31. Yakob kishijshikuj Itzak (27:1-45)

[Read English translation]

Yakob kishijshikuj Itzak

27

1 KWAK chulejtiak Itzak

wan intea tachiat ne ijish

kinutzki Esaw n' ikunew wey

kilwij: Nupiltzin. kilwij: Nikan ninemi.

2 inak: Naja nichuleta

wan te nikmati keman niu-nimiki.

3 Ashkan shikana mutajtaiwan

shikwi ne mumit pal titapewia

shu ka kojtan wan shalwika

se tapewil nupal

4 shikmana ken nugustoj

wan shalwika nupal

ma nitakwa wan nimetzteuchiwa

achtu ma niu-nimiki.

5 Rebeka kikakik Itzak

kinutza Esaw n' ikunew

Esaw yajki ka kojtan

kipewia se tapewil pal kalwika

6 Rebeka kilwij Yakob n' ikunew:

Naja nikakik ne muteku

kinutza Esaw ne muechkaw, inak:

7 Shalwika se tapewil nupal

shikmana wan niu-nitakwa

ma nimetzteuchiwa

achtu ma nimiki.

8 Ashan nupiltzin, shinechtakamati

wan shu-shikwi tay niu-nimetztuktia.

9 Shu kan tikpiat ne takwalmet

nimetztajtani ma shalkwi

ume cabrajkunet ajwiak

niu-nikmana ajajwiak

ipal muteku ken yaja igustoj.

10 Tiu-tikwika itech muteku

pal kikwa ma metzteuchiwa

achtu ma miki.

11 Yakob kilwij Rebeka n' inan:

Shikita ka Esaw ne nuechkaw

se takat sea pachon

wan naja nitakat petztik

12 anka yu-nechchijchimi nuteku

yu-nechita ken se teshijshikuani

nalwikas nujpak maldicion, tesu teteuchiwalis!

13 ne inan kilwij: Ne mumaldicion

ma wetzi nujpak, nupiltzin

semaya shinechtakamati

wan shu-shalkwi tay nina.

14 yajki kikwi wan kiwikak itech n' inan

wan n' inan kichijki ne takwal

ken n' iteku igustoj katka

15 Rebeka kikwij

n' ikwajkwach Esaw

n' ikunew wey

ne mas yejyektzin

kipiatuya tik ne kal

wan kitalij ijpak Yakob

n' ikunew chikitik

16 wan iwan n' iewayu

ne cajcabrajtzitzin

kitzak n' ijimey

wan n' ikechkuyu kan petztik

17 wan kitalij ne takwal

wan ne tajtamal kichijki

tik imey Yakob n' ikunew

18 kalwikak itech n' iteku wan inak: Nuteku.

inak: Nikan ninemi, ká taja, nupipil?

19 Yakob kilwij n' iteku:

Naja ni Esaw ne muachtu.

Nikchijtuk ken tinechilwij.

Ashan shimutali tikwa ne nutapewil

wan shinechteuchiwa.

20 Itzak kilwij n' ipiltzin:

Ken ka inte tishtunak tikajsi, nupiltzin?

inak: Ika Tutajwan ne muTeut

ijkiuni kinekik.

21 Itzak kilwij Yakob:

Shiwi ma nimetzchijchimi nupiltzin

asu taja tinupiltzin Esaw ush inte.

22 Yakob tzinkiski itech Itzak n' iteku

yaja kichijchimik wan inak:

ne mukupak ikupak Yakob

wan ne mujmumey ijimey Esaw.

23 wan te kishmatki

ika n' ijimey ken n' ijimey Esaw

pajpachon, wan yaja kiteuchij.

24 kitajtanilij: Taja tinupiltzin Esaw?

inak: Kia naja ne.

25 inak: Shalwika pal nikwa

n' itapewil ne nukunew

ma nimetzteuchiwa.

kalwikak tel wan takwaj

wan kalwikak atata wan kiunik

26 Itzak n' iteku kilwij: Shiwi

shinechtennamiki, nupipil.

27 tzinkiski kitennamiki

wan kiajnekuj n' ikwajkwach

wan kiteuchij wan inak:

Puputuka ne nupiltzin ken puputuka

ne kojtan kiteuchij Tutajwan.

28 Ma metzmaka ne Teut

iajwech n' ilwikak

wan itumakka ne tal.

Ma metztepewili

miak sinti wan yayu.

29 Ma tekitikan muitan chijchinamit,

ma mutankwaketzakan muishpan talmet,

ma shimuchiwa intekuyu mukniwan,

ma mutankwaketzakan muishpan ipilawan ne munan,

ma mutejtenewakan ne metztejtenewat,

yejyektenejtuk ne metzyektenewat!

30 wan kwak Itzak tamik kiteuchiwa Yakob

wan kisa nemi Yakob itech Itzak n' iteku

Esaw n' iechkaw kalak walaj

31 yaja nusan kimanki takwal

pal kalwika itech n' iteku

inak: Ma muketza nuteku, ma kikwa

itapewil n' ikunew ma shinechteuchiwa!

