3 (v2): Kain, Habel wan Shet (4:1-26)

Notes | English translation of v1 | v1 | v2 | Prev | Next

Kain, Habel wan Shet

4

1 KWAK ne takat mutekatuya iwan Jawa isiwaw

weykiski wan kipunij Kain

wan inak Jawa:

nikpishtuk se takat itech Teut

2 kwakuni mukwepki kipunia

ne iikaw, Habel

tajpia katka ne ichkatal Habel

wan Kain tekiti ne mil

3 miak tunal panuket wan se tunal

Kain kalwikak sejse itakil ne mil pal Tutajwan

4 Habel nusan kalwikak se itetakulis

kujkunet pal ne ichkatal wan ne itumakka

Tutajwan kitak Habel wan ne itetakulis [1]

5 wan Kain wan ne itetakulis te kitak

kwalanik Kain sujsul

wetzki ne iishkaliu

6 Tutajwan kilwij Kain:

taika tikwalani?

taika wetztuk ne muishkalyu?

7 anka inte timukwis su tikchiwa tay yek?

wan su te tikchiwa tay yek

ne teyek iten ne kal tejchia

wan taja tiktuktis

melka metzelewia [2]

8 se tunal Kain kilwij Habel ne iikaw [3]

wan kwakuni kan nemituyat tik ne kojtan

Kain muketzki itech Habel wan kimiktij

9 Tutajwan kilwij Kain:

kan nemi Habel muikaw?

inak: inte nikmati

anka naja ninemi

pal niktajpia ne nuikaw?

10 inak: tay tikchijtuk?

wan inak: nikaki

ne iesyu ne muikaw

ijtik ne mil nechtzajtzalia

11 yajika tetekia muwan

pak ne tal ne mutenpeluj

wan kiunik ne iesyu muikaw

itech ne mumey

12 melka titekitis ne tal

intea metztakulis ne itajpal

nujme tiasneki

tiu-tikyawalua ne tal

13 Kain kilwij Tutajwan:

wey ne nukimil

inte niu-niweli

nikselia

14 ika tik ini tunal

tinechtalultia

wejka ne tal

wan ne mutachialis

nujme niasneki

niu-nikyawalua ne tal

wan ashan ká ne yu-nechita

yawi nechmiktia

15 Tutajwan kilwij:

asu ijkiuni tel

ká ne yu-metzmiktia

chikume wipta yawit kitzunkwit

wan Tutajwan kitalilij Kain

se pal muishmati [4]

ma inte yu-kichalua

ká ne kinamiki

16 wan yajki Kain

muchantia wejka Tutajwan

tik ne tal itukay Nod [5]

itaneskan Eden

17 nemik Kain iwan isiwaw wan weykiski wan kipunij Hanok [6]

yajane techanketzani wan kitukaytij ne itechan

kenha ken itukay ne ipiltzin: Hanok [7]

18 nesik se ipiltzin Hanok: Irad

Irad kipishki Mejuyael

Mejuyael kipishki Metushael

wan Metushael kipishki Lamek

19 Lamek munamiktij iwan ume siwat

se itukay Ada

ne seuk itukay Tzila

20 Ada kipunij Yabal ká ne inteku [8]

ne kipiat tawipanti wan takwalmet

21 wan ne iikaw itukay Yubal ká ne inteku

muchi ne tatzutzunat wan tapitzat

22 Tzila yaja nusan kipishki Tubal-Kain

ne kitantia muchi ne tepusti tamej

wan ne ieltiw Tubal-Kain

itukay Naama

23 wan ijkini kinhilwij Lamek ne isiwawan: [9]

Ada wan Tzila, shinechkakikan

isiwawan Lamek, shikakikan tay niu-nina

ka se takat nikmiktij ika nechtzuntek

se piltzin ika nechshutak

24 ka chikume wipta mutzunkwi Kain

wan Lamek chikume pual [10]

25 Adam nemik iwan isiwaw senpa

wan kipunij se piltzin

wan kitukaytij Shet ika inak:

nechmakak ne Teut [11]

ukse nupiltzin ipatka Habel

ne kimiktij Kain

26 wan mupunij nusan ipiltzin Shet

wan kinutzki Enosh [12]

kwakuni pejket kitukaytiat

ne Teut ken Tutajwan [13]

---

[1]Kineki ina ka kichiwilij casoj.

