Prev | Next
·· NOA
Ne wey tepeat
9 INI ne ken ijtuk iwan Noa:
Ini takat Noa se kichiwa tay yek
sujsul yekkaya tik n' itiempoj
Noa nejnenki iwan ne Teut
10 yaja kipishki yey ipalawan
intujtukay Shem, Jam wan Yapet
11 pulijtuya ne taltikpak tik itachialis Teut
temik ne tal iwan muchi tay teyek
12 ne Teut kitak ken wilejtuk ne tal
ujujpulijtiwit muchi ne kipiat
inweyka
13 ne Teut kilwij Noa:
witzaya n' itamilis nutech
ipal muchi ne kipiat inweyka [1]
inpanpa ne taltikpak temik wan teyek
yajika naja niaw nikwilewa ne
taltikpak [2]
14 shu-shikchiwa se takukal
iwan ikwaw kujkuyu goper [3]
shikchiwa sejse pal anmuchantiat [4]
shikmawalti ne kalijtik wan ne
tatenpan iwan breaj
15 ijkini ken niaw nimetzilwia shikchiwa:
ne takukal ma weyak yey-tzunti
imajkul
ma patawak unpual-majtakti imajkul
wan ma kojtik senpual-majtakti
imajkul
16 se tentzin shikchiwa ipal ne takukal
ka se imajkul shiktami ka ikajku
wan itentzakka ne takukal tik iladoj
shiktali
shikchiwa se kan nemit ka itan wan
seuk wan yey [5]
17 naja niaw nalwika se wey tepeat pak ne tal
pal kimiktia muchi itan ne ilwikak
ne kipia kalijtik ejekatzin yultuk
muchi pak ne tal yawi puliwi
18 niaw niketza nusentaketzat muwan
tiaw tikalaki tik ne takukal
taja wan mupijpilawan
wan musiwaw wan n' insijsiwaw ne
mupilawan muwan
19 ipal muchi yultuk, muchi kipia iweyka
ujume ujume tikinkalaktis
pal titajpia yujyultuk muwan tik ne
takukal
ukich wan siwat nemisket
20 pal ne tujtutut sejse ken sejse
pal ne takwalmet sejse ken sejse
ne ujulinit talchi sejse ken sejse
ume ajsisket mutech pal titajpia
yujyultuk
21 nusan shu-shalkwi muchi ne takwal yawi mukwa
shaltepewa pal kiane
tiu-tikwa wan yu-kikwat
22 wan Noa kichijki muchi tay kituktij ne Teut, kiane kichijki
[1]Anka kineki ina ka muchi yawi tami ika ne Teut yawi kitamia muchi.
[2]Ne Teut inte yawi kitamia ne taltikpak ika yaja kineki sute ika ne
tal ne temik iwan ne teyek.
[3]Te tikmatit tay ne kuyu goper.
[4]Nusan te mumati tay kineki ina; inat sejse "iwan habitaciones".
[5]Ini seuk ne te mumati sujsul yek. Anka kineki ina "iwan yey
plantaj."
7 |
1 Tutajwan kilwij Noa:
shikalaki iwan ne mumiakwan tik ne
takukal
ika tajasan nimetzita ka tiyek
ijtik ne tajtakamet ipal ini tiempoj [1]
2 pal muchi ne takwalmet ne welit mukwat [2]
shalkwi chikume chikume, ukichket wan
siwatket
wan pal ne takwalmet ne te welit
mukwat
ujume, ukich wan siwat
3 kenhaya pal ne tujtutut pal ne ejekat
chijchikume, ukichket wan siwatket
pal titajpia yultuk ishinach
nujme ne taltikpak
4 ka ijtik chikume tunal niu-nikchiwa at nujme ne taltikpak
unpual tunal wan unpual tayua
niu-nikwilewa muchi ne nemilis
tay nikchijki ijpak ne taltikpak
5 Noa kichijki muchi
tay Tutajwan kituktij
6 wan Noa kipiatuya chikwasen-tzunti shiwit
kwak muchijki ne tepeat nujme ne
taltikpak
7 kalakket tik ne takukal Noa
wan ipilawan wan isiwaw
wan insiwawan ne ipilawan
pal te atukit tik ne tepeat
8 ne takwalmet welit mukwat
wan ne takwalmet te welit mukwat
wan ne tujtutut
wan muchi ne ujulinit talchi
9 ujume ujume ajsiket itech Noa tik ne takukal
ukich wan siwat
ken Tutajwan kituktij Noa
10 wan kwak panuket chikume tunal
muchijki ne tepeat pak ne tal
11 tik ne shiwit kwak Noa kipiatuya
chikwasen tzunti shiwit ka nestuk
tik ne metzti ume
tik ne tunal kashtul-ume pal ne
metzti
tik ini tunal tapanket muchi ne
ajapunian pal ne miktan wey [3]
ne tzajtzakka pal n' ilwikak tapuiket
[4]
12 wetzki ne at ijpak ne tal
unpual tunal wan unpual tayua
13 uni ne tunal kwak kalakket Noa