32 Itzak n' iteku kilwij: Ká taja?

inak: Naja nimuachtu Esaw.

33 pejki ijtzilika Itzak tetekia sea

inak: Ká ne kipewijtuk tapewil

ne kalwikak wan nikwaj muchi

achtu ka tiwalaj wan nikteuchij

wan teuchijtuk yu-naka?

34 kwak Esaw takakik tay inak n' iteku

pejki tzajtzi tetekia sea

kilwij n' iteku: Shinechteuchiwa

naja nusan, nuteku!

35 inak: Walaj muikaw

wan nechchiwiltij

wan kikwij ne mubendicion!

36 inak: Anka munutzki Yakob

ma nechawilti ukpa?

Nechishtilija

tay nupal ken achtupunijtuk

wan ashan

kikwijtuk nubendicion!

Inte tikantuk se bendicion nupal?

37 nankilij Itzak, kilwij Esaw:

Shikita, nikchijkia mutekuyu

wan muchi n' ikniwan

niktalij ken itejtekitini

sinti wan yayu niktepewilij

ashan shina

tay nimetzmakas, nupiltzin?

38 Esaw kilwij n' iteku:

Anka semaya tikpia

sanse bendicion, nuteku?

Shinechteuchiwa nusan!

Nuteku!

wan pejki chuka

39 nankilij Itzak n' iteku, kilwij:

Wejka n' itumakka ne tal

yu-muajsi ne mukal

wan wejka n' iajwech n' ilwikak.

40 Iwan muespadaj tinakas yultuk,

itan ne muikaw titekitis,

melka uni, kwak tiu-timuejekua

tiu-tikishtia ijpak mukechtan.

41 Esaw kishijishki Yakob

ipanpa ne bendicion ipal n' iteku

inak Esaw tik iyulu:

Neman tiu-tiktalpachuat nuteku,

niu-nikmiktia Yakob ne nuikaw.

42 wan kilwijket Rebeka tay inak nemik Esaw n' ikunew wey

yaja kalnutzki Yakob n' ikunew chikitik, kilwij:

Esaw ne muechkaw kielewia metzmiktia.

43 Nupiltzin, shinechkaki ashan

shichulu ichan Laban

ne nuechkaw tik Jaran.

44 Shinaka iwan

ankakeski tunal

hasta ma kielkawa ne mumanuj n' ikwalan,

45 hasta ma mupata

n' ishkalyu ne muechkaw

wan kielkawa tay tikchiwilijtuk

wan niu-nimetznawatia

ma shalmukwepa, ika

taika niu-nimetzinpulua

anhumeshtin tik sanse tunal?

30. Itzak yajki Gerar (26:1-35)

Itzak yajki Gerar

26

1 MUCHIJKI ukse mayan tik ne tal senpa, ken ne achtu tik ne tujtunal ipal Abraham. Yajki Itzak itech Abimelek, ne tatuktiani pal ne Paleshtekat tik Gerar. 2 Muneshtij Tutajwan iishpan. Kilwij:

—Maka shu-shitemu ka Egipto. Shinaka tik ne tal niu-nimetzilwia. 3 Shinemi tik ini tal. Niu-ninemi mutech wan niu-nimetzteuchiwa 

ika taja niu-nimetzmaka

muchi ini tajtal

wan niu-niketza

ne tay nikchijki jurar

iwan Abraham ne muteku

4 niu-nikchiwa ne mupilawan

mijmiak ken ne sijsital pal ne ilwikak

niu-nikinmaka ne mupilawan muchi ini tajtal

yawit muyektenewat itech mupilawan

muchi ne tejtechan ipal ne taltikpak

5 ika nechtakamatki Abraham

wan tajpishki muchi nutajtuli

wan muchi tay nitatuktijtuk

6 nakak Itzak tik Gerar

7 wan ne takamet pal ne techan

kitajtanket ipanpa n' isiwaw

yaja inak: "yaja nueltiw"

inte inak "nusiwaw" ika majmawi

"ma inte nechmiktikan" —inak—

"ika Rebeka ishyek"

8 panuket ne tujtunal ka ne

wan se tunal Abimelek

ne tatuktiani pal ne Paleshtekat

muneshtij tik se tentzin wan tachishki

wan kitak Itzak mawiltia

iwan Rebeka n' isiwaw

9 Abimelek kinutzki Itzak

inak: Su yaja musiwaw!

Ken ka tinak: "yaja nueltiw"?

Itzak kilwij: Ika ninak

"Ma inte niu-nimiki ipanpa"

10 inak Abimelek: Tay titechchiwiliskia?

Wan anka su kuchtuskia

se pal tukniwan iwan musiwaw?

Talwikatuskia puliwis tujpak!

