58: Parao kimakak Yosep ne itatuktilis (41:39-52)

Parao kimakak Yosep ne itatuktilis

39 PARAO kilwij Yosep:

—Kwak ne Teut tami metzneshtilia muchi ini, inte kanaj seuk kimati wey wan tamatini ken taja!

40 taja tiu-titatuktia ka nuchan

wan muchi nutechan yu-metztakamati

sema ne nukuijpal nemis mujpak

41 Parao kilwij Yosep:

—Shikita, taja nimetztalijtuk ijpak muchi Egipto.

42 Parao kishtij ne ianilloj tik ne imey wan kishtukak tik ne imey Yosep. Kitalilij kwajkwachti yek wan kiyawaluj ne ikechkuyu iwan teukwit. 43 Kikalaktij Yosep tik ne icarroj ne itepalewiani. Tzajtziket yajket ka iishpan: Abrek! Ijkiuni Yosep muchijki ijpak muchi ne tal ipal Egipto. 44 Parao kilwij Yosep:

—Naja ni Parao ipal Egipto wan nina ka su inte tikneki inte aka yu-kiajkukia nian se imey nian se ikshi ijtik muchi ne tal ipal Egipto.

45 Parao kitukaytij Yosep Tzapnat-Panea. Kinamiktij iwan Asenat ne isiwakunew Poti-Pera, ne palej ipal On. Yosep kiski pashalua tik Egipto.

46 Yosep kipiatuya senpual-majtakti shiwit kwak pejki kipalewia Parao, ne tatuktiani ipal Egipto.

Kwak tamik taketza, kiski pashalua nujme ne tal pal Egiptoj. 47 Ijtik ne chikume shiwit ipal tepewilis, kwak ne tal tamakak wey, 48 kisenputzuj muchi ne takwal pal ne chikume shiwit nemituya tik Egipto wan kitalij ne takwal tik ne tejtechan: ne takwal ipal ne mijmil inawak ne techan kianki tik uni techan. 49 Yosep kitepew sujsul wey tawial hasta muchijki ken ne ashal pal ne weyat; hasta kiajkaw kipua keski nemi ika yajuni intea welituya mupua.

50 Yosep kipishki ume ikunew, kwak intea ajsik ne shiwit pal mayan, iwan Asenat ne ikunew Poti-Pera ne palej ipal On. 51 Yosep kinutzki ne achtu piltzin Menashe ika ina katka ka "ne Teut kichijtuk ka nikelkawa muchi ne nuyulkukulis wan muchi ne ikal ne nuteku". 52 Wan ne seuk kinutzki Epraim, ika "ne Teut nechmakatuk nutakil tik ne tal pal nuuijkayu".

57: Yosep kineshtij ne intejtekimilis Parao (41:14-38)

[Read English translation]

Yosep kineshtij ne intejtekimilis Parao

14 TATUKTIJ Parao ma walmunutza Yosep, wan munelwijket kishtiat tik ne shaput wan kalwikaket. Mushinki Yosep, kipatak ne ikwajkwach wan kalak ichan Parao. 15 Parao kilwij Yosep:

—Niktemikik se temikilis wan te aka weli nechneshtilia. Nitakakik mupanpa, inat ka kwak tami titakaki se temikilis weli tikneshtia.

16 Yosep kinankilij Parao, inak:

—Naja inte, sunte ne Teut yawi nankilia pal kipalewia Parao.

17 Parao kilwij Yosep:

nitemikik ka kwak ninemi tik iten ne Weyapan

18 tik ne Weyapan tejkut chikume wakash

kipiat innakayu wan yejyektzin inweyka

wan pewat kikwat ne ajakat

19 tipan tejkut uk chikume wakash

inte yejyektzin inweyka nian kipiat innakayu

ken inte keman nikitztuk tik muchi Egipto

20 wan ne wakashmet inte yejyek wan te kipiat innakayu

kikwajket ne chikume wakash kipiat innakayu wan yejyektzin

21 kalakket tik ne iijti wan te mumati katka

ka kalakket tik ne iijti

wan muitaket ka inte yejyek ken achtu

nisak 22 wan nimukwepki nitemiki

ka chikume elut kisket

ijpak sanse ikuyu sinti

tejtentuk wan yejyek

23 nemanha uk chikume elut

pijpitzawak wan malachujtiwit

kisket inhipan

24 wan ne ejelut pitzawak malachujtiwit

kitulujket ne chikume yejyek

Nikinhilwij ne tamatinimet wan te aka welik nechneshtilia.

25 Yosep kilwij Parao:

—Ne itemikilis Parao yaja sesan. Ne Teut kineshtilijtuk Parao tay yu-kichiwa.

26 Ne chikume wakash yektzin, yejemet chikume shiwit. Ne chikume elut yektzin, yejemet chikume shiwit. Yaja sanse temikilis.

27 Ne chikume wakash te yejyek pitzawak ne tipan witzet, yejemet chikume shiwit. Ne chikume elut ne pijpitzawak inte kipiat tatka, yejemet ne chikume shiwit witzet ipal mayan.