[2]Sujsul uij muchi ne v. 7.

[3]Tay kilwij? Inte tikmatit.

[4]Kineki ina se señal. Inte tikmatit ken ne señal kitalilij.

[5]Te aka kimati kan nemituya Nod. Sejse inat ka inte kanaj. Tik Hebreoj mukaki ken NAD, kwak Kain ina W'HAITI NA' WANAD 'niu-nikyawalua ne tal'.

[6]Hanok: Cast. 'Enoc', Ing. 'Enoch'.

[7]Anka kineki ina ka Kain se techanketzani.

[8]"Inteku" kineki ina ka yaja ne achtu pal uni tekitilis.

[9]Ina ne tamatinimet ka ini se takwikalis pal sujsul ikman. Te aka kimati yek tay panuk ush tay kineki ina ne takwikalis.

[10]Tik ne Hebreoj, ipatka "chikume pual" ina "yeshpual-kashtul-um" (77). Yaja se tapual simbolicoj.

[11]SHET kineki ina 'nechmakak' ush 'nechtalilij'.

[12]ENOSH kineki ina nusan 'takat'.

[13]Tikelnamikikan ka te ina "tutajwan" sute ne itukay Teut ne te tiwelit tinat. Anka ini kineki ina ka kwakuni inteuk inatuyat ka te welit tinat ne itukay.

2 (v2): Adam wan Jawa (2:4b - 3:24)

Notes | English translation of v1 | v1 | v2 | Prev | Next

 

Adam wan Jawa

KWAK Tutajwan ne Teut kichijki tal wan ilwikak [1]

5 kwak inteuk kanaj kwajkwawit tik ne tal

nian se sakat pejtuya mulini ka kojtan

ika Tutajwan ne Teut inte kishinijtuya ne at ijpak ne tal

wan te kanaj takat pal tajpia mil

6 se mishti kisa tik ne tal

ajwi muchi ne taltikpak

7 Tutajwan ne Teut kiekchij ne takat

iwan sukit pal ne tal

kishpitzki tik ne iyak iijiu yultuk

wan ne takat mukwepki yultuk

8 Tutajwan ne Teut kitukak se yekmil [2]

tik Eden nepa Taneskan [3]

wan kitalij tik ne yekmil

ne Takat kiekchijtuya

9 Tutajwan ne Teut kichijki ka mulinket pak ne tal

muchi kwajkwawit yejyek pal tikitat wan titakwat

wan ne kwawit yultuk tik itajku ne yekmil [4]

wan ne kwawit pal tikmatit yek wan teyek [5]

10 ne tik Eden puni se apan

kiajwilia ne yekmil

ka ikuni yaja kupewi

wan kisat nawi at [6]

11 ne se itukay Pishon

kiyawalua se tal itukay Jawila [7]

kan muajsi ne teukwit 12 mas yek

wan tejtet intukay bedolaj wan shojam [8]

13 ne ukse at itukay Gijon

yaja kiyawalua se tal itukay Kush

14 ne yey itukay Jidekel panu tik Taneskan Ashur [9]

wan ne nawi itukay Perat [10]

15 Tutajwan ne Teut

kikwij wan kitalij ne takat

tik ne yekmil pal Eden pal tajpia

wan kituktij ne takat, ina:

16 itech muchi ne kwajkwawit pal ne yekmil,

kilwij, weli titakwa

17 wan ne kwawit pal tikmatit yek wan teyek

maka shitakwa itech

ika su tikwa san timikis

18 Tutajwan ne Teut inak:

te yek ma naka isel ne takat

niu-nikchiwilia se pal nemi iwan

19 kinhishtij itech ne tal wan kinhekchij

muchi ne tekwanit pal ne kojtan

muchi ne pataninit pal ne ejekat

wan kalinwikak iishpan ne takat

pal kita ken yawi kinnutza

wan ken ne takat kinnutza ne takwalmet

ijkiuni ma itukay

20 ne takat kintukaytij

muchi ne tajtakwalmet

ne pataninit pal ne ejekat

wan muchi ne tekwanit pal ne kojtan

wan ipal Adam inte kiajsik se tepalewiani yek [11]

