[Read English translation]
Adam wan Jawa
KWAK pejki kichiwa Tutajwan ne Teut
tal wan ilwikak
5 nian se kwawit inteuk kanaj
nian se sakat mulinik pak ne tal
ika inte kishinijtuk at
Tutajwan ne Teut ijpak tal
wan takat te kanaj pal tajpia mil
6 wan tejku se mishti tech ne tal
kiajwilia ne taltikpak
7 kwakuni kichijki Tutajwan ne Teut
ne Takat wan sukit pal ne tal
kishpitzki tik ne iyak iijiu yultuk
wan ne Takat mukwepki yultuk
8 kitukak Tutajwan ne Teut se yekmil
tik Eden, nepa Taneskan
kitalij unkan ne Takat kichijki
9 kichijki Tutajwan ne Teut ma mulini
sejse kwawit pak ne tal
yejyek pal tikitat wan pal titakwat
wan ne kwawit yultuk tik itajku ne
yekmil
wan ne kwawit pal mumati yek wan
teyek
10 se apan puni tik Eden
pal kiajwilia ne yekmil
ka ne yaja kupewi
mukwepa nawi at
11 ne se itukay Pishon
yaja ne kiyawalua Jawila
ne tal kan muajsi ne teukwit
12 wan ne teukwit pal uni tal yek
wan unkan nemi bedolaj wan tet shojam
13 ne ukse at itukay Gijon
yaja ne kiyawalua muchi ne tal pal
Kush
14 wan ne yey itukay Jidekel
yaja ne panu tik Taneskan Ashur
wan ne nawi yaja Perat
15 kwakuni kikwij Tutajwan ne Teut ne takat
wan kitalij tik ne yekmil Eden
pal tekiti wan tajpia
16 kituktij Tutajwan Teut ne takat:
itech muchi ne kwajkwawit pal ne
yekmil,
kilwij, weli titakwa
17 wan ne kwawit pal mumati yek wan teyek
maka shitakwa itech
ka su tikwa tiaw timiki
18 kwakuni inak Tutajwan ne Teut:
inte yek ma naka ne takat isel
niaw nikchiwilia se pal nemi iwan
19 kichijki Tutajwan ne Teut tech ne tal
muchi ne tekwanit pal ne kojtan
muchi ne pataninit pal ne ejekat
wan kalinwikak iishpan ne takat
pal kita ken kinnutza
wan muchi tay kinnutza ne takwalmet
yaja itukay
20 kintalilij ne takat intujtukay
muchi ne tajtakwalmet
ne pataninit pal ne ejekat
wan muchi ne tekwanit pal ne kojtan
wan ipal ne takat inte kiajsik
se pal kipalewia
21 kitamin Tutajwan ne Teut
kuchilis ijpak ne takat
wan kuchki wan kikwij se iumiskwil
wan kitzak ne nakat kan nemituya
22 kiketzki Tutajwan ne Teut
ne iumiskwil kishtilijtuya ne takat
pal kichiwa se siwat
wan kalwikak iishpan ne takat
23 inak ne takat: ashan kia
ne umit nuumiu, ne nakat nunakayu
yajini munutzas siwat
ka yaja muishtij itech takat
24 yajika kiajkawa takat
ne iteku wan ne inan
wan musalua itech isiwaw
wan mukwepat sanse nakat
25 nakaket inhumeshtin pejpetztituk
ne takat wan isiwaw
wan te ishpinajket
3 |
1 ne kuat tamatini katka
pal muchi ne tajtakwalmet
kinchijki Tutajwan ne Teut
wan yaja kilwij ne siwat:
nusan inatuk ne Teut
ma inte shitakwakan
muchi tay ipal ne kwajkwawit pal ne
mil?
