12. Abram wan Lot muajkawket (13:5-18)

Abram wan Lot muajkawket

5 LOT, ne senyawi iwan Abram, nusan kipiatuya ichkatal, wakashmet wan miak tawipanti. 6 Chikitik ne tal pal yejemet musenchantiat, ka ne inpalwan wejwey wan te welituyat musenchantiat. 7 Pejket musujsumat ne tajpiat ne takwalmet ipal Abram iwan ne tajpiat ne takwalmet ipal Lot.

Tik uni tujtunal ne Kanaantekat wan ne Periztekat muchantiat tik ne tal.

8 Abram kilwij Lot:

—Ma te timukwalantikan

naja wan taja

nian itzalan ne mutajtajpiani wan ne nutajtajpiani

ika taja tinuiknew wan naja nimuiknew.

9 Shikita muchi ne tal muishpan

shikupewi nutech

su ka se ladoj, naja ne seuk

wan su ka mumayekkan

naja ka ukse ladoj.

10 Lot tachishki wan kitak muchi ne talyekka inawak ne apan itukay Yarden, ka muchi yaja muajwilia katka kwak Tutajwan inteuk kiwilejtuya Sodom wan Gomora. Yaja ken se yekmil pal Tutajwan, ken ne tal ipal Egipto, hasta tiajsi Tzoar. 11 Lot kishpejpen muchi ne talyekka inawak ne Yarden. Ajkewik ka taneskan wan sejse yejemet ajkewik itech ne iiknew.

12 Abram nakak tik ne tal pal Kanaan. Lot nakak tik ne tejtechan pal ne talyekka wan muchantij itech Sodom. 13 Wan ne takamet ipal Sodom inte yejyek wan kichiwat katka sejse tay sujsul teyek ipal Tutajwan.

14 Tutajwan kilwij Abram kwak Lot tamik kiajkawa:

—Shiajkutachia, shikita

ne kan ashan timuajsi

ka ajkuikpa wan ka tatzinu

ka taneskan wan ka kalakian

15 ika muchi ne tal taja tikita

taja niu-nimetzmaka

wan ne mupilawan pal senpa.

16 Niu-niktalia ne mushinach

ken ne itew ne tal

ka su se weli kipua ne itew ne tal

nusan ne mushinach kipuas.

17 Shu-shinejnemi ijtik ne tal

ka iweyak wan ka ipatawak

ika taja niu-nimetzmaka.

18 Abram kianki ne tawipanti wan walmuchantij tik ne ishtawak ipal Mamre tik Jebron, wan kiketzki ka unkan se tepatznaj ipal Tutajwan.