14. Ne sentaketzat (15:1-21)

Ne sentaketzat

15

1 SE tunal, Tutajwan kinutzki Abram tik se tachialis, inak:

—Maka shimajmawi Abram

naja nimuchimal

ne mupatiw sujsul wey.

2 Abram inak:

—Tutajwan Teut, tay tinechmakaskia?

su naja te nikpia kukunet

wan ne tajpiani pal ne nukal

Eliezer, se pal Damashek.

3 Nupilawan —inak yaja—

inte tinechmakatuk

wan ne nukal yawi ipal

se ka nuchan nestuk.

4 Tutajwan kinutzki senpa wan kilwij:

—Tay mupal te yawi ipal yajane

sute se itech mushinach kistuk

ne tay mupal yawi ipal!

5 Kiwikak ka tatenpan wan inak:

—Shikita ka ikajku

shikpua ne sijsital

su tiweli tikinpua.

Ijkiuni —kilwij—

yawit mupuat

ne mupijpilawan.

6 Kiyulmatki Tutajwan, wan Tutajwan kipujki pal yek.

7 Kilwij:

—Naja ni Mutajwan

ne nimetzishtij tik Ur-Kasdim

pal nimetzmaka ini tal ma naka mupal.

8 Inak:

—Tutajwan Teut, ken niu-nikmati ka yu-naka nupal?

9 Kilwij:

—Shalkwi nuishpan

se wakashkunet kipia yey shiwit

se cabraj kipia yey shiwit

se ukichichkat kipia yey shiwit

se kukulutzin

wan se wilukunet.

10 Kalkwij iishpan muchi yejemet wan kintzayan tik intajku wan kintalij ne tzajtzayantuk ne se tachia iishpan ne seuk. Ne tujtutut inte kintzayan. 11 Kwak waltemuk ne kwishti ijpak ne inkajkakashyu, Abram kinmutij. 12 Kwak ne tunal kalak yajki, yaja kukuchki; se wey takumi ipal mawi wetzki ijpak. 13 Tutajwan kilwij Abram:

—Ma shikmati ka muchantisket

mupilawan tik tepal tal

tekitisket wan taekusket

nawi-tzunti shiwit.

14 Ne techan ne ipal tekitisket

nusan niktenewas naja,

wan kwak tami, kisasket

wan ne inpalwan wejwey.

15 Taja tiasneki

itech munoywan tinejmachnemi,

yawit metztalpachuat

kwak sea tichuleta.

16 Kwak panutiwit nawi tapunilis

walmukwepasket ka nikan,

ika inteuk yekawik

ne inteyek pal ne Amortekat.

17 Kwak ne tunal kalaktuya wan kunyuakiski, muitak se hornilloj mumulutza wan se tawil ipal tet panu itzalan uni tajtakutun. 18 Tik uni tunal Tutajwan kiajshitij se sentaketzat iwan Abram, wan inak:

—Nikinmaka ne mupilawan

muchi ini tal

ijtik ne apan ipal Egipto

wan ne wey apan Perat,

19 ne Kaintekat, ne Kenaztekat, ne Kadmontekat,

20 ne Jettekat, ne Periztekat, ne Repatekat,

21 ne Amortekat, ne Kanaantekat,

ne Girgashtekat wan ne Yebustekat.