11 Abimelek kintuktij muchi ne tekniwan, inak:

Ká ne kimatuka

ini takat wan n' isiwaw

ma kimiktikan!

12 tatukak Itzak tik uni tal

iwan ne se kipishkak sentzunti

wan Tutajwan kiteuchij

13 weytiak ne takat, weytiak yajki

hasta kipiatuya sujsul wey

14 kipiatuya ichkamet, kipiatuya wakashmet

kipiatuya miak tekitini

kishkukulitaket ne Paleshtekat

15 muchi ne ijishat ne kichijket n' itakawan n' iteku

tik ne tujtunal ipal Abraham n' iteku

ne Paleshtekat kitzakket wan kitenket iwan tewti

16 Abimelek kilwij Itzak:

Shitechajkawa ika sea tichikawayatuk tupal.

17 kiski Itzak wan yajki

wan mukawki tik ne ustut ipal Gerar

wan nakak ka ne

18 Itzak mukwepki kichiwa

ne ijishat ne muchijtuyat

tik ne tujtunal ipal Abraham n' iteku

wan ne Paleshtekat kitzaktuyat

kwak mikik Abraham

wan kintukaytij ken n' intujtukay

ne kintalilijtuya n' iteku

19 ne itejtekitini Itzak kichijket

se shaput tik ne ustut

wan kiajsiket ka né se apunian

20 pejket musujsumat ne tajpiat takwalmet ipal Gerar

iwan ne tajpianimet ipal Itzak

inat: Ne at tupal.

Yaja kinuzki n' itukay ne ishat Kwalan

ika kwalanket iwan

21 kichijket ukse ishat

musujsunket ipanpa nusan

wan kinutzki n' itukay Tenewal.

22 yajki ka senkak kichiwa ukse ishat

inte musujsunket ipanpa

wan kinutzki n' itukay Rejobot, wan inak:

Ika ashkan techpatawilijtuk Tutajwan

tiu-timumiakchiwat tik ne tal!

23 kiski wan tejkuk ka Beer-Sheba

24 muneshtij Tutajwan iishpan ka tayua

wan inak:

Naja ne Teut

ipal Abraham ne muteku

maka shimajmawi

ika muwan ninemi

niu-nimetzteuchiwa

wan nikchiwas mijmiak

ne mupilawan

ipanpa Abraham

ne nutekitini!

25 kiketzki ka unkan se tepatznaj

kinutzki n' itukay Tutajwan

kisujki ka unkan ne tawipanti

wan n' itejtekitini Itzak

pejket kichiwat ka unkan se ishat

26 Abimelek kiski Gerar wan ajsik itech

iwan Ajuzat n' ikunpa

wan Pikol n' intekuyu ne tasumanimet

27 Itzak kinhilwij: Taika anhajsitiwit nutech?

Su anmejemet annechishijiat

wan annechtalultijtiwit!

28 inaket: Ika tikitat

ka nemi Tutajwan muwan;

yajika tinat ma nemi se pactoj

tutzalan, itzalan tejemet wan taja

wan timuketzakan se sentaketza muwan

29 ka inte tiu-titechchiwilia tay inte yek

wan te tiu-timetzmatukat

kenha ken sema tikchijtiwit tay yek muwan

wan timetzajkawtiwit tinejmachnemi

wan ashan ma metzteuchiwa Tutajwan!

30 kichijki se yualu inpal

wan takwajket wan atiket

31 muketzket ka tapuyawa

wan kichijket jurar

Itzak kitujtukak wan yajket ken yek

32 tik uni tunal ajsiket

ne itejtekitini Itzak

kineshtilijket ipanpa ne ishat

ne kichiwat nemit

wan inaket:

Tikajsitiwit at!

33 kinutzki ne ishat:

Juramentoj

wan yajika ne techan

itukay Beer-Sheba

(Ishat Juramentoj)

hasta ini tunal.

34 Kwak Esaw kipiatuya unpual shiwit munamiktij iwan Yudit, ne ikunew Beeri ne Jettekat, wan iwan Basmat, ikunew Eylon ne Jettekat. 35 Wan inpanpa chichiktiak inyulu Itzak wan Rebeka.

29. Nesket Esaw wan Yakob (25:19-34)

III. Itzak

·/ KEN IJTUK

Nesket Esaw wan Yakob

19 INI ken ijtuk iwan Itzak ne ikunew Abraham: Abraham kipishki Itzak, 20 wan Itzak kipiatuya unpual shiwit kwak munamiktij iwan Rebeka, ne ikunew Betuel ne Aramtekat ipal Padan-Aram, ne ieltiw Laban ne Aramtekat. 21 Itzak mutajtawelij iwan Tutajwan ipanpa ne isiwaw ika yaja inte kipishtuya ipilawan. Tutajwan kikakik wan ijtiweykiski Rebeka ne isiwaw.

22 Musunket ne kukunew tik ne iijti. Yaja inak:

—Su ijkiuni, taika ninemi!