21 Tutajwan ne Teut

kitamin se kuchilis ijpak ne takat

wan kuchki wan kikwij se iumiskwil

wan kitzak ne nakat kan nemituya

22 wan kiketzki ne iumiskwil

kishtilijtuya ne takat

iwan uni kichijki se siwat

wan kalwikak iishpan ne takat

23 inak ne takat: ashan kia

ne umit nuumiu

ne nakat nunakayu

yajini munutzas siwat

ka muishtij itech takat [12]

24 yajika se kiajkawa

ne iteku wan ne inan

wan musalua itech isiwaw

wan mukwepat sanse nakat

25 nakaket inhumeshtin pejpetztituk

ne takat wan isiwaw

wan te ishpinawket

---

[1]"Tutajwan" kineki ina "tutajtzin". Tik ini amat, mutajkwilua ne itukay ne Teut, melka te tinemit pal tinat. Seujseujti mupata ken "el Señor", "the Lord", wan tik Nawat tinat Tutajwan.

[2]Kineki ina se jardin ush se parquej.

[3]Inte aka kimati kan nemituya Eden.

[4]Seujseujti mupata ken "árbol de la vida", "tree of life". Melka te mumati tay yaja, muita ka su se kikwa ne itakil te keman yawi miki.

[5]Nusan te mumati tay ini kwawit, taika mutukak tik ne yekmil, wan tay kineki ina "yek wan teyek".

[6]Nemit miak tay te tikmatit ipanpa ne geografiaj ipal ini taneshtilis.

[7]Te aka kimati kan nemi.

[8]Te tikmatit tay yejemet.

[9]Jidekel = Tigris.

[10]Yaja ne apan itukay Eufrates.

[11]Tik Pewalis, "adam" kineki ina seujseujti "takat" wan seujseujti Adam ne itukay ne achtu takat.

[12]Ina ijkiuni ika tik Hebreojtaketzalis ne "takat" muilwia ISH wan ne "siwat" itukay kenha, ISHA.

3

1 katka ne sea tamatini

pal muchi ne tajtakwalmet

kinchijki Tutajwan ne Teut

yaja ne kuat

wan kilwij ne siwat:

anka ne Teut inatuk

ma inte shitakwakan

tay ipal ne kwajkwawit tik ne yekmil?

2 ne siwat kilwij ne kuat:

ne itakil ne kwajkwawit pal ne yekmil

kia tiwelit tikwat

3 semaya itakil ne kwawit

nemi tik itajku ne mil

inak ne Teut: maka shikwakan

wan maka shikmatukakan

ka su inte san anmikisket

4 ne kuat kilwij ne siwat:

inte anyawit anmikit

5 ka kimati ne Teut ka tik ne tunal

kwak ankikwasket anyu-muishpeluat

anyu-mukwepat ken ne Teut

ka ankimatit yek wan teyek

6 kitak ne siwat ka yektzin ne kwawit

ipanpa ne itakil wan itachialis

wan yek ne kwawit pal tamati

kikwij ne itakil wan takwaj

wan kimakak ne ishulejyu

wan nusan takwaj

7 wan kwak yejemet muishpelujket

kikejketzket ka yejemet pejpetztituk

kijtzunket ijiswayu kuyu amat

kichijket majmashtat pal mutzakwat

8 kwak kikakket Tutajwan ne Teut

pashalua tik ne yekmil ka teutak

ne takat wan isiwaw yajket minayat itech itachialis

tatajku ne kwajkwawit pal ne yekmil

9 Tutajwan ne Teut

kinutzki ne takat, ina:

kan tinemi?

10 inak: kwak nimetzkakik tik ne mil

nimajmawki ika ninemi petztituk

yajika niminashki

11 ká metzneshtilijtuk,

inak, ka tinemi petztituk?

anka tikwajtuk ne itakil ne kwawit

ne nimetztuktij ma inte shikwa?

12 inak ne takat:

ne siwat tiktalijtuk nuwan

yaja nechmakak ne itakil ne kwawit

wan nikwaj

13 Tutajwan ne Teut kilwij ne siwat:

tay tikchijki?