2 kilwij ne siwat ne kuat:
itakil ne kwajkwawit pal ne mil
kia tiwelit tikwat
3 semaya itakil ne kwawit
nemi tik itajku ne mil
inak ne Teut: maka shikwakan
wan maka shikmatukakan
ka su inte, san anmikisket
4 kilwij ne kuat ne siwat:
inte anyawit anmikit
5 asunte kimati ne Teut
ka tik ne tunal kwak anyawit ankikwat
anmuishpelusketa
wan anmukwepasket ken ne Teut
ankimatit yek wan teyek
6 kitak ne siwat ka yek
ne kwawit pal mukwa itakil
wan yaja yektzin tik itachialis
wan yek ne kwawit pal tamati
kikwij ne itakil wan takwaj
wan kimakak ishulejyu nusan
wan takwaj
7 wan muishpelujket ne inhumeshtin
kimatket ka yejemet pejpetztituk
kijtzunket ijiswayu kuyu amat
kichijket majmashtat pal mutzakwat
8 kikakket Tutajwan ne Teut
pashalua tik ne mil kan ajsi ne
ejekatzin
minashket ne takat wan isiwaw
itech Tutajwan ne Teut
tatajku ne kwajkwawit pal ne yekmil
9 kinutzki Tutajwan ne Teut
ne takat, ina: kan tinemi?
10 inak: nimetzkakik tik ne mil
wan nimajmawki ika naja nipetztituk,
inak, wan niminashki
11 inak: ká metzneshtilijtuk,
inak, ka taja tipetztituk?
anka ne itakil ne kwawit
nimetztuktij ma inte shikwa
taja tikwajtuk?
12 inak ne takat: ne siwat
ne tiktalijtuk nuwan,
inak, yaja nechmakak
ne itakil ne kwawit wan nikwaj
13 kilwij Tutajwan ne Teut ne siwat:
tay tikchijki?
inak ne siwat:
ne kuat nechshijshikuj wan nitakwaj
14 kilwij Tutajwan ne Teut ne kuat:
ika tikchijki ini
tetekia muwan ijtik muchi ne
takwalmet
wan ijtik muchi tay yultuk tik kojtan
ijpak muijti tinejnemis
wan sukit tikwas sejsenpa
15 teijialis niu-niktalia
ijtik taja wan ne siwat
wan ijtik mupilawan wan ipilawan
yejemet metztzuntapanasket
wan taja tikinhikshikwas
16 wan ini tay kilwij ne siwat:
sea wey nikchiwas muyulkukulis
wan kwak tikpunia kukunet
metzkukus sujsul
mutaelewilis yawi ipal mushulejyu
wan yaja tatuktis mujpak
17 wan ini tay kilwij ne takat:
ika tiktakamatki musiwaw
wan tikwaj itakil ne kwawit
ne nimetztuktijtuk wan ninak:
maka shu-shikwa, kilwij,
yawi uij ne tal pal tikichkwa
iwan yulkukulis titakwas
mujmusta kwak tiu-tiyultuk
18 witzti wan kojtansakat yu-mulini mupal
tiu-tikwa talsakat
19 sea mitunis mukwatapal
pal tikwa mutamal
hasta tiu-timukwepa talchi
ika itech tal timuishtij
ika taja tisukit
wan itech sukit san timukwepas
20 kitalij ne takat itukay ne isiwaw Jawa
yaja muchijki ne innan muchi
21 wan kichijki Tutajwan ne Teut ipal ne takat wan isiwaw
wijwipil ipal kwetashti
wan kintakentij
22 wan inak Tutajwan ne Teut:
ashan ne takat mukweptuka
ken se tejemet kimati yek wan teyek
wan ashan ma inte kimelawa ne imey
kikwi nusan itakil ne kwawit yultuk
wan yu-kikwa wan yawi yultuk senpa
23 yajika kishtij Tutajwan ne Teut
tik ne yekmil pal Eden
wan kituktij ma tekiti
pak ne tal kanka muishtijtuk
24 kitalultij ne takat
wan kitalij itaneskan ne yekmil Eden
ne Kerubmet wan ne espadaj
tzitzinaka wan muyawalua
kipachiwia ne ujti pal ne kwawit
yultuk
No comments:
Post a Comment