16. Se yankwik sentaketzat (17:1-14)

[Read English translation]

Se yankwik sentaketzat

17

1 KWAK Abram kipiatuya nawpual-kashtul-nawi shiwit, Tutajwan kiski iishpan wan kilwij:

—Naja ni El-Shaday,

shinejnemi tik nuuj,

shimuchiwa ken yek!

2 Niu-niktalia nusentaketzat

ijtik naja wan taja,

sujsul niu-nimetzmiakchiwa.

3 Abram mutankwaketzki. Ne Teut kinutzki, inak:

4 —Naja ini nusentaketzat muwan:

Timuchiwas inteku miak techan.

5 Intea munutzas mutukay Abram.

Mutukay Abraham

ika naja nimetzchiwa

tiinteku miak techan.

6 Nimetzmakas wey mutakil,

nimetzchiwas miak techan,

tatuktianimet mutech yu-kisat.

7 Niaw niketza nusentaketzat

ijtik naja wan taja

wan iwan mupilawan ka muipan.

Ini se sentaketzat pal senpa

ka niu-nimuchiwa Teut mupal

wan pal mupilawan ka muipan;

8 taja niu-nimetzmaka

wan mupilawan ka muipan

ne tal kan tinemi,

muchi ne tal pal Kanaan

yawi mupal pal senpa

wan niu-nimuchiwa Teut ipal.

9 Kilwij:

Taja nusentaketzat shitajpia

wan kenhaya mupilawan ka muipan.

10 Ini nusentaketzat antajpiasket

ijtik naja wan anmejemet

wan mupilawan ka muipan:

shumet shikinyawaltekikan muchi ne ukichket.

11 Shikyawaltekikan inakayu anmutzujtzuntepul,

yaja muchiwas se pal muishmati

ne sentaketzat ijtik naja wan anmejemet.

12 Kwak kipiat chikwey tunal

ma muyawaltekikan muchi ne ujukich:

kenha ne nestiwit ka anmuchan

ken ne mukujtiwit ipanpa tumin

itech se ipal tepal tal

ká te kipia mushinach.

13 Ma muyawaltekikan

ne muchan nestiwit

wan ne iwan tumin mukujtiwit,

wan nemis nusentaketzat

tik anmunajnakayu pal senpa.

14 Se ukich tzuntepulpia

ne inakayu n'itzuntepul

inte muyawaltektuk,

yajane inte mupuas ijtik n' ikniwan;

yaja nusentaketzat kitzuntektuk.