[Read English translation]
I. Ne Pewalis
· KWAK PEJKI
Ken kiketzki ne Teut ne ilwikak wan ne tal
1 |
1 KWAK ne Teut pejki kinketza
ne ilwikak wan ne tal
2 ne tal inteuk muektalijtuk
takumi ijpak miktan
ejekat pal Teut papataka
pak iishkalyu ne at
3 kwakuni inak Teut ma nemi tawil
wan muchijki ne tawil
4 kiwelitak Teut ne tawil
kikupej Teut tawil tech takumi
5 ne tawil kinutzki Tunal
wan ne takumi kinutzki Tayua
tayuakik, tatwik, se tunal
6 inak Teut ma muchiwa
se pachantuk tatajku ne at
kikupewa at itech at
7 kichijki Teut ne pachantuk
kikupej ne at itankupa ne pachantuk
tech ne at ijpak ne pachantuk
wan kiane nakak
8 wan ne pachantuk kinutzki Ilwikak
tayuakik, tatwik, ukse tunal
9 inak Teut ma musentepewa
ne at itankupa ne ejekat
ma nesi tal waktuk
wan kiane nakak
10 ne tal waktuk kinutzki Tal
ne at sentepejtuk kinutzki Weyat
wan kiwelitak ne Teut
11 inak Teut ma shushuknajkisa
ne tal iwan sajsakat
mulinit wan ishkisat
kwajkwawit takilchiwat
kitaliat intakil ken yejemet
kipia ne iish kalijtik
wan kiane nakak
12 kishtij ne tal sajsakat
kisa ne iish ken yejemet
kwajkwawit kitaliat intakil
kipia ne iish ken yejemet
wan kiwelitak ne Teut
13 tayuakik, tatwik, yey tunal
14 inak Teut ma muchiwakan
tajtawil tik ipachantuk ne ilwikak
kinkupewat tunal wan tayua
pal muishmatit ijilwit
tujtunal wan shijshiwit
15 tajtawil tik ipachantuk ne ilwikak
pal kitawiluat ne tal
wan kiane nakak
16 kichijki Teut ume wey tawil
ne wey itekuyu ne tunal
ne chikitik itekuyu ne tayua
nusan ne sitalmet
17 kintalij Teut tik ipachantuk ne ilwilkak
pal kitawiluat ne tal
18 kintekimakat tunal wan tayua
wan kinkupewat tawil wan takumi
wan kiwelitak ne Teut
19 tayuakik, tatwik, nawi tunal
20 inak ne Teut ma kumuni ne at
iwan kumuninimet yultuk
ma patanikan pataninimet
pak tal, pak ipachantuk ne ejekat
21 kinketzki Teut ne wejwey akuat
wan muchi tay ulini yultuk
ne kumuni tik ne at sejse ken sejse
wan ne patanini kipia iejtapal sejse
ken sejse
wan kiwelitak ne Teut
22 kinteuchij Teut wan inak:
shitajtakiltalikan, shimumiakchiwakan
shiktemakan ne ajat
wan ne tujtutut ma mijmiak pak ne tal
23 tayuakik, tatwik, makwil tunal
24 inak ne Teut ma kinhishti ne tal
ne yujyultuk sejse ken sejse,
takwalmet wan ulininimet
wan tekwanimet ipal ne tal sejse ken
sejse
wan kiane nakak
25 kinchijki Teut tekwanimet
ipal ne tal sejse ken sejse
wan ne takwalmet sejse ken sejse
wan muchi ne ulinit talchi, sejse ken
sejse
wan kiwelitak ne Teut
26 inak Teut: tikchiwakan
Takat kenha ken tejemet
ma tatukti ijpak michintal
tujtutut ipal ne ejekat
takwalmet, wan muchi ne tal
wan muchi tay ulini talchi
27 kiketzki Teut ne Takat ken Yajasan
kenha ken ne Teut kiketzki
ukich wan siwat kinketzki
28 kinteuchij ne Teut wan kinhilwij:
shitajtakiltalikan, shimumiakchiwakan
shiktemakan ne taltikpak
shimuchiwakan itejtekuyu
shitatuktikan ijpak michintal
ne tujtutut pal ne ejekat
wan muchi tay ulini talchi
29 inak Teut: naja nimetzinmaka
muchi ne sajsakat ishkisat
nemit pak muchi ne tal
wan muchi ne kwajkwawit
kichiwat intakil kipia iish
yejemet anmupal pal ankikwat
30 wan pal takwat muchi ne takwalmet
wan muchi ne tujtutut pal ne ejekat
wan muchi ne ulinit talchi
ne ijtik yejemet nemi iijiu yultuk
muchi ne kijkilit nikinmaka
wan kiane nakak
31 kitak Teut muchi tay kichijtuk
wan sujsul kiwelitak
tayuakik, tatwik, ne tunal chikwasen
2 |
1 mutamijket ilwikak wan tal
wan muchi ne taltikpak
2 wan kitamij Teut tik ne tunal chikume
ne itekiw kichijtuya
wan musewij tik ne chikume
ika yekawik muchi itekiw
3 kiteuchij ne Teut ne tunal chikume
wan inak ka wey uni tunal
ka tik yaja sewik itekiw
pal kichiwa muchi tay kiketzki
4 wan ini ken ijtuk wan ne ilwikak wan ne tal
kwak yejemet pejket muchiwat
No comments:
Post a Comment