5: Ne wey tepeat (6:9 - 9:17)

[Read English translation]

·· NOA

Ne wey tepeat

9 INI ken ijtuk iwan Noa:

Noa se takat kichiwa sema tay yek

yekkaya katka tik n' itiempoj

iwan ne Teut nejnenki Noa

10 ne Noa kipishki yey ipalawan

Shem, Jam wan Yapet

11 pulijtuya ne tal iishpan ne Teut

temik ne tal iwan inteyek

12 ne Teut kitak ka wilewik ne tal

ika muchi ne kipiat iweyka tik ne tal ujujpulijtiwit

13 ne Teut kilwij Noa:

n' itamilis ipal muchi ne kipiat iweyka yawi witz nutech

ika tentuk ne taltikpak iwan inteyek inpanpa

niaw nikwilewa ne taltikpak

14 shu-shikchiwa se takukal

iwan ikwaw kujkuyu goper

shikchiwa sejse pal anmuchantiat

shikmawalti ne kalijtik wan ne tatenpan iwan breaj

15 shikchiwa ijkini ken niaw nimetzilwia

ne takukal ma weyak yey-tzunti imajkul

ma patawak unpual-majtakti imajkul

wan ma kojtik senpual-majtakti imajkul

16 se tentzin shikchiwa ipal ne takukal

ka se imajkul shiktami ka ikajku

wan itentzakka ne takukal tik iladoj shiktali

shikchiwa se itankupa kan nemit wan seuk wan nusan yey

17 wan ashan naja niaw nalwika

se wey tepeat ijpak ne tal

kimiktia muchi kipia kalijtik ejekatzin yultuk itan n' ilwikak

wan yawi puliwi muchi pak ne tal

18 niaw niketza nusentaketzat muwan

tiaw tikalaki tik ne takukal

taja inwan mupijpilawan

wan musiwaw wan n' insijsiwaw mupilawan muwan

19 ipal muchi yultuk, ipal muchi kipia iweyka

ujume ujume ipal muchi

tiaw tikinkalaktia tik ne takukal titajpia yujyultuk muwan

ukich wan siwat ma nemikan

20 pal ne tujtutut sejse ken sejse

wan pal ne takwalmet sejse ken sejse

muchi ne ulinit talchi sejse ken sejse

ujume pal muchi ajsisket mutech pal titajpia yujyultuk

21 wan taja shu-shalkwi pal muchi ne takwal ne weli mukwa

shu-shaltepewa pal kiane tiu-tikwa wan pal yu-kikwat

22 wan Noa kichijki

muchi tay kituktij ne Teut ijkiunisan kichijki yaja

7

1 Tutajwan kilwij Noa: shu-shikalaki taja

wan muchi mumiakwan tik ne takukal

ika taja nimetzita ka tiyek nuishpan

ijtik ne tajtakamet ipal ini tiempoj

2 pal muchi ne takwalmet welit mukwat

shalkwi chikume, ukich wan isiwaw

wan pal ne takwalmet ne te welit mukwat

ujume, ukich wan isiwaw

3 kenhaya pal ne tutut pal n'ilwikak

chijchikume, ukich wan isiwaw

pal titajpia yultuk ishinach

nujme ne taltikpak

4 ika ijtik chikume tunal

naja niu-nikchiwa at pak ne tal

unpual tunal wan unpual tayua niu-nikwilewa muchi

ne nemilis tay nikchijki ijpak ne taltikpak

5 Noa kichijki muchi tay Tutajwan kituktij

6 Noa kipiatuya chikwasen-tzunti shiwit

kwak muchijki ne tepeat

atukik ne taltikpak

7 walkalak Noa wan ipijpilawan

wan isiwaw

wan insijsiwaw ipilawan

ijtik ne takukal ipanpa ne tepeat

8 ne tajtakwalmet welit mukwat

wan ne takwalmet te welit mukwat

wan ne tujtutut

wan muchi ne ulini talchi

9 ujume ujume ajsiket itech Noa tik ne takukal

ukich wan siwat ken Tutajwan kituktij Noa

10 wan muchijki kwak panuket chikume tunal

ne tepeat pak ne tal

11 tik ne shiwit kwak Noa kipiatuya

chikwasen tzunti shiwit ka nestuk

tik ne metzti ume

tik ne tunal kashtul-ume pal ne metzti