28 Yajika, ini tay nikilwia Parao: ne Teut kineshtilijtuk Parao tay yu-kichiwa. 29 Ashan witzet chikume shiwit ipal tepewilis nujme Egipto, 30 wan walasket chikume shiwit ipal mayan tipan, wan yu-muelkawa muchi ne tepewilis tik ne tal ipal Egipto; ne mayan yu-kipachua ne tal. 31 Inte yu-mumati ne tepewilis tik ne tal ipanpa ne mayan ka ipan ika sujsul wey.

32 Ipanpa ka Parao mukwepki temiki ukpa, yaja kineki ina ka ina ne Teut ka yaja seguroj, ka yawi muchiwa kiane nemanhachin.

33 Wan ashan, ma kita Parao ká se kimati wey wan ma kitali tatuktia ijpak muchi ne tal. 34 Tay yawi kichiwa Parao, ma kishpejpena ajalguacil nujme Egipto wan ma tajpiakan ne tal tik ne chikume shiwit pal tepewilis. 35 Ma kisenputzukan muchi ne takwal tik ini yejyek shiwit witzet wan ma kitepewakan ne tawial itan itatuktilis Parao pal takwat tik ne tejtechan, wan ma kipachiwikan. 36 Wan ne takwal ma nemi pal tajpiat ipal ne tal tik ne chikume shiwit pal mayan walasket nujme Egipto, pal te puliwi ne tal ipanpa ne mayan.

37 Parao kiwelitak tay inak, wan muchi ne itejtekitini nusan, 38 wan Parao kinhilwij ne itejtekitini:

—Anka muajsi seuk ken ini takat kipia ne ejekatzin ne Teut ijtik yaja?

56: Parao temikik (41:1-13)

[Read English translation]

// KWAK PANUKET

Parao temikik

41

1 KWAK panuket ume shiwit, Parao temikik, wan ini tay temikik:

kwak yaja nemik itech ne Weyapan

2 tik ne Weyapan tejkut chikume wakash

ijishyektzin ka kipiat innajnakayu

pewat kikwat ne ajakat

3 tipan tejkut tik ne Weyapan

uk chikume wakash

pijpitzawak ka tewaktiwit

ajsit innawak ne wakashmet iten ne Weyapan

4 ne wakashmet pitzawak tewaktiwit

kikwajket ne ijishyektzin wakash

Wan isak Parao. 5 Kukuchki senpa wan temikik:

chikume elut kisket

ijpak sanse ikuyu sinti

ujuksik wan yejyek

6 nemanha uk chikume elut

pijpitzawak wan malachujtiwit

kisket inhipan

7 ne ejelut pitzawak malachujtiwit

kitulujket ne chikume yejyek

Walisak Parao wan yaja se temikilis. 8 Ka tapuyawa muyulpitzinij wan tatuktij ma munutzakan muchi ne tamatinimet ipal Egipto. Parao kinhilwij tay ne temikik. Te aka welik kineshtilia Parao. 9 Taketzki ne intekuyu ne copajwikat iwan Parao, inak:

—Ashan nikelnamiki, ka nikelkaw. 10 Parao, kwak kwalanik iwan ne itejtekitini, nechkalaktij ijtik ne tetzakwiluyan ichan ne intekuyu ne tetakwaltianit, naja wan ne intekuyu ne tashkaluanimet. 11 Titemikiket tik sanse tayua naja wan yaja, sejse itemikilis wan sejse itaneshtilis titemikiket. 12 Nemituya ka né se piltzin Ebrayuj, se itekitini ne intekuyu ne tetakwaltianit. Tikilwijket wan techneshtilij ne tay titemikiket, techmakak sejse itaneshtilis, 13 wan ken techneshtilij, kiane muchijki: naja tinechkwepki tik ne nupuestoj wan yajane mupiluj.

55: Yosep kineshtia ne tejtemikilis (40:1-23)

Yosep kineshtia ne tejtemikilis

40

1 SE tunal, ne tekitini ne kalwika katka ne atiluni ipal ne tatuktiani ipal Egipto kichijki se pal naka inte yek iwan ne itekuyu, ne tatuktiani ipal Egipto, wan ne tashkaluani ipal ne tatuktiani kenhaya. 2 Kwalanik Parao inwan ne ujume, ne intekuyu ne copajwikat wan ne intekuyu ne tashkaluanimet, 3 wan kinkalaktij ijtik ne tetzakwiluyan tik ne ikal ne intekuyu ne tetakwaltiat, yaja ne tetzakwiluyan kan nemituya tzaktuk Yosep. 4 Ne intekuyu ne tetakwaltiat kitalij Yosep inwan pal tekiti, wan tekitki inpal, wan nemiket sejse tunal ijkiuni tik ne tetzakwiluyan.