inak ne siwat: ne kuat nechshijshikuj

wan nikwaj

14 Tutajwan ne Teut kilwij ne kuat:

ika tikchijki ini tetekia muwan

ijtik muchi ne takwalmet

wan ijtik muchi tay yultuk tik kojtan

ijpak muijti tinejnemis

wan sukit tikwas sejsenpa

15 teijialis niu-niktalia

ijtik taja wan ne siwat

wan ijtik mupilawan wan ipilawan

yejemet metztzuntapanasket

wan taja tikinhikshikwas

16 wan ini tay kilwij ne siwat:

ne muyulkukulis niu-nikchiwa sea

wan kwak kukunet tiu-tikpunia

yu-metzkukua tetekia

mutaelewilis ipal ne mushulejyu

wan mujpak yu-tatuktia

17 wan ini tay kilwij ne takat:

ika tiktakamatki ne musiwaw

wan itech ne kwawit nimetztuktij

"Maka shu-shikwa", taja tikwaj

yajika ne tal uij pal tikichkwa

tiaw tikujkutia pal titakwa

muchi ne tujtunal senpa

18 mupal yawit mulinit

witzti wan kojtansakat

wan tiaw tikwa talsakat

19 sea mitunis mukwatapal

pal tikwa mutamal

hasta tiu-timukwepa tik tal

ika itech ne tal timuishtij

ka taja semaya tisukit

wan sukit san timukwepas

20 ne takat kitukaytij ne isiwaw Jawa

yaja ne inan muchi tay yultuk [1]

21 Tutajwan ne Teut kinchiwilij ne takat wan ne siwat

wijwipil ipal kwetashti wan kintakentij

22 inak Tutajwan ne Teut:

ne takat mukweptuk ken se tejemet [2]

kimati yek wan teyek

wan pal te kimelawa ne imey

wan kikwi nusan ne itakil ne kwawit yultuk

kikwa wan yultuk senpa

23 kishtij tik ne yekmil pal Eden

wan kituktij ma tekiti

pak ne tal kanka muishtijtuk

24 kitalultij ne takat

wan itaneskan ne yekmil kintalij

ne Kerubmet wan ne espadaj [3]

tzitzinaka wan muyawalua

kipachiwia ne ujti

pal ne kwawit yultuk

---

[1]"Jawa" mukaki ken JAYA ne kineki ina "yultuk" tik Hebreojtaketzalis.

[2]Ne tamatinimet inte kimatit su "tejemet" kineki ina semaya ne Teut ush nusan sejseuk ken ne Teut. Tik ne Bibliaj ina ka semaya nemi sanse teut. Anka ina ijkiuni ka nikan ika ini takutun sujsul pal ikman kwak inteuk mumati katka ka ne Teut semaya se, inat yejemet.

[3]Ne tamatinimet inte kimatit tay ne Kerubmet. Nusan ne "espadaj tzitzinaka wan muyawalua" mukaki ken se ipal ne mitologiaj pal sujsul ikman, wan te aka kimati yek tay kineki ina.

1 (v2): Ken kiketzki ne Teut ne ilwikak wan ne tal (1:1 - 2:4a)

Notes | English translation of v1 | v1 | v2 | Next

 

I. Ne Pewalis

· KWAK PEJKI

Ken kiketzki ne Teut ne ilwikak wan ne tal

1

1 KWAK pejki ne Teut kinketza

ne ilwikak wan ne tal

2 ne tal inte muektalijtuk

takumi ijpak miktan

ejekat pal Teut papataka

ijpak ne at

3 inak Teut ma muchiwa ne tawil

wan muchijki ne tawil

4 kiwelitak Teut ne tawil

kikupej ne tawil itech ne takumi

5 kinutzki ne tawil Tunal

wan ne takumi kinutzki Tayua

tayuakik, tatwik, se tunal

6 inak Teut ma muchiwa se pachantuk

ne tatajku ne at

kikupewa at itech at

7 kichijki ne pachantuk

kikupej ne at itankupa ne pachantuk

itech ne itzunpan ne pachantuk

wan kiane nakak

8 wan kinutzki ne pachantuk Ilwikak

tayuakik, tatwik, ukse tunal

9 inak Teut ma mutepewakan

ne ajat itankupa ne ejekat

pal nesi ne waktuk

wan kiane nakak

10 kinutzki ne waktuk Tal

ne at sentepejtuk kinutzki Weyat

wan kiwelitak ne Teut

11 inak Teut ma shushuknajkisa

ne tal iwan sajsakat

mulinit wan ishkisat

kwajkwawit takilchiwat

kitaliat intakil ken yejemet

kipia ne iish kalijtik

wan kiane nakak

12 kishtij ne tal sajsakat

kisa ne iish ken yejemet

kwajkwawit kitaliat intakil

kipia ne iish ken yejemet

wan kiwelitak ne Teut

13 tayuakik, tatwik, yey tunal [1]