tik ini tunal tapanket muchi ne ajapunian pal ne miktan wey

wan ne tzajtzakka pal n' ilwikak tapuiket

12 wetzki ne at ijpak ne tal

unpual tunal wan unpual tayua

13 tik uni tunal kalak Noa

wan Shem wan Jam wan Yapet, ipilawan Noa

wan n' isiwaw Noa wan ne yey insijsiwawan n' ipilawan inwan

ijtik ne takukal

14 yejemet wan muchi ne tay yultuk

sejse ken sejse

wan muchi ne takwalmet

sejse ken sejse

wan muchi ne ulininital ulinit pak ne tal

sejse ken sejse

wan muchi ne pataninimet

sejse ken sejse

muchi ne tujtutut wan muchi ne ejtapaltal

15 ajsiket itech Noa

ijtik ne takukal

ujume ujume

muchi ne kipiat iweyka

ne ijtik nemi ejekatzin yultuk

16 wan ne witzet

ukich wan siwat ipal muchi walajket

ken kituktij ne Teut

wan Tutajwan kintentzak

17 nakak ne tepeat unpual tunal pak ne tal

weyket ne ajat wan kitejkultijket ne takukal

wan muajkukij ijpak ne tal

18 chikawayak ne at wan weyki sujsul pak ne tal

wan nejnenki ne takukal ijpak ne at

19 sujsul chikawayaket ne ajat pak ne tal

wan mutzakket muchi ne kojkojtik tepet itan n' ilwikak

20 kashtul imajkul ka ikajku weyki ne at

wan mutzakket ne tejtepet

21 puliwik muchi tay kipia iweyka

ne ulini pak ne tal, ne tujtutut, ne takwalmet

wan muchi yultuk

wan muchi ne kumuninit ne kumunit pak ne tal

wan muchi ne tajtakamet

22 muchi tay ijtik ne iyak kipia iijiu ejekatzin yultuk

wan muchi tay nemi tik tal

mikik

23 kiwilej muchi ne nemilis

nemi ijpak ne taltikpak

takamet takwalmet ulininimet

hasta tujtutut pal ne ejekat

wilejket nujme ne tal

wan semaya nakak Noa

wan ká iwan nemik tik ne takukal

24 chikawayak ne at pak ne tal

sentzunti-unpual-majtakti tunal

8

1 wan ne Teut kielnamik Noa

wan muchi tay yultuk wan ne takwalmet

nemituyat iwan tik ne takukal

wan ne Teut kipanultij se ejekat nujme ne tal

wan nejmachnemik ne at

2 mutentzakket ne ajapunian pal ne miktan wan ne tzajtzakka pal ne ilwikak

wan tamik shini ne at

3 mukwepki yajki ne at ijpak tal

tamik temu ijtik sentzunti-unpual-majtakti tunal

4 wan nakak ne takukal tik ne metzti chikume tik ne tunal kashtul-ume ipal ne metzti

ijpak ne tepet Ararat

5 ne at temuk yajki

hasta ne metzti majtakti

tik ne metzti majtakti

tik ne achtu tunal pal ne metzti

muitak ne itzunpan ne tejtepet

6 wan kwak panutiwit unpual tunal

kitapuj Noa n' itentzin ne takukal ne kichijtuya

7 kititanij ne tiltik tutut

wan pejki yawi wan witz hasta wakik ne at ijpak ne tal

8 kititanij ne wilut pal kita su kashawik ne at ijpak ne tal

9 te kiajsik ne wilut kan musewiskia ne ikshitashkal

wan mukwepki itech tik ne takukal ika nemituya at nujme ne taltikpak

kimelawki n' imey pal kikwi

kalkalaktij ijtik ne takukal

10 tejchishki uk chikume tunal

wan senpa kititanij ne wilut

kiski tik ne takukal

11 mukwepki witz ne wilut ka teutak

kiwiwittuya se imajtzal kuyu olivaj

ne kalkwij tik ne iten

ijkiuni kimatki Noa ka kashawik ne at ijpak ne tal

12 tejchishki uk chikume tunal

wan kwak kititanij ne wilut

intea walmukwepki senpa ne wilut

13 tik ne shiwit chikwasen tzunti wan se tik ne achtu tunal pal ne metzti se
wakik ne at ijpak ne tal