5 Temikiket ne inhumeshtin tik sanse tayua, sejse itemikilis, sejse iwan itaneshtilis: ne copajwikani wan ne tashkaluani kipiatuya ne tatuktiani ipal Egipto ne ijilpituk tik ne tetzakwiluyan. 6 Kwak ajsik Yosep ka tapuyawa wan kinhitak, yejemet mutechtiat, 7 wan kintajtanilij ne tekitinimet pal Parao ka né tik ne tetzakwiluyan ipal ne itekuyu:

—Taika inte nemit yek ne anmuijishkalyu?

8 Kilwijket:

—Titemiktiwit wan te weli muneshtia tay kineki ina ne tutemikilis.

Yosep kinhilwij:

—Ne Teut ne taneshtiani. Shinechilwikan.

9 Ne intekuyu ne copajwikanimet kilwij Yosep tay temiktuk. Kilwij:

—Niktemikik se shukumekat nuishpan 10 wan tik ne shukumekat nemituyat yey majtzal. Mulinket wan shuchikisket, kitalijket ne itakil wan uksik ne itakil. 11 Nikpiatuya ne iatiluni Parao tik ne numey. Nikwij ne itakil shukumekat wan nikalaktij ne iayu ijtik ne iatiluni Parao. Niktalij ne atiluni tik ne imey Parao.

12 Yosep kilwij:

—Ini ne itaneshtilis. Ne yey majtzal, yejemet yey tunal. 13 Ijtik yey tunal Parao yu-metzpupulwia, yu-metzkwepa tik ne mupuestoj wan tiu-tikwika ne iatiluni itech Parao wan tiu-tiktalia tik ne imey ken katka kwak taja tiicopajwikani. 14 Yajika, su tinechelnamiki nikan muwan kwak tinemi yek, nimetztajtani ma shikchiwa se nupal: shikelnamiktilia Parao nupanpa wan shinechmakishti tik ini tetzakwiluyan, 15 ika nechichtekket tik ne tal pal ne Ebrayujmet, wan nusan ka nikan inte nikchijki tatka pal nechshaputukat.

16 Ne intekuyu ne tashkaluanimet kitak ka taneshtij yek wan kilwij Yosep:

—Naja nusan, niktemikik yey chikiwit ijpak nutzuntekun. 17 Ijtik ne chikiwit pal ikajku nemituyat muchi ne tay ajajwiak ipal se Parao tay kichiwa se tashkaluani. Ne tujtutut kikwat nemit ne ajajwiak tik ne chikiwit ijpak nutzuntekun.

18 Yosep kilwij:

—Ini ne itaneshtilis. Ne yey chikiwit, yejemet yey tunal. 19 Ijtik yey tunal Parao yu-metztzunkutuna wan yu-metzpilua tik se kwawit wan ne tujtutut yu-kikwat ne munakayu.

20 Kwak panuket yey tunal, yaja ne tunal kwak nesik Parao, kichijki se yualu ipal muchi ne itejtekitini. Yaja kishpejpen ne intekuyu ne copajwikanit wan ne intekuyu ne tashkaluanit ijtik muchi ne itejtekitini. 21 Kikwepki ne intekuyu ne copajwikanit tik ne ipuestoj, wan yajane kitalij ne atiluni tik ne imey Parao. 22 Ne intekuyu ne tashkaluanit kipiluj ijkiunisan ken kinneshtilijtuya Yosep. 23 Ne intekuyu ne copajwikanit inte kielnamik Yosep ika kielkaw.

54: Yosep ichan Potipar (39:1-23)

Yosep ichan Potipar

39

1 KIWIKAKET Yosep ka Egipto wan kikujki Potipar ne itekitini Parao wan ne achtu itetakwaltiani; ini Egiptojtekat kinkuilij ne Ishmaeltekat ne kalwikatuyat ka né.

2 Tutajwan nemik iwan Yosep

wan muchi kiski yek

wan yaja nakak ichan

n' itekuyu Egiptojtekat

3 n' itekuyu kitak

ka Tutajwan nemi iwan

ika muchi tay kichiwa

ipanpa Tutajwan kisa yek

4 Potipar kitak yek n' itekiw Yosep

kiajkaw tatuktia ijpak n' ikal

wan muchi tay kipiatuya

kitalij tik n' ijimey

5 kwak pejki tatuktia ijpak ne kal

wan muchi tay kipiatuya

Tutajwan kiteuchij n' ikal

ne Egiptojtekat ipanpa Yosep

ne teteuchiwalis ipal Tutajwan

nemik tik muchi tay ipal

ne tay kipiatuya tik ne kal

wan kipiatuya tik ne mil

6 kiajkaw muchi tay ipal

tik n' ijimey Yosep

nian kimati tatka sute tay kikwa nemi

ishyektzin n' iishkalyu wan n' iweyka Yosep

7 se tunal tachishki

n' isiwaw n' itekuyu

yaja kitak Yosep wan kilwij:

shiwi shikuchi nuwan!

8 yaja inte kinekik wan kilwij

n' isiwaw n' itekuyu:

nutekuyu inte kimati nuwan tay nemi tik n' ikal

muchi tay kipia kitalijtuk tik nujnumey

9 yaja inte mas wey tik ne kal que naja

wan nechmaka muchi sunte taja

ika taja tiisiwaw, wan ken niweliskia

nikchiwa ijkiuni tay inte yek pal ne Teut?

