10. Ne Teut kinutzki Abram (12:1-9)

[Read English translation]

II. Abraham

··· SHU WEJKA

Ne Teut kinutzki Abram

12

1 TUTAJWAN kilwij Abram:

—Shu wejka ne tal kan tinesik

shikisa ka ichan muteku

wan shu-shipashalu

hasta ne tal niaw nimetzilwitilia

2 niu-nimetzkwepa se techan wey

niu-nimetzteuchiwa

ne mutukay niu-nikchiwa wey

ma muchiwa se teteuchiwalis

3 niu-nikteuchiwa

ká ne metzteuchiwa

wan ká ne metztejtenewa

niu-nikchiwa maldictar

wan mutech muyektenewasket

muchi ne chijchinamit pal ne taltikpak.

4 Yajki Abram ken kinutztuya Tutajwan wan yajki Lot iwan. Abram kipiatuya yeshpual-kashtul shiwit kwak kiski Jaran. 5 Abram kiwikak Saray ne isiwaw, Lot ne ipiltzin ne iikaw wan muchi inpalwan wan muchi ne inmiakwan pal Jaran, wan kisket pashaluat hasta ne tal pal Kanaan, wan ajsiket Kanaan. 6 Panuk Abram ijtik ne tal wan ajsik kan itukay Shekem itech ne weykwawit ipal More, tik ne tujtunal kwak nemituya ne Kanaantekat tik ne tal. 7 Muneshtij Tutajwan itech Abram wan inak:

—Niu-nikinmaka ne mupilawan ini tal.

Kiketzki ka unkan se tepatznaj ipal Tutajwan ne itech muneshtijtuya.

8 Kiski ka senkak wan ajsik ne tepet ka itaneskan Bet-El. Kisujki ne tawipanti tik se kan nemituya Bet-El ka kalakian wan Ay ka taneskan. Kiketzki ka unkan se tepatznaj pal Tutajwan wan tanutzki iwan ne itukay Tutajwan. 9 Ajkewik Abram wan pashaluj yajki ka tatzinu.