Yajki kitajtanilia Tutajwan. 23 Tutajwan kinankilij, inak:

—Ume techan tikpia tik muijti

ume nacion yu-kisat tik mushinach

se nacion ijpak seuk welis

wan ne wey itan ne chikitik nemis.

24 Kwak ajsituk ne tunal pal tapunia, kipishki chachawamet. 25 Kiski ne achtu chiltiknaj, ken se itaken pachon nujme ne iweyka, wan kitukaytijket Esaw.

26 Tipan kiski ne iikaw, wan ne imey kitzkia ne itzunteyu ikshi Esaw, wan kitukaytijket Yakob. Itzak kipiatuya yeshpual shiwit kwak nesket.

27 Weytiaket ne piltzitzinmet wan Esaw muchijki se yek tapewiani igustoj ne kojtan. Yakob mas yek se takat nejmachnemi wan naka ijtik ne kal. 28 Itzak kinekik Esaw ika kitasujta ne tapewil; Rebeka kinekik Yakob.

29 Yakob kimanki et

Esaw walaj ne kojtan

yaja kujkutia

30 Esaw kilwij Yakob:

—Nimetztajtani shinechtakwalti

yajuni chiltik chiltik

ika naja nikujkutia

(Yajika muilwia ne itukay Edom.) 31 Inak Yakob:

—Shinechnamakili achtu tay mupal ken achtupunijtuk.

32 Inak Esaw:

—Nikan ninemi ka niaw nimiki, tay ipatiw ne nupal ken achtupunijtuk?

33 Inak Yakob:

—Shikchiwa jurar achtu.

Kichijki jurar. Kinamikilij tay ipal ken achtupunijtuk Yakob.

34 Yakob kimakak Esaw

tajtamal iwan emanti

takwaj, atik,

muketzki, yajki,

wan te tajpishki Esaw

tay ipal ken achtupunijtuk.

28. Ken tamiket Abraham wan Ishmael (25:1-18)

Ken tamiket Abraham wan Ishmael

25

1 ABRAHAM mukwepki munamiktia. Ne ukse siwat itukay Ketura. 2 Yaja kipunij Zimran, Yokshan, Medan, Midyan, Yishbak wan Shua. 3 Yokshan kipishki Sheba wan Dedan. Ne ipilawan Dedan ne Ashurtekat, ne Letushtekat wan ne Leumtekat. 4 Ne ipilawan Midyan Eypa, Eper, Janok, Abida wan Eldaa. Ini muchi ne ipilawan Ketura.

5 Abraham kiajkawilij Itzak muchi tay ipal. 6 Ne inpilawan ne iajawil, kinmakak tejtetakulis wan kintuktij ka senkak, wejka Itzak ne ipiltzin, kwak kenhayuk yultuk, ka taneskan, tik ne tal pal taneskan.

7 Ini ne tujtunal pal ne shijshiwit keman Abraham yultuk: sentzunti-yeshpual-kashtul shiwit. 8 Sewik wan mikik Abraham kwak chulejtiatuya wan nejmachnemik. Yajki musentepewa itech ne ikniwan. 9 Itzak wan Ishmael, ne ipilawan, kitukaket tik ne ustut pal Makpela, tik ne imil Epron ikunew Tzojar, ne Jettekat, ne muajsi nepa Mamre, 10 yaja ne mil ne Abraham kinkuilijtuya ne Jettekat. Né mutukaket Abraham wan Sara ne isiwaw. 11 Kwak mikik Abraham, ne Teut kiteuchij Itzak ne ipiltzin. Itzak nakak inawak Beer-Lajay-Roi.

12 Wan ini ne ken ijtuk iwan Ishmael, ne ikunew Abraham iwan Hagar ne Egiptojtekat, ne icriadaj Sara. 13 Ini ne intukay ne ipilawan Ishmael, ken intujtukay wan ken nesket: ne iachtu ká Ishmael yaja Nebayot, tipan walajket Kedar, Adbeel, Mibsam, 14 Mishma, Duma, Masa, 15 Jadad, Teyma, Yetur, Napish wan Kedma. 16 Yejemet ne intujtukay ne ipilawan Ishmael, ne kipishket sejse kan muchantia katka wan kitalia ne tawipanti, ken majtakti-ume tatuktiani ipal ne intejtechan. 17 Ini ne shijshiwit ipal Ishmael: sentzunti-senpual-kashtul-ume shiwit. Sewik, mikik wan yajki musentepewa itech ne ikniwan. 18 Kan kipishket inkajkal pewa tik Jawila itech Shur ne nemi inawak Egipto wan ajsi ka Ashur. Tik itachialis muchi iikawan nakak.

27. Itzak wan Rebeka (24:1-67)

[Read English translation]

Itzak wan Rebeka

24

1 ABRAHAM chuleta, panutiwita ne tujtunal.

Tutajwan kipalewijtuya Abraham tik muchi.