10 pejki kilwia Yosep

ijkiunisan mujmusta

wan te kichiwilia casoj

ma muteka iwan, ma senkuchikan

11 se tunal ijkiuni Yosep kalakik

tik ne kal kichiwa n' itekiw

wan nian se pal ne takamet

pal ne kal nemituya ne

12 ne siwat kitzkij n' iwipil

wan kilwij: shikuchi nuwan!

kiajkaw n' iwipil tik n'imey

wan chuluj wan kiski tatenpan

13 kwak ne siwat kitak

ka kiajkaw n' iwipil tik n' imey

wan chuluj wan kiski tatenpan

14 yaja kinnutzki ne takamet ka ichan wan kinhilwij:

shikitakan, kalwikak se Ebrayuj

pal techawiltia

kalak nutech pal muteka nuwan

wan naja nitzajtzik wey

15 melka uni

kwak nechkakik nitzajtzi wey

kiajkaw n' iwipil nunawak

wan chuluj wan kiski tatenpan

16 kianki n' iwipil iwan

hasta walaj n' ishulejyu ka ichan

17 wan taketzki iwan

wan kilwij ipanpa Yosep:

kalak nutech ne tekitini Ebrayuj talwikak

pal nechawiltia

18 wan kwak nipejki nitzajtzi

kiajkaw n' iwipil nunawak wan kiski

19 kwak n' itekuyu takakik

tay inak n' isiwaw

ka ijkiuni nechchiwilij ne mutekitini

yaja sujsul kwalanik

20 n' itekuyu kikwij Yosep

wan kikalaktij tik ne tetzakwiluyan

kan nemit ne ijilpituk ipal ne tatuktiani

wan né nakak tzaktuk

21 Tutajwan nemik iwan Yosep

wan senpa kitasujtak

kichijki ka nakak yek

iwan n' itekuyu ne tetzakwiluyan

22 n' itekuyu ne tetzakwiluyan

kitalij tik imey Yosep

muchi ne ijilpituk tik ne tetzakwiluyan

wan muchi tay muchiwa ka né, yaja ne kichiwa

23 n' itekujyu ne tetzakwiluyan

inte tachia katka tay kichiwa yaja

ika Tutajwan nemituya iwan

wan tay ne yaja kichiwa kisa yek ipanpa Tutajwan

53: Ken ijtuk iwan Tamar (38:1-30)

[Read English translation]

Ken ijtuk iwan Tamar

38

1 TIK uni tujtunal

Yuda yajki wejka n' ikniwan

wan kiketzki n' ikal

itech se Adulamtekat itukay Jira

2 Yuda kishmatki ka né

n' isiwapiltzin se Canaantekat itukay Shua

munamiktijket

wan senkuchket

3 ijtiweykiski wan kipunij se piltzin

wan kitukaytij Er

4 weykiski senpa wan kipunij ukse piltzin

wan kitukaytij Onan

5 mukwepki weykisa wan kipunij se piltzin

wan kitukaytij Shela

nemituya tik Kezib

kwak yaja nesik

6 Yuda kinamiktij ne achtu piltzin

iwan se siwat itukay Tamar

7 Tutajwan inte kitak yek ini achtu ipiltzin Yuda

wan Tutajwan kimiktij

8 Yuda kilwij Onan ma munamikti

iwan n' isiwaw n' iechkaw

pal naka ken muneki

ipal n' ishinach n' iechkaw

9 Onan kimati katka ka ne kunet te yawi ipal

yajika senpa kwak senkuchi iwan ne isiwamun

kitamima talchi n' ishinach

pal te kimaka ipilawan n' iechkaw

10 Tutajwan inte kitak yek uni tay kichijki

wan nusan kimiktij

11 wan Yuda kilwij Tamar ne siwamunti

ma mukwepa ichan n' iteku

hasta kwak yu-weya Shela n' ikunew

ika inak: pal te yu-miki yaja ken n' iechkawan

wan yajki Tamar

mukwepki ichan n' iteku

12 panuket miak tunal wan mikik

n' isiwakunew Shua, n' isiwaw Yuda

kwak Yuda tamik chuka

yajki itech n' ichkashimanimet

13 kwak kilwijket Tamar ka n' imun

yasneki Timnat kishima n' ichkatal

14 yaja kishtij n' ikwajkwach lamajtzin

wan pal te aka kishmati mutzak iwan se kwachtzin

mutalij tik ne plazaj itukay Ume Pozaj

ne nemi tik ne ujti pal Timnat

ika kishketzki ka Shela weytuka

wan teuk kinamiktijtuk

15 Yuda kitak wan kimatki ka yaja se tzinkekesh

ika kitzaktuya n' ishkalyu

16 muishkwepki itech tik ne ujti wan inak:

nikneki nikuchi muwan

ika inte kimatki

ka yaja n' isiwamun

yaja inak: tay tiu-tinechmaka

pal tikuchi nuwan

17 inak: naja niu-nimetzmaka

se kunet pal ne cabrajtal

inak: sema su tinechajkawilia se tay mupal

hasta ma shinechmaka

18 inak: katiawel ne tay niweli nimetzajkawilia?

inak: ne mutimbrej wan ne mutupil tikpia

kiajkawilij wan kuchki iwan

wan yaja ijtiweykiski iwan

19 muketzki, yajki

kishtij n' itzunkwachtzin

wan kitalij

n' ikwajkwach lamajtzin

20 Yuda kituktij ne cabrajkunet

itech imey n' ikunpa ne Adulamtekat

pal kikwi ne tay kiajkawilijtuya

wan te welik kiajsi!