14 inak Teut ma muchiwakan

tajtawil tik ne pachantuk pal ne ilwikak

kinkupewat tunal wan tayua

yejemet pal muishmatit ijilwit

tujtunal wan shijshiwit

15 tajtawil tik ne pachantuk pal ne ilwikak

kitawiluat ne tal wan kiane nakak

16 kichijki ume wey tawil

ne mas wey itekuyu ne tunal

ne chikitik itekuyu ne tayua

iwan ne sitalmet

17 kintalij tik ne pachantuk pal ne ilwikak

kitawiluat ne tal

18 kintuktiat tunal wan tayua

wan kinkupewat tawil wan takumi

wan kiwelitak ne Teut

19 tayuakik, tatwik, nawi tunal

20 inak ne Teut ma kumuni ne at

iwan kumuninimet yultuk

wan pataninimet ma patanikan ijpak tal, [2]

tik ne pachantuk pal ne ilwikak

21 kinketzki ne ajakuat wey [3]

wan muchi tay ujulini yultuk

ne kumuni tik ne at sejse ken sejse [4]

wan muchi ne patani kipia iejtapal sejse ken sejse

wan kiwelitak ne Teut

22 kinteuchij Teut wan inak:

shitajtakiltalikan, shimumiakchiwakan

shiktemakan muchi ne ajat

wan ne tujtutut ma mijmiak pak ne tal

23 tayuakik, tatwik, makwil tunal

24 inak ne Teut ma kishti ne tal

ne yultuk sejse ken sejse,

takwalmet, ulininimet

tekwanimet ipal ne tal sejse ken sejse

wan kiane nakak

25 kinchijki ne tekwanimet

ipal ne tal sejse ken sejse

ne takwalmet sejse ken sejse

muchi ne ujulinit talchi, sejse ken sejse

wan kiwelitak ne Teut

26 inak Teut: tikchiwakan

Takat kenha ken tejemet

ma tatukti ijpak michintal

tujtutut ipal ne ejekat

takwalmet, wan muchi ne tal

wan muchi tay ujulini talchi

27 kiketzki ne takat ken yajasan

kenha ken ne Teut kiketzki

ukich wan siwat kinketzki

28 kinteuchij wan kinhilwij:

shitajtakiltalikan, shimumiakchiwakan

shiktemakan ne taltikpak

shimuchiwakan itejtekuyu

shitatuktikan ijpak michintal

ne tujtutut pal ne ejekat

wan muchi tay ujulini talchi

29 kinhilwij: naja nimetzinmaka

muchi ne sajsakat ishkisat

nemit pak muchi ne tal

wan muchi ne kwajkwawit

kichiwat intakil kipia iish

anmupal pal ankikwat

30 wan pal takwat muchi ne takwalmet

ne tujtutut pal ne ejekat

wan ne ujulinit talchi

ne ijtik yejemet nemi iijiu yultuk

muchi ne kijkilit nikinmaka

wan kiane nakak

31 ne Teut kitak muchi tay kichijtuya

kitak sujsul yek

wan tayuakik, tatwik, ne tunal chikwasen

---

[1]Tik Hebreoj ina "se tunal", "tunal ume", "tunal yey"... Tik Nawat mukaki mas yek kiane.

[2]Ina "pataninimet", tesu "tujtutut", melka nusan kineki ina uni. Sejse kimatit ka anka kineki ina nusan muchi ne tay weli patani, ken ne mujmuyut, ne pajpapalut...

[3]Ne tamatinimet inte kimatit tay yejemet.

[4]"Sejse ken sejse" kineki ina muchi ne clajclasej tekenha.

2

1 mutamijtuyat ne ilwikak wan ne tal

wan muchi tay tik ne taltikpak

2 wan kitamij tik ne tunal chikume

ne itekiw kichijtuya

wan musewij tik ne chikume

ika yekawik itekiw

3 kiteuchij ne Teut ne tunal chikume

wan inak ka wey uni tunal [1]

ka tik yaja sewik itekiw

pal kichiwa muchi tay kiketzki

4 wan ini ne ken ijtuk wan ne ilwikak wan ne tal

kwak yejemet pejket muchiwat

---

[1]Kwak tinat "inak ka wey" tiknekit tinat ka kichijki santificar.