2 Abraham kilwij n' itekitini achtu pal n' ikal

ne tatuktia tik muchi tay kipiatuya:

3 shiktali ne mumey itan numetzkuyu

nimetztuktia ma shikchi' jurar

ipanpa ne Teut ipal n' ilwikak

wan ne Teut ipal ne tal

ka inte tiu-tiknamiktia nupiltzin iwan se siwat

pal ne Kanaantekat ne intzalan nimuchantia

4 asunte tik ne tal kan ninesik tiasneki

pal tikajsi se siwat ipal nupiltzin Itzak

5 ne tekitini kilwij: anka ne siwat inte yu-kineki

senyawi nuwan ka ini tal

muneki ma nimukwepa nikwika

ne mupiltzin ka ikuni?

6 Abraham kilwij: shikita ma inte shikwika ne nupiltzin ka ikuni

7 ka Tutajwan Teut pal n' ilwikak

ne nechishtij ka ichan ne nuteku

wan ijtik ne tal ipal nukniwan

nechnutzki wan kichijki jurar:

"ne mupilawan niu-nikmaka ini tal"

yaja yu-kititania n' itanawatiani ka muishpan

man shikajsi se siwat ipal nupiltzin ka unkan

8 su ne siwat inte kineki senyawi muwan

tiu-timuishtilia ini mujuramentoj

semaya nimetztajtani ka ne nupiltzin

ma inte shimukwepa tikwika ka ikuni

9 ne tekitini kitalij n' imey

itan imetzkuyu Abraham n' itekuyu

wan kichijki jurar iishpan

ka yu-kichiwa ken ne taketzket

10 ne tekitini kikwij majtaki icamelloj n' itekuyu

wan yajki iwan muchi tay kipiatuya n' itekuyu

ajkewik wan ajsik Aram-Naharaim

ne techan kan muchantia Najor

11 kintalij ijpak intejtewajka

ne camellojmet itenpan ne techan

itech n' ishat ka teutak

kwak kisat ne siwatket kitilanat ne at

12 inak: Tutajwan ne Teut pal nutajtzin Abraham

nimetztajtani ma shinechpalewi

tik ini tunal shikchiwili se tay yek

wan shikpalewi nutajtzin Abraham

13 naja ninemi ejkatuk

nikan itech ne ishat

wan n' insiwapilawan ne chanejket

kisat witzet kitilanat at

14 ne siwapil ne niu-nikilwia:

shikishtapachu ne mutzutzukul ma niati

ne yu-ina: shikuni taja

wan nusan ne camellojmet niu-nikinmaka

ma yaja ne tikishpejpen

ipal mutekitini Itzak

wan itech yaja niu-nikmati

ka tikpalewijtuk ne nutekuyu

15 kwak yaja inteuk tamik tanutza

né kiski Rebeka n' isiwapiltzin Betuel

n' ikunew Milka n' isiwaw Najor n' iikaw Abraham

iwan n' itzutzukul ijpak ikechtan

16 ne siwapil sujsul ishyektzin

nian se takat kishmattuk

yaja temuk ne ishat

kitema n' itzutzukul, wan waltejkuk

17 yajki mutalua ne tekitini

itech wan yaja kilwij:

shinechishtapachuili, nimetztajtani,

chiupi at pal ne mutzutzukul

18 inak: shikuni nutajtzin, wan munelwij

kitemultia n' itzutzukul tik imey wan kimakak

19 wan kwak tamik, inak: nusan pal ne camellojmet

niu-niktilana hasta ma tamikan atit

20 munelwij kishkwepa n' itzutzukul tik ne atiluyan

kwakuni yajki mutalua senpa

hasta ne ishat kitilana at

wan kalkwij pal muchi ne camellojmet

21 ne takat nakak tachia

wan te inak tatka

yaja kinekituya kimati

su Tutajwan kipalewijtuk ush inte

22 kwak ne camellojmet tamiket atit

ne takat kikwij se anilloj pal teukwit kitamachiwa se beka

wan ume makusti pal teukwit pak n' imajmajkul

kitamachiwat majtakti shekel

23 inak: ká ipal taja tiikunew

nimetztajtani ma shinechilwi

nemi ichan muteku

kan welit tipanut ne tayua?

24 yaja kilwij: naja niikunew Betuel

n' ikunew Milka n' isiwapiltzin Najor

25 wan kilwij: tajsul wan takwal tikpiat

nusan nemi kan anpanusket ne tayua

26 mutapachuj ne takat

mutankwaketza iishpan Tutajwan

27 inak: yektenejtuk Tutajwan

ne Teut ipal nutajtzin Abraham

ka inte kielkawtuk nutajtzin

wan nakak yekkaya iwan

wan Tutajwan nechtalij tik ne ujti

ka ichan n' iikawan nutajtzin!