21 kintajtanilij ne nepa chanejket:

kan nemi ne mutzinnamakani tik ne ujti ka Ume Pozaj?

kilwijket: te keman nemik

se mutzinnamakani ijkiuni

22 mukwepki itech Yuda wan inak:

inte nikajsik yajuni

wan ne nepa chanejket nusan nechilwijtiwit

ka te keman nemik uni mutzinnamakani

23 Yuda inak: ma naka ijkiuni tel

ika asu inte yawit techpakiliat

naja niktuktij ini cabrajkunet

wan taja inte tikajsik

24 kwak panutiwit achka yey metzti kilwijket Yuda:

mutzinnamakak Tamar ne musiwamun

wan ijtiweykiski kwak mutzinnamakak

inak Yuda: shalishtikan wan ma mutati!

25 kalishtijket wan tatuktij pal kilwiat n' imun:

niweykiski iwan se takat ne ini ipal

shikita su tikishmati ká ipal

ini timbrej wan ini mutupil!

26 Yuda kinhishmatki wan inak:

yajini kipia mas wey razon que naja!

ika inte niknamiktij

iwan Shela ne nukunew

inte mukwepki senkuchi iwan

27 wan kwak ajsik ne tunal pal tapunia

kukunetzitzin chachawat

nemituyat ijtik n' iijti

28 kwak yawi tapunia

se yejemet kishtij n' imey

ne tepalewiani kikwij

wan kilpij se ichti chiltik

inak: yajini ne achtu punijtuk

29 kwak yaja kikalaktij n' imey

kiski n' iikaw wan ne tepalewiani inak:

ken tiktapan mupal!

wan kitukaytij Peretz

30 tipan kiski n' iikaw

kipiatuya tik n' imey ne chiltik

wan kitukaytij Zera.

52: Kilwijket Yakob ka Yosep miktuk (37:29-36)

Kilwijket Yakob ka Yosep miktuk

29 MUKWEPKET Reuben ka shaput wan Yosep intea kanaj

Reuben mukwachtzajtzayan

30 mukwepki tech n' iikawan wan inak:

ne piltzin inte nemi ne, wan naja kan niu-nimuishtuka?!

31 kikwijket n' iwipil Yosep

kimiktijket se cabrajkunet

wan kimatiluj n' iwipil

iwan esti

32 kititanijket ne wipil kwikwiltzin

wan kalwikaket itech n' inteku

inaket: tikajsitiwit ini

shikita su tikishmati n' iwipil ne mupiltzin ush inte

33 yaja kishmatki

inak: ini n' iwipil ne nupiltzin

se tekwani pal ne kojtan kikwajtuka

intea yultuk Yosep

34 mukwachtzajtzayan Yakob

mutakentij iwan ikwach kushtal

wan chukak ipanpa n' ipiltzin

sujsul miak tunal

35 muchi n' ipilawan wan n' isiwapilawan

kiejekujket kipaktia n' iyulu

wan te kinekik muyulpaktia, inak:

niasneki nichuka ka miktan itech nupiltzin

ijkiuni chukak chukak

36 ne Midyantekat kinnamakilijket

ne Egiptojtekat Yosep

kinamakilijket se itekitini Parao

ne achtu itetakwaltiani itukay Potipar

51: Yosep tik Dotan (37:12-28)

Yosep tik Dotan

12 KWAK n' iechkawan yajket tik Shekem

tajpiat ne takwalmet pal n' inteku

13 Israel kilwij Yosep: —niu-nimetztuktia tikpalewia—

Yosep kilwij: —nikan ninemi—

14 shu-shikita —kilwij— su ne muechkawan

wan ne takwalmet nemit yek

wan tiu-tinechilwia— wan kititanij wan kiski

ne vallej pal Jebron wan ajsik Shekem

15 se takat kinamik kwak kiyawalua ne kojtan

wan kitajtanilij tay kitemua

16 kilwij: ne nuechkawan nikintemua

shinechilwi kan tajpiat nemit

17 inak ne takat: yajtiwit

ika nikinkakik inat:

tiawita Dotan

yajki Yosep wan kinhajsik tik Dotan

18 kitaket kwak witz wejka

wan kwak intea ajsik intech

pejket sentaketzat

ken yawit kimiktiat

19 yejemet muilwijket:

uni witz yajane!

ne temikini

yu-ajsi ka nikan!

