3: Kain, Habel wan Shet (4:1-26)

[Read English translation]

Kain, Habel wan Shet

4

1 NE Adam nemik iwan Jawa isiwaw

weykiski, kipunij Kain

wan inak Jawa: nikwijtuk

se takat itech Teut

2 mukwepki kipunia ne iikaw, Habel

ne Habel tajpia ichkatal

wan Kain tekiti ne mil

3 ne tujtunal panuket, kalwikak Kain

itakil ne mil kitakulia Tutajwan

4 Habel nusan kalwikak itetakulis

kujkunet pal ne ichkatal wan ne itumakka

kitak Tutajwan Habel wan ne itetakulis

5 wan Kain wan ne itetakulis te kitak

kwalanik Kain sujsul, wetzki ne iishkalyu

6 kilwij Tutajwan Kain: taika tikwalani

taika wetztuk ne muishkalyu?

7 anka inte timukwis

su tikchiwa tay yek?

wan su te tikchiwa tay yek

iten ne kal ne teyek tejchia

metzelewia, wan taja tiktuktis

8 kilwij Kain Habel ne iikaw

wan kan nemituyat tik kojtan

muketzki Kain, yajki itech Habel

wan kimiktij

9 kilwij Tutajwan ne Kain:

kan nemi Habel muikaw?

inak: inte nikmati

anka niitajpiani nuikaw?

10 inak: tay tikchijtuk?

nikaki ne iesyu muikaw

nechtzajtzalia tik ne mil

11 ashkan tetekia muwan

ne tal mutenpelujtuk

pal kikwi ne iesyu muikaw

itech mumey, wan tik yaja

12 titekitis wan tea metzmakas yek

wan tiasneki ka senkak

tikyawalua ne taltikpak

13 kilwij Kain Tutajwan:

nukimil wey

ken inte weli muselia

14 tik ini tunal tinechtalultij

tik ne nutal tinechishtij

niaw niminaya wejka mutachialis

niasneki ka senkak

nikyawalua ne taltikpak

wan ká ne yu-nechita yu-nechmiktia

15 kilwij Tutajwan: su ijkiuni

ká ne yu-metzmiktia

chikume wipta yawit kitzunkwit

wan kitalilij Tutajwan Kain

se pal muishmati ma te kichalu

muchi ká ne yu-kinamiki

16 wan yajki Kain wejka Tutajwan

muchantia ne tal itukay Nod

ka itaneskan Eden 

  

17 nemik Kain iwan isiwaw wan weykiski wan kipunij Hanok

ini Kain techanketzani wan kitukaytij ne itechan

kenha ken itukay ne ipiltzin: Hanok

18 nesik se ipiltzin Hanok: Irad

Irad kipishki Mejuyael

Mejuyael kipishki Metushael

wan Metushael kipishki Lamek

19 kinkwij Lamek ume isiwaw

se itukay Ada, ne seuk itukay Tzila

20 kipunij Ada Yabal, yaja ne inteku

ne kipiat tawipanti wan takwalmet

21 ne iikaw itukay Yubal, ne inteku

muchi ne tatzutzunat wan tapitzat

22 Tzila nusan tapunij, kipishki Tubal-Kain

ne kitantia muchi ne tepusti tamej

wan ne ieltiw Tubal-Kain: Naama

23 kinhilwij Lamek ne isiwawan:

Ada wan Tzila, shinechkakikan

isiwawan Lamek, shikakikan tay nina

se takat nikmiktij ika nechtzuntek

se piltzin ika nechshutak

24 ka chikume wipta mutzunkwi Kain

wan Lamek chikume pual wipta

25 nemik senpa Adam iwan isiwaw

wan kipunij se piltzin

wan kitalilij itukay Shet

ika inak: nechmakak ne Teut

ukse nupiltzin ipatka Habel

ne kimiktij Kain

26 wan mupunij nusan ipiltzin Shet

wan kinutzki Enosh

kwakuni pejket kinutzat

Tutajwan itukay ne Teut