28 yajki mutalua ne siwapil

kinneshtilia ichan ne inan

ne ken ijtuk

ipal muchi tay panutuk

29 Rebeka kipiatuya

se iechkaw itukay Laban

mutaluj Laban itech ne takat

tatenpan itech ne ishat

30 ken kitztuya ne anilloj wan ne majmakusti

ijpak n' imajmajkul n' ieltiw

wan ken kikaktuya tay kilwij Rebeka n' ieltiw, ina:

ijkini nechilwij ne takat...

ajsik itech ne takat

ejkatuk inawak ne camellojmet

itech ne ishat

31 wan inak:

shikalaki, yektenejtuk ipal Tutajwan

taika titejchia tatenpan?

nikekchijtuka ne kal

wan se kan welit nemit ne camellojmet

32 walaj ne takat ichan wan kinsutun ne camellojmet

kinmakak tajsul wan takwal

at pal yaja mupaka n' iijikshi

wan n' inhijikshi ne takamet nemit iwan

33 kitalilijket takwal

inak: inteuk niu-nitakwa

achtu niu-nitaketza

inak: shitaketzaya

34 inak: naja niitekitini Abraham

35 Tutajwan kiteuchijtuk ne nutekuyu sujsul, kichijtuk wey

kimakatuk ichkamet wan wakashmet

tumin wan teukwit, tekitinimet, cajcamelloj wan bujburroj

36 Sara n' isiwaw ne nutekuyu

kipunilij se piltzin

kwak yaja lamaja

wan kimakatuk muchi tay kipia

37 ne nutekuyu nechtuktij ma nikchi' jurar

inak: maka shu-shiknamikti nupiltzin

iwan se pal ne Kanaantekat

ne intzalan nimuchantia

38 asunte ka ichan nuteku tiasneki

tikajsi se siwat ipal nupiltzin ijtik numiakwan

39 nikilwij ne nutekuyu:

anka inte yu-senyawi ne siwat nuwan

40 nechilwij: Tutajwan

ne ijtik ne iuj ninejnentuk

yu-kititania n' itanawatiani

muwan pal metzpalewia

wan taja tiu-tikajsi

se siwat ipal nupiltzin

ijtik numiakwan

ichan nuteku

41 sema timupupulwis pal tay nimetztuktijtuk

su tiajsi itech numiakwan

wan te metzajkawat tikchiwa

su ijkiuni timupupulwis

42 niwalaj ashan itech n' ishat, ninak:

Tutajwan Teut pal nutajtzin Abraham

nimetztajtani ma shikchiwa ma kisa yek

ne ujti ne ijpak ninejnemi naja

43 nikan ninemi itech ne ishat

wan ne siwapil ne yu-kisa kitilana at

niu-nikilwia: nimetztajtani, shinechmaka

chiupi at tik ne mutzutzukul

44 wan yu-nechilwia: taja nusan shiati

wan niu-niktilana pal ne camellojmet nusan

yaja ne siwat ne kishpejpen Tutajwan

ipal n' ipiltzin ne nutekuyu

45 kwak inteuk nitamik nitaketza tik nuyulu

Rebeka kiski wan n' itzutzukul pak ikechtan

temuk ka ishat kitilana

wan nikilwij: shinechmaka at

46 munelwij kitemultia

n' itzutzukul pak n' ikechtan

inak: shikuni, wan niu-nikmaka ne camellojmet nusan

niatik, wan nusan ne camellojmet kinmakak

47 niktajtanilij: ká ipal tiikunew

inak: niikunew Betuel n' ikunew Najor ne Milka kipunilij

niktalij ne anilloj pak n' iyak

wan ne majmakusti pak n' imajmajkul

48 nitapachuj wan nimutankwaketzki iishpan Tutajwan

nikyektenej Tutajwan ne Teut ipal nutajtzin Abraham

ne nechwikak tik ne ujti yekkaya

pal nikajsi n' ikunew n' iikaw ne nutekuyu ipal n' ipiltzin!

49 ashkan tel asu anmuwikasket yek

iwan ne nutekuyu, shinechilwikan

wan asu inte, shinechilwikan

ma nimuishkwepa wan ma niaw

50 nankilij Laban wan Betuel, inaket:

itech Tutajwan kiski uni

inte tiwelit tinat ipanpa

nian inte nian yeka

51 Rebeka nikan tikpia

shikwika wan shiawa tel

ma munamikti iwan n' ipiltzin ne mutekuyu

ka ijkiuni taketztuk Tutajwan

52 kwak n' itekitini Abraham

kikakik tay inaket

mutankwaketzki talchi

iishpan Tutajwan

53 ne tekitini kishtij tajtaiwan

pal tumin wan pal teukwit

wan kwajkwachti ipal Rebeka

wan sejseuk ne kitakulij n' iechkaw wan n' inan

54 takwajket wan atiket

yaja wan ne takamet iwan walajtiwit

panuket ne tayua wan muketzket peyna

inak: ma niaw kan nemi ne nutekuyu

55 inak n' iechkaw wan n' inan:

ma naka ne siwapil tuwanka

ankakeski tunal, anka majtakti

neman shu ka ne

56 kinhilwij: maka shikchiwakan ma nishtuna

ka Tutajwan nechpalewijtuk tik ne ujti

shinechajkawakan niaw

itech ne nutekuyu

57 inaket: tiknutzakan ne siwapil, tiktajtanilikan tay ina

58 kinutzket Rebeka wan kilwijket:

tiasneki iwan ini takat?