wan ipilawan Noa - Shem wan Jam wan
Yapet -
wan n' isiwaw Noa wan ne yey
insijsiwawan n' ipilawan inwan
ijtik ne takukal
14 yejemet wan muchi ne tay yultuk
sejse ken sejse
wan muchi ne takwalmet
sejse ken sejse
wan muchi ne ulininital ujulinit pak
ne tal
sejse ken sejse
wan muchi ne pataninimet
sejse ken sejse
muchi ne tujtutut wan muchi ne
ejtapaltal
15 ajsiket itech Noa
ijtik ne takukal
ujume ujume
muchi ne kipiat iweyka
tay kipia ejekatzin yultuk taijtik
16 wan ne witzet
ukichket wan siwatket
ipal muchi walajket
ken kituktij ne Teut
wan Tutajwan kintentzak kalijtik
17 nakak ne tepeat unpual tunal pak ne tal
kwak weyki ne at kitejkultij ne
takukal
wan muajkukij ijpak ne tal
18 chikawayaket ne ajat wan weyket sujsul pak ne tal
wan nejnenki ne takukal ijpak ne at
19 sujsul chikawayaket ne ajat pak ne tal
wan mutzakket muchi ne kojkojtik
tepet itan n' ilwikak
20 kashtul imajkul ka ikajku tejkuk ne at
wan mutzakket ne tejtepet
21 puliwik muchi tay kipia iweyka
ne ujulini pak ne tal, ne tujtutut, ne
takwalmet
wan muchi yultuk
wan muchi ne kumuninit ne kumunit pak
ne tal
wan muchi ne tajtakamet
22 muchi tay kipia ijtik ne iyak iijiu ejekatzin yultuk
wan muchi tay nemi tik tal mikiket
23 wilewik muchi ne nemilis
nemi ijpak ne taltikpak
takamet takwalmet ulininimet
hasta tujtutut pal ne ejekat
wilejket nujme ne tal
wan semaya nakak Noa
wan ká iwan nemik tik ne takukal
[1]Ina "ipal ini generacion".
[2]Kineki ina ne takwalmet ne te munutzat sujsusulnaj wan yajika ne
Yudayujmet te kikwat.
[3]Tapuik ne tal wan ne at tejkuk ka ikajku pal kitzakwa.
[4]Nusan tapuik ne ilwikak wan ne at temuk pak ne tal.
24 chikawayak ne at pak ne tal
sentzunti-unpual-majtakti tunal
8 |
1 wan ne Teut kielnamik Noa
wan muchi tay yultuk wan ne takwalmet
nemituyat iwan tik ne takukal
wan ne Teut kipanultij se ejekat
nujme ne tal
wan nejmachnemik ne at
2 mutentzakket ne ajapunian pal ne miktan
wan ne tzajtzakka pal ne ilwikak
wan ne at tamik shini
3 wan ne ajat mukwepket yajket ijpak ne tal
ijtik sentzunti-unpual-majtakti tunal
4 wan nakak ne takukal tik ne metzti chikume
tik ne tunal kashtul-ume ipal ne
metzti
ijpak ne tejtepet pal Ararat [1]
5 ne ajat temuket yajket
hasta ne metzti majtakti
tik ne metzti majtakti
tik ne achtu tunal pal ne metzti
muitaket ne itzujtzunpan ne tejtepet
6 wan kwakuni kwak panutiwit unpual tunal
kitapuj Noa n' itentzin ne takukal
kichijtuya
7 kimakishtij ne tiltik tutut
wan pejki yawi wan witz hasta wakik
ne at ijpak ne tal
8 kimakishtij ne wilut
pal kita su kashawik ne at ijpak ne
tal
9 te kiajsik ne wilut kan musewiskia ne ikshitashkal
wan mukwepki itech tik ne takukal
ika nemituya at nujme ne taltikpak
kimelawki n' imey pal kalkwi
wan kalkalaktij ijtik ne takukal
10 tejchishki uk chikume tunal
wan senpa kimakishtij ne wilut
kiski tik ne takukal
11 walaj senpa ne wilut ka teutak
wan yaja kalkwij tik ne iten
se imulinka kuyu olivaj wiwittuk
wan Noa kimatki ka kashawtuya ne at
ijpak ne tal
12 tejchishki uk chikume tunal
wan kwak kimakishtij ne wilut
intea walmukwepki senpa ne wilut
13 tik ne shiwit chikwasen tzunti wan se
tik ne achtu tunal pal ne metzti se
wakik ne at ijpak ne tal
Noa kitapuj ne itzakka ne takukal wan
kitak ka waktuk ne taltikpak
14 tik ne ukse metzti tik ne tunal senpual-chikume ne tal nemia waktuk
15 Ne Teut kinutzki Noa, ina:
16 shikisa tik ne takukal taja wan musiwaw
wan mupilawan wan isijsiwaw mupilawan
17 muchi ne yujyultuk nemit muwan
muchi ne kipiat inweyka
