13. Ken ijtuk iwan Abram wan Malki-Tzedek (14:1-24)

Ken ijtuk iwan Abram wan Malki-Tzedek

14

1 TIK uni tujtunal, Amrapel ne tatuktiani ipal Shinar, Aryok ne tatuktiani ipal Elasar, Kedorlaomer ne tatuktiani ipal Elam, wan Tidal ne tatuktiani ipal Goim 2 kichiwket se guerraj iwan Bera ne tatuktiani ipal Sodom wan Birsha ne tatuktiani ipal Gomora, Shinab ne tatuktiani ipal Adma wan Shem-Eber ne tatuktiani ipal Tzeboim wan ne tatuktiani ipal Bela (yaja Tzoar). 3 Muchi ini musentepejket tik ne Vallej ipal Sidim; yaja ne Weyat ipal Istat.

4 Ijtik majtakti-ume shiwit kintuktij Kedorlaomer. Tik ne shiwit majtakti-yey, inaket inte. 5 Tik ne shiwit majtakti-nawi walaj Kedorlaomer wan ne tatuktianimet musenputzujtiwit iwan wan kisunket ne Repatekat tik Ashterot Karnaim, ne Zuztekat tik Ham, ne Emtekat tik Shawe Kiryataim 6 wan ne Jortekat tik ne tepetal ipal Sheir itech Elparan, ne nemi inawak ne waktal. 7 Walmukwepket tik En-Mishpat (yaja Kadesh) wan kisunket muchi ne talmet ipal ne Amalektekat wan nusan ne Amortekat ne nemit tik Jatzetzon-Tamar.

8 Kisket ne tatuktiani ipal Sodom, ne tatuktiani ipal Gomora, ne tatuktiani ipal Adma, ne tatuktiani ipal Tzeboim wan ne tatuktiani ipal Bela (yaja Tzoar) musumat inwan tik ne Vallej ipal Sidim: 9 iwan Kedorlaomer ne tatuktiani ipal Elam, Tidal ne tatuktiani ipal Goim, Amrapel ne tatuktiani ipal Shinar wan Aryok ne tatuktiani ipal Elasar. Nawi tatuktiani iishpan makwil.

10 Ne Vallej ipal Sidim tentuk-tentuk iwan shajshaput alawak. Chulujket yajket ne tatuktianimet ipal Sodom wan Gomora wan wetzket tik yejemet. Ne sejseuk chulujket ka tepet, 11 wan kitzkijket muchi ne ipalwan Sodom wan Gomora wan muchi intakwal wan yajket. 12 Kitzkijket Lot wan ne ipalwan, yaja ne ipiltzin ne iikaw ne Abram, wan yajket, ika yajuni nakatuya tik Sodom.

13 Ajsik se chuluani kineshtilia Abram ne Ebertekat. Yajini muchantia katka kan nemit ne wejweykwawit ipal Mamre ne Amortekat, ne imanuj Eshkol wan Aner. Yejemet ikujkunpawan Abram. 14 Kwak takakik Abram ka mukwijtuk ne iiknew, kalinnutzki yeytzunti-kashtul-yey tepalewiani ne nestiwit ka ichan wan kintalultijket hasta Dan. 15 Mutakutuntijket pal kinsumat ka tayua yaja wan ne itejtekitini. Kinsunket wan kintalultijket hasta Joba ne nemi ka iajkuikpa Damashek. 16 Mukwepki kikwi muchi ne ipalwan wan nusan Lot iiknew wan ne ipalwan kikwepki, wan nusan ne siwatket wan ne tukniwan.

17 Kiski ne tatuktiani ipal Sodom kitajpalua kwak walmukwepki kwak tami kisuma Kedorlaomer wan ne tatuktianimet nemituyat iwan. Yajki ne Vallej ipal Shawe (yaja ne Vallej ipal ne Tatuktiani). 18 Malki-Tzedek, ne tatuktiani ipal Shalem, kishtij tajtamal wan atata; yaja se palej ipal El-Elyon. 19 Kiteuchij wan inak:

—Yektenejtuk Abram pal El-Elyon

ká ne ilwikak wan ne tal ipal

20 wan yektenejtuk El-Elyon

ká temakak mutejtenewani tik mumey.

Wan kimakak se majtaktakutun ipal muchi. 21 Ne tatuktiani ipal Sodom kilwij Abram:

—Shinechmaka ne takamet, wan ne tepalwan shikwi taja.

22 Abram kilwij ne tatuktiani ipal Sodom:

—Nikmakatuk nupalabraj Tutajwan El-Elyon

ká ne ilwikak wan ne tal ipal

23 ka nian se ikpat

nian se iishmekayu kakti

niu-nikwi tik muchi tay mupal

pal te weli tina:

"naja niktepewilij Abram".

24 Nupal sema tay ne kikwajtiwit ne tajtakapiltzinmet

wan n' intakutun ne takamet

senyajtiwit nuwan

Aner, Eshkol wan Mamre

ma kikwikan yejemet tay inpal.