15. Nesik Ishmael (16:1-16)

Nesik Ishmael

16

1 SARAY, ne isiwaw Abram, inte tapunij. Yaja kipiatuya se criadaj pal Egipto itukay Hagar. 2 Saray kilwij Abram:

—Shikita, Tutajwan inte nechajkawtuk nitapunia. Shikalaki ichan ne nucriadaj, anka niu-nimuketza itech.

Abram kitakamatki Saray.

3 Kikwij Saray n' isiwaw Abram

Hagar pal Egipto n' icriadaj

kwak kichiwa majtakti shiwit

ka Abram tik Kanaan naka

wan kimakak Abram n' ishulejyu

ma muchiwa isiwaw yaja.

4 Kalak ichan Hagar, wan yaja ijtiweykiski. Kwak kimatki ka utztituk, pejki kita kashawtuk n' inantzin. 5 Saray kilwij Abram:

—Tikpia ne culpaj ipal tay panu nuwan!

Najasan niktalij nucriadaj tik mumetzpan.

Kimatki ka utztituk wan pakik walaja,

ma kichiwa juzgar Tutajwan ijtik naja wan taja!

6 Abram kilwij Saray:

—Yaja mucriadaj, tik mumey nemi, shikchiwili tay ne tikita yek.

Saray kijilwij ne criadaj, wan yaja chuluj ka senkak. 7 Ne itanawatiani Tutajwan kinamik itech se apunian tik ne waktal, itenpan ne techan tik ne ujti ka Shur. 8 Inak:

—Hagar n' icriadaj Saray,

kanka tiwitz wan kan tiaw?

Yaja inak:

—Ipanpa Saray ne nunantzin

naja nichulua niaw.

9 Ne itanawatiani Tutajwan kilwij:

—Shimukwepa itech munantzin

pal timutemultia itan n' imey.

10 Wan kilwij:

—Nikchiwas ka mupilawan mijmiak,

inte welisket mupuat ika sujsul miak.

11 Wan kilwij:

—Shikita taja tiutztituk

wan se piltzin tikpunis,

tiu-tiknutza Ishmael

ka Tutajwan takakik tay metzkukuk.

12 Yaja se kojtantakat muchiwas

iwan n' imey ijpak muchi,

wan n' imey muchi ijpak yaja,

wan tik itachialis muchi iikawan n' ikal kipias.

13 Hagar kitukaytij ne Tutajwan ne kinutzki:

—Taja ti El-Roi (Teut-Nechita).

Ika inak:

—Anka nusan ka nikan nikitak ipan ne nechita.

14 Neka munutza ne ishat Beer-Lajay-Roi, ne nemi ijtik Kadesh wan Bared. 15 Hagar kipunij ne ipiltzin Abram wan Abram kitukaytij ne ipiltzin ne kipunijtuya Hagar: Ishmael. 16 Abram kipiatuya nawpual-chikwasen shiwit kwak Hagar kipunij Ishmael ne ipiltzin Abram.