tujtutut tajtakwalmet
wan muchi ne ujulinit pak ne tal
shikishti muwan
ma kumunikan tik ne tal
wan ma kitalikan itajtakil
wan ma muchiwakan mijmiak pak ne tal
18 wan kiski Noa
wan n' ipilawan wan n' isiwaw wan n' insijsiwaw
n' ipilawan
19 muchi ne yujyultuk
muchi ne ulininimet wan muchi ne
pataninimet
muchi tay ujulini pak ne tal
tik infajfamiliaj kisket tik ne
takukal
20 Noa kiketzki se tepatznaj ipal Tutajwan
kikwij ipal muchi ne tajtakwalmet yek
[2]
wan muchi ne pajpataninimet yek
wan kitatij tejtetakulis pak ne
tepatznaj
21 Tutajwan kijnek n' isujyak puputuka
wan muilwij Tutajwan tik iyulu:
tea nimukwepas nikchiwa maldictar
ne taltikpak ipanpa ne takat
ika n' itekiw n' iyulu ne takat inte
yek
kenhaya kwak pewa piltzinkisa
wan te nimukwepas nikchalua
muchi tay yultuk ken ashan nikchijtuk
22 muchi ne tujtunal ipal ne taltikpak
tatukal wan tapishkal
sesek wan tutunka
tunalku wan shupan
tunal wan tayua
intea sewisket
[1]Ne tepet kan nakak ne takukal inte itukay "Ararat", sute
ne tal kan nemit uni tejtepet. Melka inte aka kimati katiawel uni tepet, mumati
nemi tik ne tal ne ashan itukay Armenia.
[2]Ka nikan wan tik ne seuk lineaj, "yek" kineki ina ka weli
mukwa wan nusan weli mutakulia ipal ne Teut.
9 |
1 Ne Teut kiteuchijki Noa wan ipijpilawan
wan kinhilwij:
shitakiltalikan
shimumiakchiwakan
shiktemakan ne taltikpak
2 sujsul wey mawi kipiasket anmupanpa
muchi ne yujyultuk pal ne taltikpak
muchi ne tujtutut pal ne ejekat
muchi tay ujulini talchi
wan muchi ne mijmichin pal ne at
anmuwan nikintemaka
3 muchi ne ulininit yultuk
ma anmupal pal ankikwat
ken ne kijkilit nimetzinmaka muchi
4 melka uni, nakat iwan iesyu yultuk [1]
maka shikwakan
5 nusan ipanpa anmuesyu yultuk nitajtanis
itech muchi tay yultuk niu-niktajtani
wan itech takat niktajtanis
itech se ipanpa n' iiknew [2]
6 ká kikushinia n' iesyu se
itech seuk n' iesyu mukushinis [3]
ika kenha ken Teut kichijki ne takat
7 anmejemet tel shitakiltalikan
shimumiakchiwakan
wan shiktemakan ne taltikpak
8 ne Teut kilwij Noa iwan ipijpilawan, inak:
9 naja niktalia nusentaketzat anmuwan
wan inwan ne anmupilawan anmuipan
10 wan muchi ne tay yultuk ne nemit anmuwan
tujtutut takwalmet wan muchi
yujyultuk pal ne taltikpak anmuwan
ne kistiwit tik ne takukal
wan yujyultuk tik ne taltikpak
11 niaw niketza nusentaketzat anmuwan
intea yu-muwilewa muchi tay kipia
iweyka tik tepeat
inte yu-witz ukse tepeat kiwilewa ne
taltikpak
12 ne Teut inak:
ini pal muishmati ne sentaketzat
naja niktalia ijtik naja wan
anmejemet
wan iwan muchi ne tay yultuk anmuwan
pal senpa wan senpa
13 ne numit niktalia tik ne mishti
yaja pal muishmati
ne sentaketzat ijtik naja wan ne
taltikpak
14 yaja kiane:
kwak niaw nikchiwa se mishti ijpak ne
tal
wan muita tik ne mishti se mit
15 yaja ka nikelnamiki nusentaketzat
ne muchijki ijtik naja wan anmejemet
wan muchi tay yultuk
muchi ká kipia iweyka
wan intea yu-witz se tepeat
kiwilewa muchi tay kipia iweyka
16 kwak nemi ne mit tik ne mishti
niu-nikita wan niu-nikelnamiki
ne sentaketzat pal senpa ijtik ne
Teut
wan muchi tay yultuk
muchi tay kipia iweyka pak ne
taltikpak
17 ne Teut kilwij Noa:
ini pal muishmati ne sentaketzat
ne niktalijtuk ijtik naja
wan muchi tay kipia iweyka
ká nemi pak ne taltikpak
[1]Chiupi uij ini lineaj.
[2]Mumati ka kineki ina ka ne Teut yawi kitajtani se takat ne
kishinijtuk ne iesyu ukse takat ma tashtawi ipanpa tay kichijtuk.
[3]Su se kimiktia se takat, ukse takat yawi kimiktia yajane.
No comments:
Post a Comment