20 tiu-tikmiktiat

tiu-tiktamutat tik se shaput

tiu-tinat ka se tekwani kikwajtuk

wan tiu-tikitat ken ijtuk iwan ne temiktuk!

21 Reuben kinkakik

wan kinekik kipalewia

yajika inak:

ma inte tikmiktikan

22 ma inte tikshinikan esti —kinhilwij—

shiktamutakan tik uni shaput tik ne kojtan

maka shikmatukakan—

inak pal weli kinhishtilia wan kikwepilia n' iteku

23 kwak ajsik Yosep intech n' iejechkawan

kishtilijket n' iwipil ne kwikwiltzin kiwika

24 kikwijket ne piltzin wan kitamutaket tik ne shaput

wan tik ne shaput inte kanaj nian at nian tatka

25 kwak mutalijket takwat tachishket wan kitaket

sejse Ishmaeltekat witzet Gilad

n' incamellojmet kiwikat sejse pal kinamakat

wan temuket yajket Egipto.

26 Yuda kinhilwij n' iechkawan:

taika tiu-tikmiktiat

wan tiu-tikinayat

n' iesyu ne tuikaw?

27 tiawit tikinnamakiliat ne Ishmaeltekat

wan te tiu-tikmiktiat iwan ne tumey

ika ne tuikaw yaja tunakayu—

wan yejemet kikakket

28 panuket sejse takat pal Midyan, tanamakanimet

kitilanket Yosep wan kitejkultijket tik ne shaput

yejemet kinnamakilijket ne Ishmaeltekat

ka senpual tumin, wan kalwikaket ka Egipto

50: Ne temikini (37:1-11)

[Read English translation]

V. Yosep

····/ MUCHANTIJ

Ne temikini

37

1 YAKOB muchantij tik ne tal kan nakatuyat ne itejteku tik ne tal ipal Canaan, 2 wan yaja ken ijtuk iwan Yakob.

Kwak Yosep kipiatuya kashtul-ume shiwit, tajpia katka ne ichkatal iwan ne iejechkawan. Yaja kipalewia katka ne ipijpilawan Bilha wan ne ipijpilawan Zilpa, ne isijsiwawan ne inteku. Yosep kilwia katka ne iteku tay yejemet kichiwat tay inte yek.

3 Israel kitasujta Yosep sujsul

ijtik muchi n' ipilawan

ika nesik kwak chulet

yajika kitakulij se wipil kwikwiltzin

4 n' iechkawan kitaket ka yajasan

n' inteku sea kitasujta

kishijishket nian welituyat

taketzat yek ipanpa

5 yaja temikik wan kinhilwij

wan kishijishket chiupiuk

6 yaja kinhilwij: shitakakikan

ini tay nitemiktuk

7 tejemet titapishkat ne mil

ne nusin ejkatuk melawak

ne anmusijsin mupustektiwit

mutankwaketzat iishpan ne nusin

8 n' iechkawan kilwijket: tay tina?

tiu-titechtekimaka wan tiu-titechtuktia?

wan mukwepket kishijiat ukchiupi

ipanpa tay temikik wan taketzki

9 nusan temikik senpa

wan mukwepki kinhilwia n' iejechkawan:

nitemikik wan ne tunal wan ne metzti

wan majtakti-se sital mutankwaketzat nuishpan

10 yaja kilwij n' iteku wan n' iechkawan

wan n' iteku nusan kiajwak, ina:

tay ini titemikik ka naja

wan ne munan wan muechkawan

muchi anka tiu-tiajsit

timutankwaketzat muishpan?

11 n' iechkawan kipiatuyat envidiaj

wan n' iteku kijkejketzki ipanpa

49: Ne fajfamiliaj pal ne Edomtekat (36:1-43)

Ne fajfamiliaj pal ne Edomtekat

36

1 INI ken ijtuk iwan Esaw, nusan itukay Edom. 2 Esaw munamiktij inwan siwatket ipal Kanaan: Ada ne ikunew Eylon ne Jettekat, Oholibama ne ikunew Ana ne ikunew Tzibon ne Jiwitekat 3 wan Basmat ne ikunew Ishmael ne ieltiw Nebayot.

4 Ada kipunilij Esaw Elipaz, Basmat kipunij Reuel 5 wan Oholibama kinpunij Yush, Yalam wan Kora. Uni ne ipilawan Esaw kinpishki tik ne tal pal Kanaan.

6 Esaw kinkwij ne isiwawan, ne ipilawan, ne isiwapilawan wan muchi ne imiakwan ka ichan wan ne takwalmet kipiatuya wan muchi ne ipalwan ne kiantuya tik ne tal pal Kanaan, wan yajki se tal wejka itachialis Yakob ne iikaw, 7 ika sujsul wejwey ne inpalwan wan te welit musenchantiat, wan ne tal kan nemituyat inte welituya kinmaka tay munekit ipanpa ne takwalmet. 8 Yajika, Esaw kichijki ne ikal tik ne tepetal pal Seir. Ne Esaw yaja Edom.