yaja inak: niasneki

59 kintujtukaket Rebeka n' inheltiw

n' itiskaliani

n' itekitini Abraham

wan n' itajtakawan

60 kiteuchijket Rebeka

kilwijket: tueltiw

ma shimuchiwa miak

wan ne mupilawan ma muchiwakan

itejtekuyu n' intechan ne kinhishijiat

61 muketzket Rebeka wan n' isijsiwapipil

mutalijket ijpak ne cajcamelloj

senyajket ipan ne takat

ne tekitini kiwikak Rebeka

wan yajket

62 Itzak ajsi walaj

tik Beer-Lajay-Roi

yaja muchantia katka

tik ne tal pal tatzinu

63 kwak kiski pashalua

ka teutak tik ne mil

yaja ajkutachishki

wan né witzet cajcamelloj

64 tachishki Rebeka

kitak Itzak

temuk pak ne camelloj

wan kilwij ne tekitini:

65 ká yajuni tik ne mil

pashalua witz tunawak?

inak ne tekitini: yaja ne nutajtzin

kikwij n' itzuntzakka wan mutzak

66 ne tekitini kilwij Itzak

muchi ne ken ijtuk

Itzak kikalaktij ichan n' inan

wan munamiktij iwan Rebeka

67 yaja muchijki n' isiwaw

wan Itzak kitasujtak

wan kiajsik pakilis

ipan n' imikilis n' inan Itzak

26. Abraham kitalpachuj Sara (23:1-20)

/ NE TUJTUNAL PAL SARA

Abraham kitalpachuj Sara

23

1 Ne tujtunal pal Sara sentzunti-unpual-chikume shiwit, uni ne shijshiwit kipishki. 2 Sara mikik tik Kiryat-Arba, ne muilwia Jebron, tik ne tal pal Kanaan. Abraham panuk tujtunal chuka ipanpa Sara. 3 Kwakuni Abraham muketzki itech n' imikini wan kinnutzki ne Jettekat. Inak:

4 —Melka niejkuni ninemi anmutzalan

shinechmakakan tal pal niktuka anmutzalan

ne numikini ne muneki ma niktuka.

5 Ne Jettekat nankilijket, kilwijket Abraham:

6 —Shitechkaki tutajtzin, wey takat ipal Teut,

shikishpejpena ne shaput tikneki tutzalan

wan shiktuka ne mumikini.

Inte aka ijtik muchi tejemet

yawi metzishtilia n' ishapu titechtajtani

pal tiktuka ne mumikini.

7 Abraham muketzki wan mutankwaketzki talchi iishpan ne Jettakat. 8 Kinnutzki wan inak:

—Asu ankinekit ma niktuka ne numikini

shumet shitajtanikan ka numaku

iwan Epron ikunew Tzojar

9 ma nechnamakili ne ustut kipia

ipal Makpela tik iten ne imil.

Niu-niktashtawia muchi n' ipatiw

tik tumin pal nechmaka ijtik anmejemet

ma niktuka ne numikini.

10 Epron nemituya muetztuk ijtik ne Jettekat, wan yajasan, Epron ne Jettekat, kinankilij Abraham tik itakakilis muchi ne Jettekat, iishpan muchi ne nemit tik ne plazaj pal ne techan, wan inak:

11 —Inte, nutajtzin, shinechkaki:

uni mil naja nimetztakulia

wan ne ustut nemi ka né

nusan nimetzmakaskia.

Tik itachialis ne nukniwan nimetzmaka:

shiktukaya ne mumikini.

12 Mutankwaketzki Abraham iishpan ne tekniwan ipal ne tal. 13 Kinutzki Epron tik itakakilis ne tekniwan ipal ne tal, wan inak:

—Nimetztajtaniskia ma shinechkaki:

nimetzmaka n' ipatiw ne mil, shikwi

wan ma niktukaya ka unkan ne numikini.

14 Epron kinankilij Abraham, inak:

15 —Nutajtzin, shinechkaki:

ipatiw ne tal nawtzunti tumin.

Ijtik taja wan naja, tay uni?

Ne mumikini shiktukaya.

16 Abraham kikakik Epron. Abraham kitashtaw Epron ne tumin ne taketzki tik itakakilis ne Jettekat: nawtzunti tumin ken kitamachiwat ne tanamakanit.