Noa kitapuj ne itzakka ne takukal wan kitak ka waktuk ne taltikpak

14 tik ne ukse metzti tik ne tunal senpual-chikume ne tal nemia waktuk

15 Ne Teut kinutzki Noa, ina:

16 shikisa tik ne takukal taja wan musiwaw

wan mupilawan wan isijsiwaw mupilawan

17 muchi ne yujyultuk nemit muwan, muchi ne kipiat inweyka

tujtutut tajtakwalmet wan muchi ne ulinit pak ne tal

shikishti muwan ma kumunikan tik ne tal

wan ma kitalikan itajtakil wan ma muchiwakan mijmiak pak ne tal

18 wan kiski Noa wan n' ipilawan wan n' isiwaw wan n' insijsiwaw n' ipilawan

19 muchi ne yujyultuk muchi ne ulininimet wan muchi ne pataninimet

muchi tay ulini pak ne tal

tik infajfamiliaj kisket tik ne takukal

20 Noa kiketzki se tepatznaj ipal Tutajwan

kikwij ipal muchi ne tajtakwalmet welit mukwat

wan muchi ne pajpataninimet welit mukwat

wan kitatij tejtetakulis pak ne tepatznaj

21 Tutajwan kijnek n' isujyak puputuka

wan muilwij Tutajwan tik iyulu:

tea nimukwepas nikchiwa maldictar

ne taltikpak ipanpa ne takat

22 ika n' itekiw n' iyulu ne takat inte yek

kenhaya kwak pewa piltzinkisa

wan te nimukwepas nikchalua

muchi tay yultuk ken nikchijtuk

9

1 Ne Teut kiteuchijki Noa wan ipijpilawan

wan kinhilwij:

shitakiltalikan

shimumiakchiwakan

shiktemakan ne taltikpak

2 muchi ne yujyultuk pal ne taltikpak

yawit majmawit sea anmupanpa

wan muchi ne tujtutut pal ne ejekat

muchi tay ulini talchi

wan muchi ne mijmichin pal ne at

nikintemaka anmuwan

3 muchi ne ulinini yultuk

anmupal pal ankikwat

ken nimetzinmakak muchi ne kijkilit

4 man pal ne nakat yultuk

maka shikwakan n' iesyu

5 wan ipanpa anmuesyu yultuk nitajtanis

itech muchi tay yultuk niu-niktajtani

wan itech takat niktajtanis

itech se ipanpa n' iiknew

6 ká kikushinia n' iesyu se

itech seuk n' iesyu mukushinis

ika kenha ken Teut yaja kichijki takamet

7 wan shitakiltalikan

shimumiakchiwakan

wan shiktemakan ne taltikpak

8 ne Teut kilwij Noa iwan ipijpilawan, inak:

9 ashan naja niktalia nusentaketzat anmuwan

wan inwan ne anmupilawan anmuipan

10 wan inwan muchi ne tay yultuk ne nemi anmuwan

tujtutut takwalmet wan muchi

yujyultuk pal ne taltikpak anmuwan

ne kistiwit tik ne takukal

yujyultuk pal ne taltikpak

11 niaw niketza nusentaketzat anmuwan

intea wilewis muchi tay kipia iweyka tik tepeat

intea yawi witz uk se tepeat kiwilewa ne taltikpak

12 ne Teut inak:

ini pal muishmati ne sentaketzat

ne niktalia naja ijtik naja wan anmejemet

wan iwan muchi ne tay yultuk anmuwan

pal senpa wan senpa

13 ne numit niktalia tik ne mishti

wan yu-nemi pal muishmati

ne sentaketzat ijtik naja wan ne taltikpak

14 kwak nikchiwa se mishti ijpak ne tal

wan muita se mit tik ne mishti

15 niaw nikelnamiki nusentaketzat

ijtik naja wan anmejemet

wan muchi tay yultuk

muchi ká kipia iweyka

ka intea yawi witz se tepeat

kiwilewa muchi tay kipia iweyka

16 wan kwak nemi ne mit tik ne mishti

san nikitas wan nikelnamikis

ne sentaketzat pal senpa ijtik ne Teut

wan muchi tay yultuk

muchi tay kipia iweyka

pak ne taltikpak

17 ne Teut kilwij Noa:

ini pal muishmati ne sentaketzat

ne niktalijtuk ijtik naja

wan muchi tay kipia iweyka

tay nemi pak ne taltikpak