9 Wan ini ken ijtuk iwan Esaw, ne iteku ipal Edom, tik ne tepetal pal Seir. 10 Ini ne intujtukay ne ipilawan Esaw: Elipaz ne ikunew Ada ne isiwaw Esaw, wan Reuel ne ikunew Basmat ne isiwaw Esaw. 11 Ne ipilawan Elipaz, yejemet Teman, Omar, Tzepo, Gatam wan Kenaz. 12 Timna katka se iawil Elipaz ne ikunew Esaw, wan yaja kipunilij Amalek. Uni ne iishwiwan Ada ne isiwaw Esaw.

13 Ini ne ipilawan Reuel: Najat wan Zera, Shama wan Miza. Yejemet ne iishwiwan Basmat ne isiwaw Esaw.

14 Wan ini ne ipilawan Oholibama ne ikunew Ana ne ikunew Tzibon, ne isiwaw Esaw. Yaja kipunilij Yush wan Yalam wan Kora.

15 Yajini tel ne fajfamiliaj pal ne iishwiwan Esaw:

Ne ipilawan Elipaz ne iachtu Esaw, yejemet ne fajfamiliaj Teman, Omar, Tzepo, Kenaz, 16 Kora, Gatam wan Amalek. Yejemet ne fajfamiliaj pal Elipaz tik ne tal pal Edom. Yejemet ne ipilawan Ada.

17 Wan ini ne ipilawan Reuel ne ikunew Esaw: ne fajfamiliaj Najat, Zera, Shama wan Miza. Yejemet ne fajfamiliaj pal Reuel tik ne tal pal Edom. Yejemet ne ipilawan Basmat, ne isiwaw Esaw.

18 Wan ini ne ipilawan Oholibama ne isiwaw Esaw: ne fajfamiliaj Yush, Yalam wan Kora. Yejemet ne fajfamiliaj ipal Oholibama ne ikunew Ana, ne isiwaw Esaw.

19 Muchi ini ne ipilawan Esaw. Yejemet ne infajfamiliaj, wan yaja Edom.

20 Ini ne ipilawan Seir ne Jortekat, ne chanejket ipal ne tal: Lotan, Shobal, Tzibon, Ana, 21 Dishon, Etzer wan Dishan. Yejemet ne fajfamiliaj ipal ne Jortekat, ne ipilawan Seir ijtik ne tal pal Edom.

22 Ne ipilawan Lotan Jori wan Hemam, wan ne ieltiw Lotan Timna. 23 Ini ne ipilawan Shobal: Alwan, Manajat, Ebal, Shepo wan Onam. 24 Ini ne ipilawan Tzibon: Aya wan Ana. Ini ne Ana ne kiajsik at tik ne kojtan kwak tajpia nemi ne bujburroj ipal Tzibon ne iteku. 25 Wan ini ne ipilawan Ana: Dishon wan Oholibama ne ikunew Ana. 26 Ini ne ipilawan Dishon: Jemdan, Eshbon, Itran wan Keran. 27 Ini ne ipilawan Etzer: Bilhan, Zawan wan Akan. 28 Ini ne ipilawan Dishon: Utz wan Aran. 29 Ini ne fajfamiliaj pal ne Jortekat: ne fajfamiliaj Lotan, Shobal, Tzibon, Ana, 30 Dishon, Etzer, Dishan. Yejemet ne fajfamiliaj pal ne Jortekat, ne infajfamiliaj, tik ne tal pal Seir.

31 Ini ne tatuktianimet ne tatuktijket tik ne tal pal Edom kwak inteuk tatuktij tatuktiani pal ne ipilawan Israel: 32 tatuktij tik Edom Bala ne ikunew Beor, ne itukay ne itechan Dinhaba. 33 Kwak mikik Bala, ipatka tatuktij Yobab ne ikunew Zera ne walaj Botzra. 34 Kwak mikik Yobab, ipatka tatuktij Jusham ne walaj ne tal pal ne Temantekat. 35 Kwak mikik Jusham, ipatka tatuktij Hadad ne ikunew Bedad ne kichaluj Midyan tik ne taltakutun pal Moab, wan ne itukay ne itechan Awit. 36 Kwak mikik Hadad, ipatka tatuktij Simla ne walaj Masreka. 37 Kwak mikik Simla, ipatka tatuktij Shaul ne walaj Rejobot-ha-Nahar. 38 Kwak mikik Shaul, ipatka tatuktij Baal-Janan ne ikunew Akbor. 39 Kwak mikik Baal-Janan ne ikunew Akbor, ipatka tatuktij Hadar, ne itukay ne itechan Pau wan ne itukay ne isiwaw Mehetbeel ne ikunew Matred ne ikunew Me-Zahab.

40 Yajika, ini ne itujtukay ne fajfamiliaj pal Esaw wan kanka walajket wan ne intujtukay: ne fajfamiliaj Timna, Alwa, Yetet, 41 Oholibama, Ela, Pinon, 42 Kenaz, Teman, Mibtzar, 43 Magdiel, Iram. Ini ne fajfamiliaj pal Edom ken muchantiat kan kipiat tal, wan Esaw ne iteku pal Edom.