17 Ijkiuni tel ne imil Epron ne nemi tik Makpela ne nemi nepa Mamre, uni mil wan ne ustut nemi ijtik yaja wan muchi ne tajtal kiyawaluat ka né 18 mukwepki ital Abraham tik itachialis ne Jettekat, ika kikuilij iishpan muchi ne nemituyat tik ne plazaj pal ne techan.

19 Tipan Abraham kitukak Sara n' isiwaw tik ne ustut tik ne mil ipal Makpela nepa Mamre, ne itukay Jebron tik ne tal ipal Kanaan. 20 Ne mil wan ne ustut ijtik yaja mukwepket ipal Abraham, ka kikuilij ne Jettekat pal kituka n' imikini.

25: Ne ipilawan Najor (22:20-24)

Ne ipilawan Najor

20 TIPAN kineshtilijket Abraham, inaket:

—Shikita, Milka nusan kipunilijtuk ipilawan Najor ne muikaw: 21 Utz, ne achtu, Buz ne iikaw, Kemuel ne iteku Aram, 22 Kesed, Jazo, Pildash, Idlap wan Betuel. 23 Ne Betuel kipunijtuk Rebeka. Ini chikwey kinpunilij Milka Najor n' iikaw Abraham. 24 Wan ne iawil n' itukay Reuma, kipunij nusan yaja Teba, Gajam, Tajash wan Maaka.

24. Ne Teut kiejekuj Abraham (22:1-19)

[Read English translation]

Ne Teut kiejekuj Abraham

22

1 SE tunal ne Teut kiejekuj Abraham:

Abraham!

kilwij

nikan ninemi!

inak Abraham

2 inak:

ashan shikwi ne mukunew

ne sea tiktasujta, ne Itzak

shu wejka hasta ne tal pal Mori-Ya

shiktakuli unkan Itzak ken tetakulis

pak se tepet

niu-nimetzilwia

3 ka tapuyawa Abraham kiajshitij n' iburroj

kinwikak ume takat iwan

wan Itzak n' ipiltzin

kitzayan kwawit ipal ne tetakulis

wan kiski pal yawi

kanka kilwij ne Teut

4 tik ne tunal yey ajkutachishki Abraham

kitak kan yu-ajsi né wejka, 5 kilwij ne takamet:

shinakakan nikan iwan ne burroj

naja wan ne piltzin tiasnekit ka ikuni

san timutankwaketzasket

wan talmukwepasket

6 Abraham kikwij ne kwawit

ne muneki ipal ne tetakulis

wan kitalij iteputzta Itzak n' ipiltzin

kikwij tik imey ne tit wan ne tepusti

wan senyajket

ne inhumeshtin

7 Itzak kilwij Abraham n' iteku

inak: nuteku; inak:

nikan ninemi, nupiltzin

inak: nikan nemit ne tit wan ne kwawit wan

kan nemi ne ichkat

tiktakulisket?

8 Abraham inak:

ne Teut yu-kitalia

ne ichkat pal mutakulia

nupiltzin

wan ne ujume

senyajket ka ishpan

9 ajsiket kan kilwijtuya ne Teut

Abraham kiketzki ka né ne tepatznaj

wan kiekchijki ne kwawit

kilpij Itzak n' ipiltzin wan kitekak

pak ne tepatznaj

ijpak ne kwawit

10 Abraham kimelajki n' imey

wan kitzkij ne tepusti

pal kimiktia n' ipiltzin

11 se tanawatiani tik n' ilwikak kinutzki:

Abraham Abraham

inak: nikan ninemi

12 inak: maka shikmelawa ne mumey pak ne piltzin

maka shikchiwili tatka

ashan nikmatiaya ka tiktakamati ne Teut

ika tiktemakatuskia nuwan su nimetztajtantuskia

ne mukunew

sea tasujtatuk

13 Abraham ajkutachishki

wan shikita! se ukichichkat

muitzkijtuk tik ne machorraj tech n' icachoj!

yajki Abraham kikwi ne ichkat

wan kitakulij ne Teut

ipatka n' ikunew

14 Abraham kinutzki ne itukay ne kan nemik: "Tutajwan Kitalia". Wan hasta ini tunal inat: Tik n' itepew Tutajwan muitas.

15 n' itanawatiani Tutajwan kinutzki Abraham senpa

16 inak: nupanpa nikchiwa jurar

ina Tutajwan

ka ika tikchijki uni wan tiktemakatuskia

ne mukunew

sea tasujtatuk

17 ka naja niu-nimetzteuchiwa

niu-nikinmiakchiwa ne mupilawan

ken ne sitalmet ijtik n' ilwikak

ken ne ashal iten ne weyat

mupilawan yu-muchiwat itejtekuyu

n' intechan ne kinhishijiat

18 wan muteuchiwasket ipanpa mupilawan

muchi ne tejtechan pal ne taltikpak

ika tinechtakamatki

19 Mukwepki Abraham itech n' itakawan. Muketzket wan senyajket Beer-Sheba wan mukawki Abraham tik Beer-Sheba.