11. Abram wan Saray tik Egipto (12:10 - 13:4)

Abram wan Saray tik Egipto

10 MUCHIJKI mayan tik ne tal. Temuk Abram ka Egipto pal mukawa ka unkan ika ne mayan sujsul tik ne tal. 11 Kwak yawi kalaki tik Egipto kilwij Saray ne isiwaw:

—Nikmati ka taja tisiwat ishyek, 12 wan kwak yawit metzitat ne Egiptotekat yawit inat: Yajini isiwaw. Naja yawit nechmiktiat wan taja yawit metzajkawat tiyultuk. 13 Shikinhilwi ka taja tinueltiw pal niaw yek ka mumaku, wan niaw niyultuk mupanpa.

14 Kwak ajsik Abram tik Egipto kitaket ne Egiptotekat ka sujsul ishyek ne isiwaw. 15 Ne tatuktianimet ipal Parao kitaket Saray wan kiyektenejket itech Parao. Kalwikaket ne siwat ichan Parao.

16 Ipal Abram yajki yek ipanpa Saray. Kipishki ichkamet wan wakashmet, bujburroj, ukichtekitinimet wan siwatekitinimet, sijsiwaburrojmet wan cajcamelloj.

17 Tutajwan kichaluj Parao sujsul wey, wan muchi ka ichan nusan, ipanpa Saray, ne isiwaw Abram. 18 Parao kinutzki Abram, inak:

—Tay tinechchiwilijtuk? Taika inte tinechneshtilij ka yaja musiwaw? 19 Taika tinechilwij "Yaja nueltiw" wan nikwij pal nusiwaw? Nikan nemi ne musiwaw, shikwi wan shiawa.

20 Parao kintuktij takamet ipanpa wan kititanijket yaja wan ne isiwaw wan muchi tay ipal.

13

1 Abram kiski Egipto wan tejkuk ka Kanaan, wan ne isiwaw wan muchi tay ipal wan Lot iwan, wan yajket tik ne tatzinu. 2 Abram nemituya sea takimiltijtuk iwan takwalmet, tumin wan teukwit. 3 Pashaluj yajki ka tatzinu hasta Bet-El, hasta kan achtu kipishtuya ne tawipanti, itzalan Bet-El wan Ay, 4 hasta kan nemik ne tepatznaj ne kichijki ka unkan kwak pejki. Wan Abram tanutzki ka unkan iwan ne itukay Tutajwan.