48. Sejseuk ipanpa Yakob, mikik Itzak (35:21-29)

Sejseuk ipanpa Yakob, mikik Itzak

21 YAJKI Israel wan kisujki ne tawipanti kwak panuk Migdal-Eder. 22 Kwak mutalijtuya Israel tik uni tal, Reuben yajki muteka iwan Bilha n' iawil n' iteku, wan takakik Israel.

Yakob kipishki majtakti-ume piltzin. 23 N' ipilawan Lea: n' iachtu Yakob Reuben, Shimon, Lewi, Yuda, Ishakar wan Zebulun. 24 N' ipilawan Rajel: Yosep wan Benyamin. 25 N' ipilawan Bilha n' icriadaj Rajel: Dan wan Naptali. 26 N' ipilawan Zilpa n' icriadaj Lea: Gad wan Asher. Yejemet n' ipilawan Yakob nesket tik Padan-Aram.

27 Ajsik Yakob ichan Itzak n' iteku tik Mamre, tik Kiryat-Arba ne ashan Jebron, kan muchantijket Abraham wan Itzak. 28 Ne tujtunal ipal Itzak sentzunti wan nawpual shiwit. 29 Sewik Itzak wan mikik wan yajki itech n' ikniwan kwak chulet wan tamiket ne tujtunal pal nemi yultuk, wan Esaw wan Yakob, n' ipilawan, kitalpachujket.

47. Nesik Benyamin, mikik Rajel (35:16-20)

Nesik Benyamin, mikik Rajel

16 KISKET tik Bet-El

wan kwak kinekiuk pal ajsit ka Eprat

tapunij Rajel wan uij ne tapunilis

17 kwak kipishki uijkayu pal tapunia

ne siwat kipalewia tapunia kilwij:

maka shimajmawi, ukse piltzin tikpia

18 wan kwak Rajel yawi miki

kinutzki n' ipiltzin Ikunew Nukukulis

wan n' iteku kitukaytij Benyamin

19 mikik Rajel

wan kitalpachujket tik ne ujti ka Eprat

ashan itukay Bet-Lejem

20 Yakob kiketzki se teelnamiktilijka ipal Rajel itech n' ishapu. Yaja n' iteelnamiktilijka n' ishapu Rajel hasta ini tunal.

46. Yakob mukwepki ka Betel (35:1-15)

Yakob mukwepki ka Betel

35

1 NE Teut kilwij Yakob:

shimuketza, shitejku Bet-El wan shinaka ka ne

shikchiwa ka ne se tepatznaj ipal ne Teut El

ne muneshtij kwak tichuluj iishpan Esaw ne muechkaw

2 Yakob kilwij ne ikal

wan muchi ne iwan nemituyat:

shikishtikan ne tepal teujteut anmutzalan

shimupupukan wan shikpatakan anmukwajkwach

3 tiakanha, titejkukan Bet-El

ma nikchiwa se tepatznaj ipal El

ne nechnankilij kwak uij katka

wan nemik nunawak tik muchi ne ujti

4 kimakaket Yakob

muchi ne tepal teujteut kipiatuyat

wan ne ajanilloj tik n' innajnakas

wan Yakob kinnashki itan ne wey kwawit itech Shekem

5 yajket wan ne mawi pal ne Teut

nemik tik ne tejtechan pal nepa

wan te walajket

ipan n' ipilawan Yakob

6 Yakob ajsik Luz

tik ne tal pal Kanaan

yaja Bet-El

Yakob wan muchi n' imiakwan

7 kiketzki ka unkan se tepatznaj

wan kinutzki n' itukay kan nemituya El-Bet-El

ika yaja kan muneshtij ne Teut

kwak chuluj yajki itech n' iechkaw

8 mikik Debora n' ichichiwal Rebeka

kitalpachujket itan Bet-El

itan ne kwawit wey

wan munutzki n'itukay kan nemituyat ne Kwawit Chuka

9 ne Teut muneshtij iishpan Yakob senpa

kwak walajtuya Padan-Aram

ne Teut kiteuchij 10 wan kilwij:

mal timutukay Yakob

intea tiaw timunutza Yakob

ashkan taja mutukay Israel

(wan muilwij Israel)

11 naja ni El-Shaday

shimutakiltali, shimumiakchiwa

se techan wan miak techan

mutech yawit kisat

tatuktianimet

yu-kisat itech mushinach

12 ne tal ne nikinmakak Abraham wan Itzak

taja nimetzmaka

wan ne mupilawan muipan

nikinmaka ini tal

13 ne Teut tejkuk ijpak Yakob

ne kan tanutzki iwan

14 Yakob kiketzki se teelnamiktilijka

ne kan tanutzki iwan

se teelnamiktilijka ipal tet

kichiwilij se tetakulis

kishinij tumakka ijpak

15 Yakob kitukaytij ne kan tanutzki

iwan ne Teut: Bet-El